Kʼoasʼin chja̱kaonajmiá chjota josʼin nga sa̱sénle Énle Niná
1. Jméni xi bakóyaná jokisʼin chjotale Cristo xi títjon tsakatio nga kjaʼaí kjaʼaísʼin tsakjákao chjota.
1 Je chjotale Cristo xi títjon tsakatio kitsoyasonle énnda chjotse je chjota xi xin kitje̱nni kao xi kjaʼaí kjoamakjain kisʼele (Col. 1:23). Kʼoa ninga kui tsakjákaontsjaini chjota tʼatsʼe gobiernole Niná kisikʼantjaiyale josʼin tsakjákao kʼoa kui kini ʼyá chjotani xi tsakjákao. Tobʼelañá, je pastro Pedro kʼianga tsakjákao je chjota judío kui kisikʼaxki̱le jmeni xi kitso je profeta Joel, nga̱ je chjota judío nʼio tsabexkón je Énle Niná (Hech. 2:14-17). Kʼoa ya Hechos 17:22-31 je pastro Pablo jekjaʼaísʼin tsakjákao je chjota griego. Nichxin xi tiyoaa ndʼaibi, tjín ʼnde jñani bexkón Biblia je chjota kʼoa koaan kui koakolee kʼianga xki̱ niʼya ʼmiyasoán. Tonga tsa je tichjakoaa chjota xi tsín makjainle tʼatsʼe Cristo, xi tsín mandosinle tʼatsʼe Biblia kao tʼatsʼe relijión, tsakui nichxin ngisa nda nga tsín tokjoan kui si̱kʼaxki̱ sénndiaalee nga kabichochonlee.
2. Jósʼin koa̱n si̱chjén je xo̱n xi fayolee chjota kʼianga kuinyakoaa xi makjainle tʼatsʼe Biblia kʼoa kao xi tsín makjainle.
2 Katamaná josʼin si̱chjén je xo̱n xi fayolee chjota. Fitsʼiakjoanni sá septiembre nó 2012, je xo̱n xi sʼe̱yole chjota xki̱ jao sá kʼoantjaiyani, jolani tsa rebista, tratado kao foyeto. Ninga tsín mandosinle tʼatsʼe Biblia je chjota ya ʼnde jñani ʼmiyasoán koaan kui chja̱kaoñá jmeni xi mandosinle. Kʼoa ninga tsín Biblia kanikʼaxki̱lee kʼoa ninga tsín jme testo kabʼexkialee, tonga tsa kamandosinle tjínnená nga kjuinchón ijngokʼalee ánni nga sʼe̱sínile kjoamakjain tʼatsʼe Niná kao tʼatsʼe Biblia. Kʼoa tsa je chja̱koaa je chjota xi bexkón Biblia, koaan kui koakolee nga chja̱kaonajmiá kʼoa kjoáyolee xo̱n xi kichʼa xi Biblia yʼangini. Kʼoa saʼnda koa̱n kʼoailee je libro Jmé kjoanni xi bakóya je Biblia kʼoa kao foyeto Tinóʼyalai je Niná kʼoa tsamaije̱ Tinóʼyalai je Niná kʼoa kuijnaní ngantsjai nichxin ni kui tísʼeyo kʼoa ninga mai nga kui sá. Xi ngisa chjíle kuinga kʼoasʼin kʼuínyaa josʼin sasénle je chjota.
3. Jósʼin mangóson je ni̱ma̱ná kao jngo nangi jña tsojmi sʼentje.
3 Tongini kjoásjailee josʼin chja̱kaonajmiá. Je ni̱ma̱le chjota yaa mangóson jngo nangi jñani sʼentje tsojmi (Luc. 8:15). Tjínkʼa xi ngisa ʼnyi nikao nga katamantjejin ni̱ma̱le je Énle Niná. Je chjotale Cristo xi tsakatio ngasʼa kitsoyale toʼya chjotani je Énle Niná kʼoa jebi nda kichotsjoá kʼoa nʼio tsjoa kisatio kon (Hech. 13:48, 52). Kʼoati koa̱n kʼoasʼiaan tsanda ñá tsa kuenta sʼiaan josʼin ʼmiyalee je Énle Niná je chjota.