Jósʼin bájinkonná Niná je Énle

Saʼnda nga koannda títjon chjota i̱ Sonʼnde, je Niná ánkje kao profeta kisichjén nga tsakájnale én je chjota. Kʼoati tsakʼétʼaxo̱n jmeni xi kitso kʼoa jmeni xi sʼin. Je Niná kʼoatso nga tsjoa sa̱tío tokoán nichxin xi nroaján, tonga tsakui nichxin i̱ bixoán: “Jñáni faʼaitʼa jmeni xi tongini kitso Niná”.

Yaa Biblia faʼaitʼa je Énle Niná (2 Timoteo 3:16). Jósʼin kisichjén Niná je profetale nga kiski je Énle. Jé Niná tsakándiaale chjota jebi nga kiski jmeni xi kitsole (2 Pedro 1:21). Tobʼelañá, tsa jngo chjota xi xá tjínle tsa jngo xo̱n kʼoenda tsakui nichxin je secretariole kʼoakuitsole nga katakji, je chjota xi xá tjínle kʼoatsole je secretariole jokʼoe je xo̱n xi skí ninga je secretario kji ali tsa tsʼejin én xi síkasén, tikʼoasʼinni, je chjota xi kiski Biblia kui kjoafaʼaitsjenle Niná kiski, ali tsakuijin kiski kjoafaʼaitsjen xi tsʼe.

KOAAN SKOE̱ NGATSʼI CHJOTA JE ÉNLE NINÁ

Nʼio tjínle kjoandosin jmeni xi tso je Énle Niná kʼoa kui xi mele nga koa̱n kʼoexkia kʼoa koa̱njinle toʼyani. Nichxin xi tiyoaa ndʼaibi, je chjota “xi tjío sonʼnde, kao ngayije nangi, kao ngayije ntje̱, kao ngayije én, kao ngayije naxinandá” tísʼejinkon “je énnda xi tjín ngantsjai” (Apocalipsis 14:6). Je Niná tísíchikontʼain nga tífaʼatoya je Biblia xi kjaʼaí kjaʼaí én. Jetsʼato 3,000 én jaʼatoya, tjín jñani jejaʼatoya ngakjijngo kʼoa tjín jñani tosʼa basen jaʼatoya. Kui je Biblia xi ngisasa nkjín én tífaʼatoya tikʼoajinni xi kjaʼaí libro.