Jósʼiain nga nda kuijna ijngokʼai ngixko̱n Jeobá

NGA xki̱ nó, nʼio nkjín chjota faʼaijin ijngokʼani naxinandále Niná. Si̱kjaʼaitsjenla jokji kjoatsjoa sʼe ya ngʼajmi kʼianga faʼaikatiojin ijngokʼa naxinandále Niná je chjota xi kitjojin tsakai (Luc. 15:7, 10). Kʼiatsa sʼa jaʼai̱jin ijngokʼai naxinandále Niná, ali jaojin bʼai tokuin nga nʼio tsjoa sʼe kon je Jeobá, Jesús kao ánkje. Kʼianga nda kuijna ijngokʼani ngixko̱n Jeobá, tsakui nichxin tjín xi ñʼai koa̱nli. Jméni xi ñʼai koa̱n sakʼoali kʼoa jmé xi koasenkaoli.

XI ÑʼAI KOA̱N KʼALI

Nʼio nkjín ndsʼee xi tojo tsín nda satío kon tʼatsʼe jme xi kisʼin kʼianga jefaʼaikatiojin ijngokʼa jinjtín. Kʼiatsa kʼoatjín tokuin majinjinli jokisʼe kon je rey David. Ninga kʼia nga jekisichatʼale Niná je jée xi tsakajngi i kitso: “Nʼio tse jée tsakajngia xi tsín tikanina” (Sal. 40:12; 65:3). Tjínkʼa xi tojo tsín nda satío kon kʼoa xi tojo soa male ninga jenkjín nó tífaʼato nga jaʼaijin ijngokʼa naxinandále Niná. Tobʼelañá, je Isabelle,a xi tsʼato 20 nó nga tsín tinaxinandále Niná tsakʼejnajinni, itso: “Ñʼai koanna nga kʼoasʼin kisikjaʼaitsjen nga sichatʼana je Jeobá”. Tsa si̱kinroajain tokuin kʼoajin tiñʼai koa̱nli nga si̱miyo ijngokʼai Jeobá (Prov. 24:10). Ali bʼaiʼndejin nga kʼoakatama.

Tjínkʼa xi kui síkjáojin jósʼin nga nda koatio ijngokʼani ngixko̱n Jeobá. Kʼianga jetsakʼejnajin ijngokʼani naxinandále Niná, je Antoine itso: “Ñaki kichajinna ngayeje jokisʼian nga je Jeobá kisixále”. Nga kʼoasatío kon, tjínkʼa xi tsín tibʼénenile yaole nga nda síxále Niná nga faʼai ijngokʼa jinjtín.

Jngola choa̱ si̱kʼéjnaa. Kʼiatsa jngo ndʼia xi jngo huracán kʼoejndajon, tsakui nichxin tsín nda sʼe̱ kon naile ndʼia jebi nga tokui sikjaʼaitsjen ʼndeʼnde jotjín nichxin sʼe̱ngile nga kʼoendaya ijngokʼa. Tikʼoasʼinni, tsa tsín tinda tijnani ngixko̱n Jeobá nga ai jée tsakijnyi, tsakui nichxin kʼoasʼin si̱kjaʼaitsjain nga nʼio kʼoénelai yaoli nga nda kuijna ijngokʼani ngixko̱n Jeobá. Tonga ali tsa tojijin tijnai.

Je Jeobá itsoná: “Nroáo, kʼoa kʼoéndajiaan je kjoa xi tjínná” (Is. 1:18). Nʼio tsjoakeli je Jeobá nga̱ jetsakʼendajin kjoa xi tjínli kao je. Tikjaʼaitsjain nga nʼio nda choa̱ tibʼejnai kʼoa kui sichjén je Jeobá nga kʼoakuitsole je Na̱i nga ndiso (Prov. 27:11).

Kʼianga jenaxinandále Jeobá tijnajin ijngokʼai, jekinichriantʼalai kʼoa je kʼoati sichriantʼali (Sant. 4:8). Nʼio ndatjín nga tjíobe xi ngikʼa nga jejaʼai̱jin ijngokʼai jtín. Tonga nʼio machjén nga tosi tonda tsjoacha koai̱n je Jeobá, nga Nʼaili ma kʼoa nga Miyoli ma. Jmé xi koa̱n sʼiain.

JMENI XI KOA̱NLI KʼOASʼIAIN

Kui tikjaʼaitsjain jmeni xi koa̱nli kʼoasʼiain. Faʼaitsjenjinli jme xi kichotʼayai xi tʼatsʼe Jeobá kʼoa jmeni xi tso tʼatsʼe nichxin xi sʼa nroa. Tonga machjén nga nda si̱xá ijngokʼalai Niná. Tobʼelañá, nga kjitʼa kʼuínyasuin, nga kʼuín kjoajtín kʼoa nga si̱miyui je ndsʼee. Kataʼyala kʼa jmeni xi koa̱n sʼiain.

Kjitʼa chja̱kaonajmí je Jeobá. Je Jeobá majinle nga ñʼai mali nga bʼetsʼoalai kʼiatsa tojo tsín ndatjín tokuin tʼatsʼe jée xi tsakijnyi (Rom. 8:26). Ninga kʼoalani, tosi tonda tʼetsʼoalai je Jeobá kʼoa kʼoatʼinlai nga meli si̱miyui (Rom. 12:12). Je Andrej itso: “Chʼaotjín tokoan nga tsakajngijée kʼoa soa mana. Tonga kʼianga jebʼetsʼoa nda sʼe tokoan”. Kʼiatsa tsín ʼyai jme xi kʼuínlai je Jeobá kʼianga kʼoétsʼoalai, tikjaʼaitsjain jmeni xi kitso je rey David kʼianga tsakʼétsʼoale Niná nga kʼoakoannile je jée xi tsakajngi tojosʼin faʼaitʼa Salmo 51 kao 65.

Kjitʼa chótʼayai je Biblia. Kui xi koasenkaoli nga nʼio sʼe̱jna kjoamakjainli kʼoa nga ngisa tsjoacha koai̱n je Jeobá (Sal. 19:7-11). Je Felipe itso: “Nga tsín ntsjaintsjai kiskotʼaya kʼoa nga tsín tsakʼexkia je Biblia kui xokisikaona nga kinroajenni kjoamakjainna kʼoa nga tsakajngijéeña ngixko̱n Jeobá. Nga tsín mena nga kʼoasʼin ijngokʼa, nda tsakʼendajian nga skotʼaya nga toʼan”. Kʼoati koa̱n sʼiain tsanda ji. Tsa tsín ʼyai jmeni xi chótʼayai nga toji, koaan kʼoakʼuínlai jngo ndsʼee xi nda tísíxále Niná nga katabasenkaoli.

Timiyo ijngokʼai je ndsʼee. Tjínkʼa xi faʼaijin ijngokʼani jinjtín xi kʼoasʼin síkjaʼaitsjen nga tsín tinda skoe̱konni xi ngikʼa. Je Larissa itso: “Nʼio soa koanna, kʼoasʼin kisikjaʼaitsjen nga kisikiʼoan kjoafaʼaitsjenle ndsʼee xi tjío jinjtín. Tsee nga kʼoakisʼe tokoan”. Je xi chjotajchínga sʼin tjío kao ndsʼee xi ngikʼa mele kuinyakaoli nga ndasʼin kuijna ijngokʼani ngixko̱n Jeobá (chótsenlai je recuadro “Jmeni xi koa̱n sʼin xi chjotajchínga sʼin tjío”). Nʼio tsjoa tjío kon nga jaʼai̱jin ijngokʼani naxinandále Niná kʼoa kui xi mele nga kʼoati tsjoa katasʼe tokuin (Prov. 17:17).

Jméni xi koa̱n sʼiain nga si̱chriantʼa ijngokʼalai ndsʼee xi tjío jinjtín. Ntsjaintsjai tʼin kjoajtín kʼoa kjitʼa tʼinyasuin kao je ndsʼee. Jósʼin koasenkaoli nga kʼoasʼiain. Je Félix itso: “Tsaʼbeña nga nʼio tsjoakena je ndsʼee, nga̱ tjíokoyana nga jeʼe̱ ijngokʼaña. Tsakinyakaona ngatsʼi nga tsjoa kisʼe tokoan nga jeʼe̱jin ijngokʼa jinjtín. Koanjinna nga jekisichatʼana je Jeobá kʼoa nga koa̱n je sixá ijngokʼanile” (chótsenlai je recuadro “Jmeni xi koa̱n sʼiain”).

ALI NIKʼAJENJINLAI TOKUIN

Nga meli nda kuijna ijngokʼai ngixko̱n Jeobá, je Na̱i tosi tonda kjoa koa̱njngíli nga sikinroajen kjoamakjainli (Luc. 4:13). Tsa meli nga chókjoajinli jme xi koatiobasenli je Na̱i tosi tonda timiyui je Jeobá.

Kʼianga nchja̱ni je Jeobá tʼatsʼe choʼndale itso: “Je xi kicha koasjaiña, je xi kitsaoba kjoaʼaikaoña, je xi kitsiʼaon koajtéjonña kʼoa tsjoanganʼiole je xi tsínle nganʼio” (Ezeq. 34:16). Je Jeobá jenʼio nkjín choʼndale tíbasenkao nga nda koationi ngixko̱n. Ali jaojin bʼai tokuin nga kʼoatisʼin koasenkaoli Jeobá nga nda kuijna ijngokʼani ngixko̱n.

Jmeni xi koa̱n sʼin xi chjotajchínga sʼin tjío

Je xi chjotajchínga sʼin tjío tsee jmeni xi koa̱n sʼin nga kuinyakao je xi faʼaikatiojin ijngokʼani naxinandále Niná nga ndasʼin koatio ngixko̱n Jeobá. Kataʼyala kʼa jmeni xi koa̱n sʼin.

Koaan si̱nʼiojion. Je pastro Pablo kʼoakitso nga je xi faʼaijin ijngokʼani naxinandále Niná tjínkʼa xi ba satío kon nga nʼio síkjáojin (2 Cor. 2:7). Tsakui nichxin soa male kʼoa síkʼajenle kon. Kuinga i̱ kitsonile Pablo je chjotale Cristo: “Tichatʼalao, kʼoa tijetakonlao”. Je xi faʼaijin ijngokʼani naxinandále Niná, nʼio kuinyakao nga kʼoakʼuínlee nga tsjoake je Jeobá kʼoa nga kʼoati tsjoachaa tsanda ñá. Kʼiatsa kuinyakoaa kʼoa kjitʼa kʼoakʼuínlee nga nda tjíosʼín, kuinyakao nga tsín sikʼajenle kon.

Tʼetsʼoantjao. “Je kjoabʼetsʼoale chjotakjoakixi kjaí tjínle nganʼio” (Sant. 5:16). Je Larissa, xi sa jekabʼaxki̱ itso: “Tsakʼeyanajmíle je xi chjotajchínga sʼin tjío jotjín tokoan kʼoa jmeni xi ñʼai mana, kʼoa tsakʼétsʼoantjaina. Koanjinna nga tsín jtile je xi chjotajchínga sʼin tjío. Koanmele tsakinyakaona nga ndasʼin koatejna ijngokʼaña ngixko̱n Jeobá”. Je ndsʼee xi Theo ʼmi itso: “Kʼianga tsakʼétsʼoantjaina je xi chjotajchínga sʼin tjío, koanjinna nga nʼio tsjoakena je Jeobá kʼoa nga kuenta sʼín jñani nda sʼian kʼoa nga tsín tokui fini jñani chʼao sʼian”.

Timiyo. Nʼio kuinyakao je xi faʼaijin ijngokʼani naxinandále Niná nga sʼe̱le miyo ya jinjtín. Je Justin, xi chjotajchínga sʼin tíjna, itso: “Koaan ñatjen kʼuínyasoán kao je kʼoa kjuinni̱xatʼaa. Nʼio machjén nga si̱miyoaa”. Ijngo xi chjotajchínga sʼin tíjna, xi Henry ʼmi, itso: “Nga skoe̱ je ndsʼee nga símiyo je xi chjotajchínga sʼin tjío je xi faʼaijin ijngokʼani naxinandále Niná kʼoatisʼin tsanda je”.

Tinyakao nga katakotʼaya nga toje. Koaan jngo ndsʼee xi nda tísíxále Niná koasenkao je xi faʼaijin ijngokʼani naxinandále Niná nga nda skótʼaya. Je Darko, xi chjotajchínga sʼin tíjna, itso: “Kui fakaonajmíña jmeni xi masjaijinna nga kotʼaya nga toʼan je Biblia, nga katabe jokji tsjoa sʼe tokoan nga kotʼaya”. Ijngo xi chjotajchínga sʼin tíjna, xi Clayton ʼmi, itso: “Kʼoaxinle nga kui katabʼéxkia ya Biblia tʼatsʼe chjota xi me kʼoati kui kjoa jaʼatojin joni je”.

Tangínchonlao nga tinʼiojion. Je xi faʼaijin ijngokʼani naxinandále Niná be nga je xi chjotajchínga sʼin tjío bʼéndajin kjoa, tonga kʼoati machjén nga katabe nga je sikuinda (Jer. 23:4). Xi chjotajchínga sʼin tiyo machjén nga kuinóʼyalao kʼoa kʼoakʼuínlao jñani nda sʼín je xi faʼaijin ijngokʼani naxinandále Niná. Kjitʼa chja̱kaonajmío nga kuinyakao. Je Marcus, xi chjotajchínga sʼin tíjna, kʼoatso josʼín nga sínʼiojin je ndsʼee, itso: “Bʼexkianíjin kʼoa chobayanijin jmeni xi tso je Biblia, kʼoa kʼoaʼmilaijin nga tsjoa tjín kon je Jeobá kʼoa nga kʼoati tsjoa tjío tokuinjin nga jaʼaijin ijngokʼani naxinandále Niná. Kʼoa kʼianga jenixatʼaijin kʼoaʼmilaijin kʼia si̱xatʼa ijngokʼaijin”.

a Ali tsa ñaki kʼoaʼmi je chjota xi síkʼaxki̱ kjoaʼmiya jebi.