Tjínkʼa xi kjonangi

A toxokʼoakitso David nga kʼoasjengʼa jaʼaínle Niná “ngantsjai” nichxin, tojo tso Salmo 61:8.

Mai. Ñaki kʼoatjín jmeni xi kitso.

Kuentala sʼiaan jmeni xi kiski David tojosʼin faʼaitʼa ya Salmo 61:8 kao xi kjaʼaísa versículo. I kitso: “Seña ngantsjai nga kʼoasjengʼa jaʼaínli, nga sitjosoan je énna nga nyaon nyaon”. “Bʼasjengʼale ji Jeobá Ninána kao ngayeje ni̱ma̱na, kʼoa kʼoasjejeyaña jaʼaínli ngantsjai nichxin”, “kʼoasjengʼaña jaʼaínli ngantsjai nichxin kʼoa tokʼia saʼndani” (Sal. 61:8; 86:12; 145:1, 2).

Alikui toxokʼoakitso David nga kʼoasjengʼa jaʼaínle Niná ngantsjai nichxin. Be nga kuicho nichxin nga kuiyá, nga̱ kui jée xosíkaoná nga biyañá, kʼoa je David koanjinle nga chjotajée ma (Gén. 3:3, 17-19; Sal. 51:4, 5). Be nga kʼoati kʼien choʼndale Niná xi kixi kitʼale, jolani Abrahán, Isaac kao Jacob. Kʼoati koanjinle nga kuicho nichxin nga kuiyá tsanda je (Sal. 37:25; 39:4). Tonga jmeni xi tso Salmo 61:8 kui bakóyaná nga ñaki kʼoatsakʼé kon David nga kʼoasjengʼa ngantsjai je Niná jokjitse kʼoéjnakon (2 Sam. 7:12).

Sakʼoa kui tsakʼétʼaxo̱n David jme kjoa xi jaʼatojin, tojo tso je én xi tjíokjájkole Salmo 18, 51 kao 52. Tojo tso Salmo 23, je David kui síngósonkao Jeobá tojo sʼín jngo chjota xi barré koʼnda nga bándiaale, nga síkjen kʼoa nga síkuinda je barréle. Kʼoasʼin kisikuinda David je barréle kʼoa kui xi koanmele nga je Jeobá sixále jokjitse kʼoéjna (Sal. 23:6).

Kʼoati kuenta sʼiaan nga je Niná xi kʼoasʼin koanmele nga kisʼetʼaxo̱n jmeni xi kitso David. Tjínkʼa je én xi tongini kiski David xi skan kitjoson. Tobʼelañá, ya Salmo 110, je David kʼoakitso nga kjoaʼaí nichxin nga ya kʼoéjna Naile ya ngakixile Niná ya ngʼajmi kʼoa nga tse nganʼio kʼoaile. Kʼoa je nganʼio xi kʼoaile kʼoasʼin sichjén nga koanentsja kontrale Niná kʼoa nga sikjeson naxinandá. Je David chjotajchíngale koanni je Mesías, xi ya tjen ngʼajmi tíbatéxomani kʼoa xi naʼmi koa̱n ngantsjai (Sal. 110:1-6). Je Jesús kʼoakitso nga je sitjoson jmeni xi tso Salmo 110 kʼoa nga sʼasa kuitjoson nichxin xi sʼa nroa (Mat. 22:41-45).

Tojosʼin tiʼyaa, jé Jeobá tsakándiaale David nga kui kiski jmeni xi koan nichxin nga tsakʼejna kao jmeni xi koa̱n nichxin xi sʼa nroa nga kjoaʼáyanile kʼoa nga kʼoasjengʼa Jeobá ngantsjai. Jósʼin basenkaoná jebi nga majinná jmeni xi tso Salmo 37:10, 11, 29. Texto jebi kui bakóya josʼin tsakatio chjota israelita nichxin kjoatse kao josʼin kuiyoaa nichxin xi sʼa nroa kʼianga jesitjoson Niná jmeni xi tso (chótʼai ya párrafo 8 xi tsʼe kjoaʼmiya “Yaa kuijnakaonái ya ʼndenaxó”, xi faʼaitʼa revista jebi).

Tojo tso Salmo 61:8 kao xi kjaʼaísa versículo xi me kʼoati tsoni, kui bakóyaná nga kui xi koanmele David nga tsakʼasjengʼa Jeobá ya naxinandá Israel jokjitse tsakʼejna. Kʼoati kui bakóyaná jmeni xi sʼin David nichxin xi sʼa nroa kʼianga kjoaʼáyanile.