Kuicho nichxin nga tsín tisʼe̱ni kjoajchán kao kjoasi

JE NINÁ KJOAʼAXIN JE CHJOTAXÁ

Je Niná sikjeson je chjotaxá kʼianga kjoaʼaíkao je kjoajchán xi Armagedón tsole Biblia (Apocalipsis 16:16).a Nga kui nichxin, je “chjotatítjon xi tsʼe ngakijnda sonʼnde” ni̱katíoxkó nga sʼe̱jna kjoajchán “xi tsʼe Niná xi batéxoma ngayije” (Apocalipsis 16:14). Nga jesʼe̱jna Armagedón, je Niná tondiaa kjoaʼaxin je kjoajchán.

Je Niná tsʼe chjotaxá sikʼéjna kʼianga jekjoaʼaxin chjotaxá xi tjío ndʼaibi. Je Chjotaxále Niná yaa tjen ngʼajmi koatexomani kʼoa kʼoéjna ngantsjai nichxin (Daniel 2:44). Je xi Rey sʼin tíjna jé Jesucristo (Isaías 9:​6, 7; Mateo 28:18). Kui chjotaxáb jebi xi kisikʼaxki̱ Jesús kʼianga kitsoyale chjotale josʼin kʼoetsʼoa (Mateo 6:​9, 10). Tojngoo chjotaxá koatexomale ngatsʼi chjota kʼoa je xi koasentítjon jé Jesús.

Je Jesús alikui kʼoasʼin josʼín je chjotaxá nga toje mele nda batio. Nga kixi je Jesús kʼoa nga tsín ʼya xi bʼasjengi kuenta sʼin ngatsʼi chjota. Tongósonsʼin skoe̱kon ninga kjaʼaísʼin tsen yaole, tojme én male kʼoa tojñani tsʼe (Isaías 11:​3, 4). Alijme xi tisitoánntjaini chjota nga̱ nda koatio ngatsʼi. Je Jesús “kʼoasjentjainí je xi ma̱ tísíjchá yaole xi sijéle nganʼio kʼoa kao xi nangitokon ma kʼoa toʼyani xi tsínle xi basenkao [ . . . ]. Kʼoasjentjai xi tʼatsʼe kjoatsʼen kʼoa nga taon ʼya” (Salmo 72:​12-14).

Je Chjotaxále Niná sixkoaa ngayeje ki̱cha̱ kjoajchán xi síchjén chjota nga síkʼien xínkjín (Miqueas 4:3). Kʼoati kjoaʼaxin je chjota xi tsín mele sikʼantjaiya yaole nga kjoatsʼen tsjoake (Salmo 37:​9, 10). Alikui tijme xi sikjáojinni je chjota tojñani kʼoétsoma (Ezequiel 34:28).

Nga jekoatexoma Chjotaxále Niná ñaki nda kuiyoaa. Tjóxin ngayeje xi kjoa síkatíojinná, jolani nga ma̱ tinijchá yaoná, nga tsín sokóná jmeni xi chinee kʼoa nga tsínná ndʼia. Nga kʼia toxkia sʼee tsojmi xi chi̱nee kʼoa sʼeená ndʼia xi kuiyoʼyá (Salmo 72:16; Isaías 65:​21-23).

Nga jekoatexoma Chjotaxále Niná tjóxin ngayeje kjoa xi síkatíojinná nga kjoajchán ma, jolani nga miʼaon je chjota, nga síkjáojin kʼoa nga tsínti nda satíoni kon. Kʼoa je xi jekʼien kjoaʼáya ijngokʼanile (Isaías 25:8; 26:19; 35:​5, 6). Yaa ñatjen koatio ijngokʼa kao xínkjín kʼoa alikui tikui kjoaʼaítsjennile jme kjoa xi tsakatiojin kʼianga kjoajchán koan (Apocalipsis 21:4).

JE NINÁ KJOAʼAXIN JE JÉE

Je chjota xi koatio nga koatexoma je Chjotaxále Niná tojé Jeobác skoe̱xkón, je Niná xi síkinjenyʼánjin ni̱ma̱ná, kʼoa xi tsʼe kjoatjaocha (2 Corintios 13:11). Nga kʼia, je chjota nda koatiokao xínkjín (Isaías 2:​3, 4; 11:9). Je xi sitjosonle Niná alikui tichjotajée koa̱nni (Romanos 8:​20, 21).

JE NINÁ KJOAʼAXIN JE NA̱I KAO SÉNNICHXIN XI CHʼAO KJOAN

Je Chjotaxále Niná kjoaʼaxin je Na̱i kao sénnichxin xi chʼao kjoan ánni nga tsínti kʼoakʼoeni kjoafaʼaitsjenle chjota nga kjoajchán katabatío (Apocalipsis 20:​1-3, 10). Nga jetjóxin je Na̱i kao je sénnichxin xi chʼao kjoan “nʼio tse kjoanyʼán sʼe̱” (Salmo 72:7).

Je Niná sitjoson jmeni xi tso, nga kjoaʼaxin kjoajchán kao kjoasi, tojé xi koa̱nle kʼoasʼin kʼoa mele kʼoasʼin.

• Je Niná tjínle nganʼio nga kjoaʼaxin kjoajchán kao kjoasi (Job 9:4). Je Niná alijme xi ñʼai male nga kʼoasʼín (Job 42:2).

• Je Niná alikui sasénle nga kjoañʼai faʼá chjota (Isaías 63:9). “Kʼoa jtike je xi kjoatsʼen tsjoake” (Salmo 11:5).

• Je Niná sítjoson jmeni xi tso, alikui bʼéndiso (Isaías 55:​10, 11; Tito 1:2).