Humanu

Isareu Ywania Meiũran Hap Etiat

11 Miꞌi pote apo are ehepe sio Tupana Iuteuria kyꞌe te sio yt sio toiꞌatupugha sio waureꞌe raꞌyn Iuteuria ywania kai temiitꞌin kai sio yt i te areꞌe. Yt rat paĩ toiꞌatukyꞌe kahato te miꞌiria e. Uito ti mekewat Iuteuria ywania kaipywiat hat pote atikuap kahato urukyꞌe hap paĩ. Atikuap kahato Tupana yt uruwaure hin i te hap. Uhaꞌaseꞌi pot ti mekewat Tupana mohey hat akag sese Aparãu are. Pywo ti rat uhaꞌaseꞌi Pesami ti Aparãu emiariru toineꞌen saꞌawyꞌi. 2 Yt karãpe i aru Tupana tiꞌatoiat temiitꞌin sese Iuteuria ywania e. Katupono toiꞌairo miꞌiria toꞌywania wo wuatꞌi eꞌyian mete. Saꞌawyꞌi Tupana ehay moherep hat Eria toꞌe Tupana pe tomiwan me -Uruꞌywania yt naku i kahato e. Taꞌatunug saꞌag kahato yne emikyꞌesat koꞌi ete e. 3 Taꞌatuꞌuka kahato emipoꞌoro ehay moherep hanuaria e. Yt naku i aikope aikope emiitꞌin tunug emotypot hamuat aikope aikope taꞌatuwuk taꞌatuhũria emotypot hamo miꞌiria kape tõꞌẽ kahato uruꞌywania waĩ taꞌatuꞌe hamo e. Taꞌatupugha emotypot yat koꞌi e. Taꞌatuꞌaporok yne emotypot yat e. Taꞌatumoma teran yne emiit emipoꞌoro koꞌi e. Pywo ti rat Tupana mesup taꞌyn uikat kahato uiꞌauka hamo e tomiwan me. Uito yn ni emiit sese mesuwarote areineꞌen Iuteuria pyꞌasetpe pote e Eria saꞌawyꞌi Tupana pe. 4 Miꞌi hawyi Tupana tiwesat -Eria e yt en yn i uimotypot hat itote katupono uhemiitꞌin sese uhehay moherep haria tukupteꞌen ne 7 miu miit itote uimotypot haria sok yt karãpiat i tupanaria neꞌi motypot haria miꞌiria e. Yt taꞌatumotypot hin i mekewat tupana iãꞌãkap Paau e hap het rakat. Yt en yn hin i uimotypot hat topyhuꞌat itote e Tupana Eria pe. 5 Miꞌi hap ewy Tupana toꞌe mesup Isareu ywania etiat uruepe yt iꞌatu i wen iꞌewyte Iesui mohey haria maꞌato tukupteꞌen ne Iuteuria ywania uimiꞌairoria e Tupana uruepe katupono ahoꞌoꞌekyi raꞌyn uhowowi miꞌi ywania kaipyi ipatꞌok hit ihakyꞌeꞌi uhepiat rakaria katupono paa are hawyi ahoꞌoꞌekyi heĩpyt uhowowi e Tupana. 6 Ahoꞌoꞌairo miꞌiria uhepiat iꞌatukyꞌe hap ete katupono iꞌatuehakyꞌeꞌi uhepiat hap kaipyi atunug miꞌiria uhemiitꞌin no e. Yt iꞌatuminug wakuap upi hin i atiꞌatuꞌairo miꞌiria e. Uiwepyi atiꞌatuꞌairo miꞌiria uipyꞌa pyi e Tupana. Miꞌi hap ewy koitywy Tupana aiꞌairo yt aiminug wakuap upi hin i maꞌato tuwepyi aiꞌairo haty wo aikyꞌe haype yt kat i watunug wakuap pykai ahehakyꞌeꞌi pote. Maꞌato wakuaria aito hawyi ahewaku hap upi aikyꞌe watoꞌe pote miꞌi ti yt pywo pe i katupono watoineꞌen tewanikap mo turan hap eꞌat pe aikyꞌe. 7 Pyno Aito Tupana mohey haria watopyhuꞌat aikyꞌe hap kaipyi hawyi Tupana mowakuaria watoineꞌen. Koitywy aimikuap muap Tupana kapiat Iuteuria ywania tikat kahato. Isareu ywania tikyꞌesat kahato Tupana piat -Waku eipe e hap maꞌato miꞌiria yt ipuẽti i katupono teꞌeruwepyi taꞌatunug Tupana kapiat yt muap i. Miꞌi pykai Tupana toꞌe kahato iꞌatuepe -Uhaꞌyru mohey hap upi ro uipuẽti e maꞌato yt iꞌatuꞌe Tupana ihay aat kaꞌap pykai. Meiũran teꞌeruwewaurehik taꞌyn maꞌato kurin kurin ipuẽti uiꞌywania Iuteuria kawiat. Taꞌi imiꞌairoria yn ipuẽti. 8 Aikotã toꞌe miwan me hap ewy -Yt yt iꞌatuꞌe hawyi -Pyno waku eweikupteꞌen yt iweꞌeg i rakaria wo waku eweikupteꞌen ipyꞌa heg nakaria wo e. Pyno eweikupteꞌen yt ikuap kuap takaria wo i e Tupana Iuteuria pe. Miꞌi pote mesup eꞌat pe e -Iuteuria yt ikuap kuap i pywuat sehay Iesui ehay moherep haria henoi iꞌatuehamo pykai yt putꞌok e i iꞌatupyꞌa pe. Tupana ehay miwan miat teꞌeraꞌakasa hawyi teke iꞌatueha py pe maꞌato yt putꞌok e i iꞌatupyꞌa pe. 9 Yt taꞌatumohey teran i rakaria Iuteuria aikotã miwan me morekuat Tawi toꞌe hap ewy -Tupana uruꞌywania yt emohey teran i pote waku etunug iheg me iꞌatuenuk hap ewamiri kape hap ewy waku iꞌatuenuk hap topyhuꞌat iꞌatuꞌauka hap e. Waku iꞌatupuꞌap tote ehewãhik yi kaꞌa iꞌatuꞌat hamo iꞌatuminug saꞌag upi iꞌatuꞌapiheg hamo e Tawi. 10 Waku etiꞌatueha py sasep miꞌiria yt emohey teran i haria pote e. Waku etiꞌatuewaure kaꞌa hik iꞌatuwoꞌokakꞌi hap pupi e. Waku myk puo yne miꞌiria yt emohey teran hin i pote e morekuat Tawi Tupana pe tuwepy hawe.

Isareu Ywania Yt Taꞌatukyꞌesat Tupana Mohey Hap Sese

11 Uruꞌywania Iuteuria iꞌaparap kahato Tupana kapiat muap kuap hap ete aikotã miit taꞌat yihot pe hap ewy yt ihapytig i pote e. Maꞌato miꞌi pykai atuꞌaparap pykai Tupana yt tiꞌatuwaure hin i -Atomog aru miꞌiria e. Yt karãpe i aru worohoꞌoꞌatoiat uiꞌatoiat eipe pykai e. Yt eweikyꞌesat i ehehakyeraꞌat uhepiat hap pote atum iraniaꞌin ywania yi totiaria pe. Miꞌi atunug hawyi iraniaꞌin ywania etiat ihayꞌywyi rakaria wo eweikupteꞌen katupono uimiehakyeraꞌat koꞌi wo tukupteꞌen miꞌiria uimepytꞌin koꞌi wo e Tupana Iuteuria pe. 12 Uruꞌywania Tupana piat taꞌatupoityro hap pun haria taꞌatuꞌaparap kahato Tupana imiium taꞌatuehakyeraꞌat hamuat ete. Yt taꞌatukyꞌesat i hawyi ihakyꞌeꞌi rakaria ewy tukupteꞌen mesuwe. Katupono pya kahato Tupana kai tukupteꞌen. Uruꞌywania mipun iraniaꞌin ywania ewy topyhuꞌat. Miꞌi hawyi koitywy iraniaꞌin ywania Tupana mipoityro wo tukupteꞌen aikotã Tupana Paꞌãu kuap haria wo. Taꞌatumohey Tupana hawyi Tupana mihuꞌi huꞌi koꞌi wo tukupteꞌen. Maꞌato meiũran aru Iuteuria ywania urutoria yne Iesui mohey haria wo urutukupteꞌen aru imiꞌairoria oktan aikotã iraniaꞌin ywania mesuwat yi tote wẽtup sok yn watukupteꞌen hap ewy. Miꞌi hap eꞌat pe Tupana mipoityro koꞌi yne miitꞌin. Miꞌi pote mesuwat yi yne Tupana mipoityro wo topyhuꞌat. Waku kahato miꞌi hap eꞌat topyhuꞌat waku sakpo e.

13 Pyno koitywy uhehay teran eiwywo iraniaꞌin ywania yt uruꞌywania i yt Iuteuria i koꞌi kape uhehay teran. Saꞌawyꞌi Tupana uikay kay eimuꞌe hamo tehay moherep ehepiat hamo uiꞌairo Tupana. Yt Iuteuria i pe Tupana ehay moherep hat kahato uito maꞌato Tupana ehay moherep wẽtup ywania piat hat uito. Yt aremoti hin i mesuwat motpap nug hamo. Waku kahato atipuẽti uiꞌairo hap. 14 Yt atiwaure i uruꞌywania maꞌato ahãꞌãg kahato iꞌatuehakyeraꞌat hap nug hamo. Uiꞌywania tehaꞌat uiminug iraniaꞌin ywania muꞌe hap kape hawyi atikyꞌesat iꞌatuesyꞌat rakaria ewy teꞌeropyhuꞌat iꞌatupyꞌa piat Iesui mohey hap kyewi yt kat i Tupana poityro hap iꞌatukai pote. Taꞌatukuap iraniaꞌin poityro hap hawyi atikyꞌesat taꞌatukat kahato Iuteuria poityro hap iꞌatuehayꞌywyi hap kaipyi. Miꞌi hap atikyꞌesat kahato. 15 Saꞌawyꞌi -Yt uruikyꞌesat i En uruporekuat no iꞌatuꞌe Iesui pe. Miꞌi pote Tupana tuwemorem iꞌatuewowi uruꞌywania pyi hawyi. -Pyno yt taꞌatukyꞌesat i En pote uruikyꞌesat En uruporekuat no iꞌatuꞌe iraniaꞌin ywania Iesui pe. Miꞌi pote koitywy iraniaꞌin ywania tukupteꞌen Tupana wyꞌoktia wo kahato maꞌato meiũran aru uruꞌywania teꞌeruwemorem i raꞌyn -Uruikyꞌesat En uruporekuat no iꞌatuꞌe aru Iesui pe hawyi -Pyno uiwatnuaria eipe e Tupana aru iꞌatuepe uiwatnuaria i raꞌyn eipe e. Iꞌatupap i raꞌyn Iesui upi uruꞌywania. Mekewat eꞌat pe aru wakuap kahato topyhuꞌat mesuwarote aikotã guꞌuro pyi worohenotem hap waku kahato hap ewy e.

16 Pyno ahenoi teran iãꞌãkap ewy uruꞌywania ete. Worohoꞌoium aimikoi mani Tupana kape pote aimiium kaipyi topyhuꞌat Tupana watno uꞌi. Miꞌi pote Aparãu topyhuꞌat aimisoꞌoium aimikoi aiko pywiat ewy. Miꞌi hawyi Iuteuria topyhuꞌat uꞌi mani kaipywiat ewy. Pyno wẽtup sehay iãꞌãkap wuo ahenoi teran ehepe. Karãpe watikoi kat ypia iꞌyp watum Tupana kape pote miꞌi hawyi haga ete topyhuꞌat Tupana wat yne. Iꞌyp hapo topyhuꞌat Aparãu ewy miaria urueꞌyianmiaria uruꞌywania Iuteuria tukupteꞌen haga ewy. 17 Uruetama puo toineꞌen Uriweiria yp koꞌi urumikoi wakuaria kahato iꞌewyte toineꞌen Uriweiria yp gaꞌapy piat nop sese rakaria Uriweiria ran urutoꞌe. Miꞌi yp ewywuat kahato eiperia Humanu ywania. Uruto Iuteuria mekewat Uriweiria yp sese ewywuaria. Haꞌawytepyi uruikuap Tupana sese maꞌato eiperia Humanu ywania yne tupanaria mohey haria eipe. Saꞌawyꞌi te wuat tupana iãꞌãkap mohey haria mesuwat yi totiat yt Iuteuria i koꞌi tukupteꞌen aikotã mekewat Uriweiria ran yp nop takat ewy maꞌato uruto Iuteuria yt ikyꞌesat i Iesui uruporekuat no hawyi Uriweiria yp sese yp pikꞌe hap ewy yp tek hap ewy urutukupteꞌen. Miꞌi hawyi Tupana tipag iraniaꞌin ywania itote haga howapy piat ewy. Miꞌi hawyi satꞌe koitywy haat kahato iraniaꞌin ywania kat pote iꞌypy Iuteuria ywania kaipyi haga ewy iraniaꞌin ywania. 18 Yt etimohit reiꞌo ehay wo Iuteuria ywania. Yt ereineꞌen neiꞌo haiwot iꞌatuetiat rakatno katupono hatek hap ewy Uriweiria yp tek hap ewy tukupteꞌen. Yt ereꞌe teiꞌo -Uruwehay pyi urutuwenug uruto poꞌog Iuteuria kai yt eweiꞌe teiꞌo. Mio tã eweiꞌe pote yt eiweꞌeg hin i kat pote haga yt haat kuap i yt iꞌypyꞌa ete i pote katupono yt tuwemosat kuap i yt iꞌypyꞌa i pote. Yt naku i haga toꞌe iꞌypy kape -Yt naku i en e miꞌi hap ewy yt watoꞌe kuap i Iuteuria ywania pe -Yt kat hamo i eipe katupono miꞌiria tukupteꞌen hapo sese ewywuat iꞌypy ewy maꞌato iraniaꞌin gaꞌapy piat Uriweiria ypia nop takaria ewy. 19 Maꞌato iraniaꞌin teꞌeroꞌe -Toitek haga saꞌag nakat miꞌi hawyi watipehik poꞌog waku rakat haga totopag itote iꞌatuꞌe saꞌag. Miꞌi hap ewy urutukupteꞌen. Toihep Iuteuria haga potꞌi ewy hawyi uruto urupehik itote waku poꞌog nakaria uruto pote iꞌatuꞌe saꞌag yt pywo pe hin i iꞌatuꞌe iraniaꞌin. 20 Pywo ti toihep Iuteuria aikotã haga watihep hap ewy maꞌato yt iꞌatuminug saꞌag myi i toihep maꞌato yt taꞌatumohey i Tosaꞌyru pote. Miꞌi hawyi totopag eipe aikotã haga watipehik hap ewy Haꞌyru mohey haria eipe pote. Yt naku i eiwanetup hawe -Uruto poꞌog Iuteuria kai eweiꞌe eiwanetup hawe. Waku poꞌog paa eweiꞌe -Tupana kat pote uruꞌairo ewatnuat poꞌog waku watoꞌe. Taꞌi Haꞌyru mohey haria aito pote uruꞌairo waku watoꞌe yn kat pote yt ahewaku hap upi i ahehakyeraꞌat. 21 Taꞌi yt tomohey poꞌog i hap upi toihep Iuteuria haga sese ikahu rakat pykai toihep aikotã Uriweiria yp haga sese rakat ewywuat. Pyno eipe Uriweiria yp aga ran kahato ewywuat eweikupteꞌen. Pyno Iuteuria ewy yt eweimohey poꞌog i pote eipe iꞌewyte eihep. 22 Iwese kahato Tupana maꞌato towese pykai aiꞌapiheg kuap mekewat toꞌywania sese Iuteuria yt tomohey poꞌog i raꞌyn hawyi toiꞌatuhep toiꞌatuꞌapiheg naꞌyn. Miꞌi tupono eipe yt toꞌywania sese i Tosaꞌyru mohey haria pote topyhuꞌat iwese rakatno ehete maꞌato meiũran eweipun iwese hap pote yt eweimohey i aikotã tutunug toꞌywania hap ewy aikotã haga watihep hap ewy te toihep eipe e. 23 Maꞌato meiũran aru toꞌywania Iuteuria Haꞌyru mohey haria tukupteꞌen mote miꞌi hawyi tohytmoĩ i raꞌyn mekewat aikotã tomihep hap tote te Iuteu ywania tomohey sese i raꞌyn hawyi. Taꞌi Tupana tiꞌatupehik kuap kahato Iuteu ywania i raꞌyn toꞌyp etiat neꞌi pote. Eipe yt Iuteuria hin i. 24 Eipe ti Humanuꞌin koꞌi eipe wẽtup pusu kuap haria. Eipe eweikupteꞌen aikotã Uriweiria yp haiwot rakat ewywuat aikotã haga Uriweiria ran ewy. Aikotã imihep haga hawyi totopag wẽtup yp tote tomihep saipepiatno hap ewywuat. Toihep eipe haga ran hawyi toipehik Uriweiria yp sese wakuat ete raꞌyn hap ewy mekewat Uriweiria he rakat hewo kahato aimiꞌu wuat rakat ewy Iuteuria tukupteꞌen. Niatpo kahato watopag wẽtup yp kaipyi haga hap wẽtup yp kape. Watunug kuap i maꞌato niatpo kahato. Yt niatpo hin i iwat haga te watopag hap tote wẽtup yp kaipywiat yn naꞌyn haga iꞌewyte hapo pote yt niatpo i miꞌi ewywuat eihep eipe hawyi totopag Iuteuria towat toꞌyp ete sese raꞌyn hap ewy yt niatpo hin i totopag.

25 Koitywy ehepe iraniaꞌin ywania pe atimoherep teran Tupana ehay ehepe yt uwe mikuap i te hap. Miꞌi eweikuap hawyi yt eweiꞌe kuap i -Uruto poꞌog weꞌeg haria ywania Iuteuria kawiat e hap. Koitywy Iuteuria yt timohey kahato i Tupana Mipoꞌoro Aiporekuat nuat Iesui iꞌatupyꞌa heg kahato rakaria pote maꞌato meiũran aru paa iꞌatuꞌe hawyi taꞌatukyꞌesat kahato imohey hap. Koitywy yt taꞌatukyꞌesat i pote -Pyno atiꞌatuehakyeraꞌat iraniaꞌin ywania taꞌatumohey kahato Uimipoꞌoro Iesui Iꞌatuporekuat nuat pote e Tupana. Meiũran aru yt uwe i eipe Tupana Mipoꞌoro Aiporekuat nuat mohey haria hawyi yt uwe i poꞌog ikyꞌesat hawyi mekewat eꞌat pe ti uimiꞌairoria Iuteuria iꞌatupap i raꞌyn imohey hap ete miꞌi hap eꞌat pe yt niatpo hin i tuwehytꞌok Uhaꞌyru mohey hawe e. Katupono miꞌiria tukupteꞌen Uriweiria yp haga sese koꞌi ewy e Tupana ahepe. 26 Taꞌi Iuteu ywania aru topyhuꞌat Iesui mohey haria aikotã saꞌawyꞌi Tupana ehay moherep haria teꞌeroꞌe taꞌatumiwan me hap ewy topyhuꞌat aru. Mio tã e Tupana -Meiũran aru atipoꞌoro Iuteuria ehakyeraꞌat hat sese e. Tuwẽtem aru tawa Ierusarẽi yityꞌok Siãu tote pyi. Tuwemoherep yityꞌok Siãu tote hawyi toiꞌatuhep taꞌyn yne iꞌatuminug saꞌag koꞌi Iuteuria watnuat. Yne iꞌatuminug koꞌi yt Tupana ewywuat koꞌi i toimoweityk yne. Mekewat aseꞌi Iako emiariru emiariru koꞌi iminug saꞌag koꞌi toiporeraꞌat yne iꞌatuehakyeraꞌat hamuat e Tupana. 27 Atunug aru sehay iꞌatuwywo waku uiꞌe hap aikotã areꞌe atunug aru uiꞌe hap ewy. Mekewat eꞌat atiꞌatumoweityk yne iꞌatuminug uhetiat iꞌatuminug saꞌag koꞌi hap mekewat eꞌat pe e Tupana temiit Ieremia miwan me 31.31 pe. 28 Koitywy Iuteuria tunug naꞌyn Tupana taꞌatuewanikap wo katupono taꞌatupun neꞌen neꞌi yne mekewat sehay wakuat Iesui etiat. Miꞌi pote yt atiꞌatuehakyeraꞌat kuap i miꞌiria e Tupana mesup iꞌatuepe. Maꞌato yt eweiwaure teiꞌo Tupana Mipoꞌoro Aiporekuat nuat miꞌiria ewy. Koitywy tukupteꞌen ne Tupana e hap saꞌawyꞌi wuat Aparãu Isaki Iako kapiat hap ewy. Miꞌi pote toꞌywania towyriaꞌin ne miꞌiria tukupteꞌen Tupana miꞌairoria. Koitywy eweipyhuꞌat raꞌyn Tupana wy koꞌi aikotã Iako kape hap ewy. Maꞌato toꞌywania iwyriaꞌin ne miꞌiria tukupteꞌen ne. 29 Aikotã toꞌe saꞌawyꞌi tomohey saꞌawyꞌi haria pe. 30 Pyno eipe wẽtup ywania koꞌi yt Iuteuria ywania i. Saꞌawyꞌi yt kat i Tupana mikyꞌesat nug haria eipe maꞌato mesup Tupana miꞌatukyꞌe kahato wo eweikupteꞌen. Pyno yt worohoꞌoꞌapiheg hin i e ehepe katupono uimohey haria mesup. Atum neꞌen neꞌi ehepe Iuteuria poityro hap koꞌi katupono Iuteuria yt iꞌatupap i uimikyꞌesat nug hap ete e Tupana mesup ehepe yt Iuteuria i pe. 31 Pyno koitywy Iuteuria yt teꞌeropyhuꞌat i Tupana kai maꞌato tuut aru wẽtup eꞌat hawyi paa iꞌatuꞌe. Miꞌi hap eꞌat pe tukupteꞌen hakyꞌeꞌi koꞌi eiꞌewy tukupteꞌen aru Iuteuria. Meiũran -Uruehakyeraꞌat Tupana iꞌatuꞌe haria eiꞌewy teꞌeropyhuꞌat. 32 Pyno Tupana toꞌe wuatꞌi ywania pe -Eipe torannia yt uimikyꞌesat koꞌi nug haria i e miꞌi pote hoꞌowasat rakaria sese wo eweikupteꞌen eiminug saꞌag pyꞌasetpe eweikupteꞌen. Eheko saꞌag po pe eweikupteꞌen iheg me hap ewy. Miꞌi tã e Tupana pykai -Meiũran wuare wo areineꞌen eiminug saꞌag koꞌi kai e. Worohoꞌokyꞌe haype Uhaꞌyru mohey haria e wuatꞌi ywania pe.

33 Miꞌi hawyi mio tã toꞌe saꞌawyꞌi Tupana ehay moherep hat Isaia -Wakuat kahato tig Tupana. Wakuat sese kahato En. Urutuwanetup kahato hawyi yt uruikuap hin i ekuap hap koꞌi eweꞌeg hap koꞌi e. Kurin kurin uruikuap ewakuap sese hap kaipyi ewato hap sese hap ete e. Eweꞌeg hap iwato kahato. Ekuap hap poꞌog wuatꞌi kai e. Yt uwe i uruto aikotã etunug hap ikuap kat pote etunug aikope aikope ewyry hap upi e. Kat som etunug yt uwe i uruto uruikuap yt uruikuap kuap i kahato e. 34 Aikotã toꞌe miwan me -Uwe uwe mesuwat yi tote Tupana kuap hat topyhuꞌat e. Yt uwe i mesuwat yi tote Tupana napin kuap hat yt uwe i paĩ e Isaia miwan me 40.13 pe. 35 Taꞌi Tupana yt ahepiat weteweru hat i. Yt watunug kuap i Tupana aimiium kaipywiat weteweru hatno. 36 Katupono aikope aikope toineꞌen kat koꞌi kat koꞌi sio heremo sio yt Tupana tunug yne miꞌi yt kat kawiat i tutunug. Tuwekaipyi tutunug yne yne. Iꞌewyte yne mesuwat yi tote toineꞌen katupono Tupana imoieineꞌen pote. Tesaika hap kaipyi tutunug yne tomotypot hamuat yne yne iminug koꞌi. Miꞌi pote -Urutuwehum kahato ewowi Tupana urutoꞌe. Waku kahato En waku kahato En urutoꞌe epe Tupana.