Humanu

Heineꞌen Pakup I Hap Etiat

12 Uheꞌywytꞌin uheꞌykeꞌetꞌin uheinytꞌin yt ahewaku hin pykai i Tupana aikyꞌe -Yt atiꞌatuꞌapiheg teran i miꞌiria e tuwepe ahetiat pe. Tupana miꞌatukyꞌe eipe pote ahẽtup ehepe uheꞌykeꞌetꞌin uheinytꞌin Iesui mohey haria Tupana eikyꞌe pote ewetum no eipiit tope eweikupteꞌen kahato imotypot haria wo. Aikotã saꞌawyꞌi wuaria tiꞌauka taꞌatuhũria Tupana motypot hamo hap ewy waku ewetum eipiit Tupana kape Tupana potpap nug hamo. Waku eheineꞌen hap imikyꞌesat ewy imotypot hap yn topyhuꞌat. Waku eipiit pyi tuwẽtem sehay Tupana motypot hap yn Tupana ewaku hap oktan aikotã waku watunug hap ewy. Aikaꞌiwat wakuat kahato pote waku watopyhuꞌat heropat sese haria wo. 2 Waku watum aipiit Tupana kape. Yt naku i watunug ne aikotã mesuwarotiat Tupana yt kuap i haria wanetup saꞌag hap ewy ainapin saꞌag ewywuat. Yt naku i watuwat iꞌatuehay upi kat koꞌi kat koꞌi saꞌag nug hamo. Waku poꞌog watoꞌe Tupana kape -Etihep uiwanetup hap wyi mesuwarotiat saꞌag wanetup hap hawyi uiwanetup hap etimopakup i ewat ewywuat. Uipyꞌa pe uiꞌakag me uipiit pe uiwanetup hawe ereineꞌen Tupana uipytꞌat nug hatno. Miꞌi hawyi ewanetup hap eiam mo areineꞌen neran. Mio tã eweiꞌe Tupana pe pote eweikuap kuap Tupana mikyꞌesat koꞌi kat som tutunug neran hap nug hamo. Kat som imowepiit hap kat som hãpyk sese imikyꞌesat ewywuat hap mio tã eweiꞌe Tupana pe pote.

3 Pyno uito Pauru Tupana uipoꞌoro einapin hamo. Tupana hegyiꞌat kahato hawyi uinug eimuꞌe hatno miꞌi pote worohoꞌonapin eipe. Yt naku i aiwanetup hawe -Uito poꞌog torannia kai aiꞌe hap kape. Waku -Uito en watoꞌoꞌewy kahato watoꞌe. Katupono aito wẽtup ok poꞌog imohey wẽtup ok yt maꞌato wẽtup sok yn aito pykai. Miꞌi pote yt ereꞌe kuap i -Uito poꞌog eikai hap ete. 4 Aipiit ete iꞌatu kahato ahaga maꞌato aipiit wẽtup yn toineꞌen. Miꞌi hawyi ahaga koꞌi yt toꞌoꞌewy hin i aipiit mikyꞌesat motpap nug hap ete. 5 Miꞌi hap ewy kahato Iesui mohey haria koꞌi. Iꞌatu kahato aitoria yt aiwoꞌoꞌewy i maꞌato wẽtup piit ewywuat yn watopyhuꞌat. Iesui Tupana Mipoꞌoro Aiporekuat nuat piit ewywuat watopyhuꞌat mesuwe aikotã aipiit ahaga wywo toꞌosat toꞌosat hap yt toꞌoꞌewy hin i pykai. Miꞌi hap ewy watoꞌosat kahato Iesui mohey haria koꞌi Iesui piit ewy wẽtup piit ewy watoineꞌen. 6 Pyno wẽtup ok imohey hat pe Tupana tum tesaika hap topotpap nug hamuat maꞌato wẽtup ok pe wẽtup sepap hap tutum. Yt toꞌoꞌewy hin i tutum ahepe aimikuap koꞌi aimisepap nug hap koꞌi. Maꞌato Tupana tum yne miꞌi koꞌi ahepe tegyiꞌat pote haype. Tutum neꞌen neꞌi yt kat saꞌup i. Wẽtup ok pe tutum tesaika hap tehay moherep hamuat. Tutum ahepe pote pyno waku watimoherep ihay imohey hap mywo imohey hap oktan. 7 Maꞌato tutum ahepe tesaika hap teropat hap miitꞌin powyro hamo pote waku watuwepotpap kahato heropat nug hap ete. Maꞌato tutum ahepe miitꞌin muꞌe kuap hap miꞌi pote waku watiꞌatumuꞌe miitꞌin hesaika hap wywo. 8 Maꞌato tutum ahepe tesaika hap miitꞌin mowepiit hamuat miitꞌin arotꞌi potiat iꞌatuhep hamuat miꞌi pote etiꞌatumowepiit ro hatek takaria hoꞌopot haria. Maꞌato tutum ahepe tegyiꞌat hap miitꞌin powyro hamuat aimiium kaipyi pote waku watopyhuꞌat hegyiꞌat kahato miꞌi hap wywo. Tupana ainug miitꞌin akag wo pote waku ahemiitꞌin kyꞌe hap wywo watipowyro hãpyk takat ewy. Tupana ainug miitꞌin powyro hatno pote waku watum kat koꞌi kat koꞌi satek takaria pe iꞌatukyꞌe hap wywo.

Waku Haiwot Rakaria Watopyhuꞌat Aiminug Saꞌag Ete

9 Karãpe watiꞌatukyꞌe miitꞌin pote waku watiꞌatukyꞌe kahato aipyꞌa pyi yt kat aheso hap wywo i. Waku watopyhuꞌat haiwot rakat ewy maꞌato yt miitꞌin ete i. Waku ahaiwot rakaria ewy watopyhuꞌat aiminug saꞌag hap koꞌi ete. Maꞌato waku watikyꞌesat kahato waku nug hap koꞌi. Yne wakuat waku watat maꞌato yt naku i hap waku watipun. 10 Waku woꞌokyꞌe haria wo watoineꞌen aikotã wẽtup ywania toꞌokyꞌe kahato hap ewy. Aikotã aheinytꞌin aheywytꞌin aheykeꞌetꞌin aiꞌywotꞌin aityꞌin toꞌokyꞌe kahato hap ewy aiwese hap wywo. Waku watoꞌokyꞌe katupono Tupana Mipoꞌoro mohey haria aito. Iesui eropat haria aito miꞌi pote waku watikat kahato aikotã waku watoꞌomotypot hamuat. Waku watoꞌe aiwanetup hawe -En ni waku. Miꞌi ti waku watoꞌe. 11 Yt iperup takaria ewy i waku watopyhuꞌat. Waku watuwepotpap aat hakup wywo. Yt ereineꞌen neiꞌo sẽtup e hatno. Aikaꞌiwat eropat hat sese wo waku watoineꞌen. Waku aipyꞌa pyi Aikaꞌiwat mowepiit hap yn aiwanetup hawe ipotpap nug hap ete. 12 Tupana tunug aru toꞌe hap ewy paĩ an watoꞌe. Mio tã watoꞌe pote aimowepiit hap topyhuꞌat aikotã Tupana wepiit hap ewy. Watimohey pote putꞌok e ahete hoꞌopot hap niatpo kahato hap. Miꞌi hawyi waku watoineꞌen motꞌi aiperup i hap wywo. Waku wahekatup tokosap aru hap -Yt watoiat hin i imohey hap aiꞌe hap wywo. Miꞌi pykai waku ahehay Tupana wywo aat kaꞌap aikope aikope ahewyry hap upi. 13 Waku hegyiꞌat rakaria wo watoineꞌen ahekat wywo. Waku watimoꞌẽ ahekat iraniaꞌin me hatek takaria pe -Iesui mohey haria eweikupteꞌen uruwywo eweiꞌe iraniaꞌin yt aimikuap i koꞌi pe pykai. Iesui mohey haria miꞌiria pote waku mio tã watoꞌe õꞌẽ haria yt uwe mikuap i koꞌi pe. 14 Karãpe wẽtup ok ihay saꞌag ahete pote waku wahẽtup Tupana ewowi -Tupana etipoityro ro mesuwat uhewanikap uinug neran ne tewanikap wuat hat watoꞌe. Taꞌi yt atikyꞌesat i iꞌapiheg hap watoꞌe Tupana pe. Maꞌato yt naku i haiwot rakaria wo watopyhuꞌat ahatyꞌi hatyꞌi haria ete. Yt naku i wateromopusu miꞌiria yt naku i iminug upi. Yt naku i watuwepoepyk aimosatyꞌi satyꞌi haria. 15 Karãpe wẽtup ok putꞌok e ahete iwepiit kahato pote waku watuwemowepiit iwywo. Maꞌato karãpe wẽtup ok putꞌok e ahete tuwak taꞌarotꞌi hap wywo miꞌi pote waku watuwemowak iwywo. 16 Yt naku i ipatꞌok ete aiwese ipatꞌok ete yt. Karãpe putꞌok e ahete motpap hap yt aimikyꞌesat ewy i miitꞌin emiit minug hap ewy pote waku watunug aimisakup hap wywo iꞌatuꞌakag wo watopyhuꞌat pykai. -Uito poꞌog mote yt naku i uipotpap aikotã miit emiit ewy yt naku i watoꞌe. 17 Karãpe wẽtup ok tunug saꞌag kahato ehete yt eweipoepyk teiꞌo. Yt etunug neiꞌo miꞌi hat ete aikotã tutunug saꞌag hap ewy te maꞌato etipoepyk waku puo wakuap mo. Waku watunug yne yne yt kat i miitꞌin maꞌat hap aikai yt kat i aheso hap wywo. Miꞌi hawyi miitꞌin tikuap taꞌyn yt kat i taꞌatumaꞌat hap aikai. 18 Waku wahãꞌãg yne ahesaika hap koꞌi wo miitꞌin iperup i kahato iwese kahato rakatno iraniaꞌin yt iꞌatuwese i rakaria wo tukupteꞌen pykai. Waku aito iwese rakatno. Yt naku i watuꞌuka iraniaꞌin wywo sehay wo maꞌato woꞌokyꞌe hap yn waku watikat. 19 Yt naku i watipoepyk uhetiat yt naku i nug haria. Uiwyriaꞌin wẽtup ok aimaꞌat pote yt naku i watopyhuꞌat aipyꞌahak. Poꞌog waku wahenoi Tupana kape miꞌi pote Tupana ipyꞌahak aikawiatno hamo katupono mio tã e Tupana miwan me -Atiꞌatukawiatno yne eipe. Eipoepyk hat uito e Tupana miwan me. 20 Yt naku i watuwepoepyk uiwyriaꞌin. Tupana yt tikyꞌesat i kat pote toꞌe miwan me -Ewanikap hesyꞌat pote eweiꞌatupoi o miꞌiria e. Iꞌatuwesapoꞌutui pote etum o sapo hy iꞌatuepe. Miꞌi etunug pote tuwemoti topyꞌahak hap ete kat pote ewaku hap etunug pote aikotã naꞌak hawywiat aheꞌyni ywytꞌokpype aria sapuẽ hap ewy. Miꞌi hawyi imowepiit hap topyhuꞌat iꞌewyte tuwemoti tominug saꞌag ehetiat hap pupi. 21 Karãpe yt naku i hap ahãꞌãg kahato karãpe ahatek hap aiꞌakit teran pote yt naku i watoiat imohey hap. Waku watuꞌuka kahato aiꞌakit hap akit hamo. Waku watiꞌakit saꞌag wakuap nug hamo kat pote wakuap nug hap poꞌog hesaika saꞌag koꞌi kai are.