Iesui Aru E Hap

Tupana Hũ Kuteiru Tipok Taꞌyn Miwan

6 Miꞌi hawyi uito Iuwãu arahaꞌat hawyi araꞌakasa Tupana Hũ Kuteiru. Miꞌi hawyi toipak wẽtup saꞌawyꞌi wuat miwan Tupana mosatꞌe hap. Mekewat 7 rakat imosatꞌe hap wẽtup toipak hawyi atikuap sehay wẽtup ok 4 ok takaria wẽ pyi -Iuwãu e eriot ro atipy kape e katupono atikyꞌesat erahaꞌat yi kape aikotã aru topyhuꞌat miitꞌin hap kape e. 2 Arahaꞌat hawyi araꞌakasa raꞌyn wẽtup ok aihũ Kawaru ikytsig kahato rakat ok pe tote surara akag ewywuat araꞌakasa. Miꞌi hawyi mekewat miit toto wuatꞌi ywania moperupꞌi hamo wuatꞌi akit hamo toto. Ipo pe moryꞌawat moryꞌa koꞌi. Miꞌi hawyi miitꞌin teꞌeroꞌe -Waku En uruporekuat no iꞌatuꞌe. Miꞌi hawyi taꞌatupainug mekewat surara akag morekuat no -En uruꞌakag wo iꞌatuꞌe. Miꞌi hap kape araꞌakasa.

Pok E Hap Typy Rakat

3 Miꞌi hawyi arahaꞌat i raꞌyn Tupana Hũ Kuteiru Iesui kape. Miꞌi hawyi wẽtup i raꞌyn toihiot miwan mosatꞌe hap toipak hawyi mekewat 4 ok takaria wẽtup ok ihay uhowowi -Iuwãu e erahaꞌat ro yi kape erahaꞌat ro aikotã aru miitꞌin teꞌeropyhuꞌat aru itote hap kape e. 4 Miꞌi hawyi araꞌakasa wẽtup ok surara akag aihũ Kawaru hup kahato rakat okpe tote. Miꞌi hawyi hesaika kahato morekuat no topyhuꞌat. Taꞌatunug miꞌi taꞌatuꞌakag akag wo. Miꞌi hawyi toiꞌatumuꞌe kahato tesuraraꞌin me miitꞌin moma kuap kahato hap. Miꞌi hawyi toto te miitꞌin wywuat wuꞌuka hamo mesuwat yi totiaria yne wywo hamo. Miꞌi hawyi totat raꞌyn surara wato kyseꞌyp ewywuat wuatꞌi moperup hamo. Miꞌi hawyi yt kat i topyhuꞌat woꞌowese hap mesuwat yi tote maꞌato woꞌoꞌauka haria yn tukupteꞌen itote. Miꞌi hap kape araꞌakasa.

5 Miꞌi hawyi Tupana Hũ Kuteiru Iesui tipak taꞌyn wẽtup miwan etiat mosatꞌe hap myẽꞌym hap taꞌyn toipak. Miꞌi tutunug hawyi atikuap sehay wẽtup ok 4 takaria wẽ pyi. Iuwãu e erahaꞌat ro yi kape aikotã aru topyhuꞌat miitꞌin hap kape e. Arahaꞌat hawyi araꞌakasa raꞌyn wẽtup ok aihũ Kawaru hun kahato okpe tote rakat surara akag kape araꞌakasa. Mekewat miit po piat kape araꞌakasa karania ipotyi hap kuap hap. 6 Atikuap sehay 4 ok takaria pyꞌasetpyi -Miꞌi haꞌup iwato kahato -Miu haꞌup woityꞌi hap topyhuꞌat yi totiaria mikyiꞌat nuat e ikap rakat iꞌewyte hesapo hy rakat iꞌewyte uꞌi. -Taꞌi wẽtup eꞌat miitꞌin taꞌatupotpap aat wẽtup ekuiꞌa uꞌi kyiꞌat hamo. Miꞌu haꞌup woityꞌi e. Taꞌi awati myẽꞌym ekuiꞌa kyiꞌat hamo iꞌatupotpap aat e. Waku satek hap wywo etuꞌu kurin kurin miꞌu e yi totiaria pe.

Pok E Hap 4 rakat

7 Miꞌi hawyi Tupana Hũ Kuteiru Hit tipik wẽtup i raꞌyn miwan mosatꞌe hap 4 raꞌyn toipik hawyi atikuap sehay wẽtup ok 4 ok takaria wẽ pyi ihay raꞌyn uhowowi 4 ok taꞌyn meimuẽwat morekuat apyk hap kaipyi hay rakaria. -Iuwãu e eriot ro meikowo e. Erahaꞌat ro aikotã aru miitꞌin teꞌeropyhuꞌat yi tote hap kape e uhepe. 8 Arahaꞌat hawyi araꞌakasa wẽtup ok surara akag kape tohũ Kawaru okpe tote. Ihũ ete ikaꞌay rakat hepihi pihi rakat yt ikahu hin i rakat. Mekewat miit set Guꞌuro iꞌatuꞌe. Tohũ saꞌag okpe tote hewyry aikope aikope tomikyꞌesat kape. Iꞌewyte toineꞌen hewatꞌypmo yne muap upi ikuꞌuro rakaria sem. Miꞌi hawyi Guꞌuro miitꞌin pyꞌasetpe ikosap hap upi miitꞌin topap kahato ikuasa hap upi. Miꞌi hawyi atikuap sehay Guꞌuro pe -Ehoꞌoꞌauka ro yi totiaria e. Aikope aikope toineꞌen 4 miit ekai pote etiꞌauka wẽtup miit e. Toineꞌen 40 miit ekai pote etiꞌauka 10 miit e. Miꞌi hawyi toto miitꞌin wuꞌuka hamo. Ipatꞌok topap surara akag Guꞌuro e hap het rakat ekyseꞌyp mo. Ipatꞌok syꞌat pe topap ipatꞌok ahuu pono topap ipatꞌok miat koꞌi ipyꞌahak takaria tiꞌatuꞌuka. Topap topap yi totiaria sok kape araꞌakasa.

9 Miꞌi hawyi Tupana Hũ Kuteiru kape araꞌakasa. Miꞌi hawyi toipak miwan pyhyp 5 hap taꞌyn miwan pyhyp hap toipak hawyi arahaꞌat yparakai wato kape mekewat miium Tupana kapiat kape. Miꞌi hawyi yparakai ywytꞌokpype miitꞌin sem Tupana ehay moherep potiat miitꞌin miꞌauka sem kape araꞌakasa. -Eiwemohey Tupana pote uruiꞌauka eipe iꞌatuꞌe e Tupana wanikaptia. Maꞌato miꞌi pykai -Uruimohey te paĩ an iꞌatuꞌe imohey haria taꞌatuꞌatuꞌuka teran haria pe. Miꞌi hawyi miitꞌin miꞌauka wo tukupteꞌen miꞌiria. 10 Miꞌiria tukupteꞌen yparakai wato ywytꞌokpype wuatꞌi miium Tupana kapiat pyꞌasetpe tukupteꞌen. Itote -Urupotypot urupotypot iꞌatuꞌe taꞌatuehay pirik wo. Wakuat sese En iꞌatuꞌe. Hãpyk sese rakat En iꞌatuꞌe. Karãpe aru karãpe aru uruewepyk urusuu okpun haria ete uruꞌauka haria ete mytyyp totiaria ete iꞌatuꞌe Tupana pe. 11 Miꞌi hawyi tutum iꞌatuesokpe ikytsig nakat miitꞌin miꞌauka tomohey potiat haria hap moherep hamo hawyi -Apuete e hawyi worohoꞌokawiatno irane e. Eiwemohey ro mesuwete e. Pywo ti rat wohoꞌopoepyk irane maꞌato eipe yt eirania i te miitꞌin miꞌauka koꞌi e. Tukupteꞌen eiꞌewywuaria miitꞌin miꞌauka wuat irane. Taꞌatuꞌauka yne aru eipe torannia yne mesuwe hawyi worohoꞌokawiatno eipe e. Atiꞌatuꞌapiheg kahato aru eisuu okpun haria eiꞌauka haria e wuatꞌi miium yparakai koro ywytꞌokpy piaria pe. Miꞌi hap kape araꞌakasa yne.

Pok E Hap 6 Rakat

12 Miꞌi hawyi arahaꞌat i raꞌyn Tupana Hũ Kuteiru kape. Miꞌi hawyi toipak taꞌyn wẽtup miwan moheg hap 6 hap taꞌyn hawyi yi tyryꞌe tyryꞌe kahato. Miꞌi hawyi aat yt hẽtyhot hin i. Iꞌewyte aat hun kahato aikotã sokpe hun puo hẽtyhot hap ewy. Iꞌewyte waty ihup aikotã suu ewy toꞌopuẽti pykai ihup. Miꞌi hap kape araꞌakasa. 13 Miꞌi hawyi waikiru koꞌi hewo hewo atipy kaipyi yi kape. Hewo aikotã ywa hewo kahato ywytu uato turanuat hap ewy hewo hewo waikiru sem yi kape. 14 Miꞌi hawyi waikiru koꞌi yt teꞌeruwekuap i raꞌyn aikotã watiꞌokpoꞌi aheꞌyni hap ewy aat wẽtem hap kaipyi aat minꞌe hap kape tuweꞌokmuꞌeria hawyi yityꞌok koꞌi tuwat wẽtup teiam kape. Iꞌewyte yꞌy wato piat tuwat wẽtup taꞌatueiam yꞌy wato piat kape hap araꞌakasa. 15 Miꞌi hawyi yi totiaria teꞌerokenꞌẽ kahato teꞌerahaꞌat hamo. Miitꞌin porekuat koꞌi teꞌerokenꞌẽ kahato. Iꞌewyte hekat rakaria teꞌerokenꞌẽ kahato. Miit iwatoꞌin nakaria teꞌerokenꞌẽ iꞌewyte Tupana pupi. Iꞌewyte suraraꞌin akag koꞌi teꞌerokenꞌẽ kahato. Miitꞌin ipiit hesaika rakaria teꞌerokenꞌẽ. Iꞌewyte miit eropat haria iꞌewyte teꞌerokenꞌẽ kahato Tupana owa kapiat teꞌerahaꞌat hamo. Gaꞌapy pe miat kaꞌa pe teꞌeruwemig genꞌẽ pono yityꞌok kaꞌa pe Tupana Hũ Kuteiru pupi teꞌerokenꞌẽ kahato. 16 Miꞌi haype kak iꞌatuꞌe kak iꞌatuꞌe -Urusyp to urusyp to iꞌatuꞌe yihot kaipyi yityꞌok kape. Ehewo ro ehewo ro urusyp hamo iꞌatuꞌe. Katupono urutokenꞌẽ kahato Tupana owa kape urutaꞌakasa hamo iꞌatuꞌe. Yt uruikyꞌesat i tehaꞌat uruewawi iꞌatuꞌe. Urutokenꞌẽ kahato Tupana Hũ Kuteiru pupi iꞌatuꞌe. Katupono mesup haiwot raꞌyn ahete iꞌatuꞌe teꞌeruwẽpowat yihot kaipyi torannia. 17 -Are paĩ are an putꞌok e raꞌyn aiꞌapiheg hap eꞌat kak iꞌatuꞌe kak iꞌatuꞌe popuo. Mesup haiwot raꞌyn ahete iꞌatuꞌe. Ipoityꞌi kahato ahete iꞌatuꞌe. Yt uruhupit kuap i uruꞌapiheg hap kak iꞌatuꞌe kak iꞌatuꞌe popua e hap kape araꞌakasa yne uito. Gytꞌiꞌatuꞌe popuo kyryet kyryet iꞌatuꞌe.