Iesui Aru E Hap

Yt Nakuat I Tuwẽtem Yꞌy Wato Pyi

13 Miꞌi hawyi uito Iuwãu uhewyry yꞌy wato ẽpe ete yi kyt upi. Miꞌi puo arahaꞌat hawyi araꞌakasa wẽtup ok tuwẽtem yꞌy wato pyi yt nakuat i sese uimogyt kahato. Miꞌi awyato tig koro 7 iꞌakag nakat. Iꞌakag koꞌi ete 10 iꞌaut. Iꞌewyte yne iꞌaut ete ipainug hap amãtap morekuat wat ewywuat. Miꞌi kape araꞌakasa uimuꞌetu. Mekewat awyato tig koro 7 iꞌakag ete howatuꞌa ete toineꞌen het saꞌag koꞌi. Het koꞌi saꞌag uito Tupana e hap ewy. Toimohit teran kahato Tupana toset wo. 2 Arahaꞌat kahato mekewat yꞌy pywiat wẽtem hat kape. Taꞌi awyato tig ewy kahato areꞌe uiwanetup hawe. Ipy ipo hĩpa py ewy. Iwẽ awyato wato wẽ ewy areꞌe. Tuwẽtem yꞌy pyi hawyi mekewat moiꞌok toꞌe tope -Woronug naꞌyn en wuatꞌi uhemiitꞌin porekuat no e. Waku eraꞌapyk morekuat nuat uiꞌapyk hap tote e. Woronug en uhehaytuwy e. Miꞌi hawyi ehay topyhuꞌat uhehay kaipyi e. Miꞌi hawyi ehay upi yne miitꞌin teꞌeropyhuꞌat e moiꞌok mekewat yt nakuat i rakat hĩpa py ewywuat pe. 3 Uito Iuwãu arahaꞌat mekewat 7 iꞌakag nakat kape maꞌato wẽtup ok akag hepihi wato rakat maꞌato tokãꞌã raꞌyn aikotã saꞌawyꞌi iꞌauka hap ewy. Miꞌi hawyi arahaꞌat yne miitꞌin tutunug tomikyꞌesat ewy. Tuwat kahato ihay upi. 4 -Woromotypot En moiꞌok iꞌatuꞌe. Tupana sese moiꞌok iꞌatuꞌe. Katupono yꞌy pywiat wẽtem hat uruporekuat no iꞌatuꞌe. Mio tã iꞌatuꞌe hawyi teꞌeruwepỹꞌãtutuk 7 iꞌakag nakat kape -Yt uwe i ekai poꞌog wakuat iꞌatuꞌe. Yt uwe i eꞌakit kuap iꞌatuꞌe. Torannia teꞌerokenꞌẽ epupi tuꞌuka ewywuat hamo iꞌatuꞌe torannia miitꞌin. 5 Miꞌi hawyi mekewat moiꞌok wẽ wo topyhuꞌat hawyi ihay se tuwemotypot hamuat -Uito ti Tupana e Uito ti Tupana e. Aikotã morekuat wato ewy ihay se 42 ewaty turan miꞌi yn topyhuꞌat morekuat koro wo. Miꞌi turan ipotpap kahato moiꞌok mikyꞌesat ewy. 6 Tuwekyryꞌi kahato Tupana ete towẽ pyi -Yt ikahu hin i Tupana set e. Tupana motypot yat yt kat hamo i e. Yt naku i nug haria atipy piaria e. Yt naku i kahato Tupana e. 7 Iꞌewyte -Etiꞌatumoma ro Tupana emiitꞌin e moiꞌok mekewat yꞌy wato pywiat wẽtem hat pe. Wuꞌuka hamo waku watiꞌatuꞌakit Tupana mohey haria e. Miꞌi hawyi watiꞌatuꞌakit yne hawyi waku wuatꞌi ywania akag wo eropyhuꞌat mesuwat yi tote e. Yne pusu kaꞌiwat sio ihup sio ikytsig sio hun yne ywania kaꞌiwat kat e pusu kuap haria kat ywania kaipywiaria e. Waku yne tama piaria porekuat iꞌatumiꞌakit no iꞌatumimohit hat no ereineꞌen e ahiag awyato tig koro pe. 8 Mekewat eꞌat turan taꞌatunug Tupana wo mekewat awyato ewywuat saꞌag nakat. Teꞌeruwepỹꞌãtutuk hawyi -En ni Tupana iꞌatuꞌe iraniaꞌin. Maꞌato mekewat ikuꞌuro aihũ Kuteiru ewywuat rakat mohey haria yt inug i mekewat awyato tig akag ewywiat taꞌatuetupana wo. Yt taꞌatumotypot i. Katupono Tupana Sese yn saꞌawyꞌi toineꞌen yi nug hap eꞌyian mete iꞌatuꞌe Iesui mohey haria. Miꞌiria Tupana tunug iꞌatuset pehik hawe tomiwan ete. Miꞌiria Uihũ Kuteiru hit mohey haria toiwan tomiwan me mesuwat yi nug hap eꞌyian mete miꞌiria aru -Uruimohey Tupana Hũ ikuꞌuro aikawiatno haype pote yt uruimohey i moiꞌok mipoꞌoro aiporekuat nuat iꞌatuꞌe haria toiwan tomiwan me mesuwat yi yt kat i hep hap eꞌat pe turan Tupana.

9 Uiwyriaꞌin uito ti Iuwãu. Ehewaure kaꞌa pote eiwanetup to kat som Tupana toꞌe ehewowi hap kape areꞌe. 10 Mio tã areꞌe ehepe -Eiweꞌeg wo o Tupana emiitꞌin eipe pote. Eweimohey ro yne eipyꞌa pe eikuꞌuro hap kape katupono ti aru ahatyꞌi hatyꞌi kahato woꞌopyhik hawe imohey haria aito pote. Waku wahoꞌopot aikuꞌuro hap kape. Aiꞌauka kyseꞌyp wo pykai yt naku i watoiat Iesui hap aiꞌauka iraniaꞌin imohey pote areꞌe. Ehewaure kaꞌa pote eweikuap to uiꞌe hap. Uito Iuwãu uipyhyp hawe yꞌy wato pyꞌasetpe yi a tote uiꞌatoiat mesuwe Iesui mohey hap upi.

Wẽtup Ok Kape Arehaꞌat Yi Totiat Saꞌag Kahato Rakat

11 Miꞌi hawyi uito arahaꞌat hawyi araꞌakasa wẽtup ok kape. Yi kaꞌa pyi tuwẽtem iꞌaut kurin kat yt iꞌaut rakat ewy i. Yty hit mepyt ewy aihũ Kaneiru mepyt ewy. Typy iꞌaut kurin kat maꞌato ihay hawyi ihay pirik kahato akuara wato ehay ewy. 12 Miꞌi topyhuꞌat uito Tupana e hat saipepiat saꞌawyꞌi wuat morekuat koro yianmiat ewy. -Eweimotypot ro uheꞌyianmiat Tupana wo awyato tig ewywuat piat. Isuk hap tuwemokãꞌã raꞌyn iꞌauka hap tokãꞌã raꞌyn toineꞌen i raꞌyn hap ewy maꞌato yt kahato i. 13 Mekewat yi kaꞌa pywiat wẽtem hat mekewat wẽtup ok Tupana ran saipepiat inug kuap kahato yt miitꞌin minug ewywuat i. Tutunug iwato kahato miitꞌin mowanetup hamo. Toikay kay kuap aria atipy kaipyi yi kape wuatꞌi miitꞌin ehamo iwato kahato. 14 Toiꞌatumaꞌat miitꞌin mesuwat yi tote tomimoherep yt miitꞌin minug kuap i rakat wywo. Maꞌato tuweran note yt uwe i mekewat awyato tig akag 7 iꞌakag nakat iwywo pote yt toimoherep kuap i miitꞌin mowanetup hamo. Katupono yianmiat hap ahiag kaipyi hesaika hap toineꞌen. Miꞌi hawyi toiꞌatumowanetup pywo iꞌatuꞌehamo. Miꞌi hawyi -Uimohey pote ewetunug no Tupana iãꞌãkap uheꞌyianmiat ewywuat e mekewat kyseꞌyp misuk maꞌato toineꞌen i raꞌyn guꞌuro pywiat hat e yn miitꞌin me. Miꞌi hawyi taꞌatunug naꞌyn mekewat awyato tig akag 7 iꞌakag nakat iãꞌãkap. 15 Taꞌatunug hawyi mekewat iãꞌãkap teꞌyianmiat iãꞌãkap toimoieineꞌen. Miꞌi hawyi iãꞌãkap ihay raꞌyn toimopyhu raꞌyn hawyi tutum tesaika hap mekewat iãꞌãkap we yt tomotypot i haria auka hamuat. 16 -Eweimotypot ro Tupana wo iãꞌãkap e. Ewetunug no uiꞌe hap ewy e. Ewetat ro miwan ehowatuꞌa ete mekewat ahetupana iꞌãꞌãkap set e. Iꞌewyte eipo sese kai mekewat miwan iãꞌãkap set ewetat ro e wuatꞌi miitꞌin me miit akag koꞌi pe iꞌewyte miit emiit pe iꞌewyte hekat rakaria pe iꞌewyte hatek takaria pe mipyhyp koꞌi pe iꞌewyte woꞌopyhyp haria pe. -Hẽ to eweiꞌe ro eipiit etiat miwan nug haria pe e. 17 -Yt eweiꞌe pote yt kat i aru uruiweneru ehepe e -Yt eweiꞌe pote iꞌewyte uruipyhyp aru eipe wuatꞌi weneru hap ete e wuatꞌi pe. Miꞌi hawyi taꞌatuwan yne miitꞌin piit mekewat Tupana iãꞌãkap set wywo mekewat Tupana iãꞌãkap morania hap wywo.

18 Uiwyriaꞌin weꞌeg haria eipe pote eweikuap to mekewat Tupana iãꞌãkap set mekewat yt nakuat i set e Tupana ahepe. Eiweꞌeg mote yt niatpo i eweikuap het kat pote miitꞌin set wywo topyhuꞌat. Watimorania yne mekewat miwan koꞌi het koꞌi watimorania yne tuwat i tuwat i hawyi watipuẽti miwan toꞌokape 666. Miꞌi kaipyi watikuap het aiweꞌeg mote e. Yne miwan miat 666 piat wẽtup het toineꞌen. Watimorania yne mimorania koꞌi hawyi 666 watipuẽti e Tupana ahepe.