1 Ȳt Eiwoꞌoꞌatoiat Terānꞌi Eipyꞌa Pe

AIKOTĀ̃ MEIG̃.

Waku seꞌaito seharyꞌi taꞌatupyꞌa pe ti raꞌyn wuatꞌi eꞌāt pe tukupteꞌen terān toꞌowȳwo hap. Seꞌaito seharyꞌi ȳt karāmpeꞌi toꞌoꞌatoiat terān pote toꞌomohey tuereto hamo aikotā̃ niatpo iꞌatuetiat pykai.

Iraniaꞌīn woꞌomenaru haria ȳt toꞌoꞌatoiat ite kat pote taꞌatuwyriaꞌīn teꞌeroꞌe ȳt eiwoꞌoꞌatoiat reiꞌo iꞌatuꞌe pote neꞌi. Maꞌato poꞌog̃ waku woꞌomenaru haria tukupteꞌen ne toꞌowȳwo toꞌokyꞌe sēse iꞌewȳte toꞌomontypot kahato pote.

TUPANA EHAY HENOI — Ȳt nakuꞌi kahato weharyꞌi atoiat hat no eweikupteꞌen uhytꞌiꞌīn e. — 1 Kurintiu 7:11.

Micah e hap het rakat toꞌe — Etimontypot ewoꞌomenaru hap pote karāmpe eꞌaito sio eharyꞌi tiꞌaparap turān ȳt epyꞌahak hamoꞌi maꞌato waure wo ereig̃neꞌen hamo iꞌewȳte karāmpe niatpo hap koꞌi putꞌokꞌe ehete turān etiꞌatuꞌakit hamo e.

KAT POTE MIꞌITĀ̃ WAKU.

Iraniaꞌīn ȳt taꞌatumontypot terānꞌi taꞌatuwoꞌomenaru hap pote karāmpe niatpo iꞌatuete turān merep taꞌyn toꞌoꞌatoiat terān.

Jean e hap het rakat toꞌe — Iraniaꞌīn woꞌomenaru terān haria teꞌeroꞌe — Watoꞌomenaru hawyi ȳt watoꞌoksatꞌi pote watoꞌoꞌatoiat kuap neꞌi iꞌatuꞌe. Maꞌato miꞌi hap ȳt nakuꞌi kat pote teꞌeremenaru ite ti raꞌyn turān ȳt taꞌatupyꞌa peꞌi wuatꞌi eꞌāt pe tukupteꞌen terān toꞌowȳwo hap e.

KAT ASOM WAKU ETUNUG̃.

WAKU APOꞌERE EWEPE

Eiwoꞌoꞌehay wo eiwuꞌuka pote waku asom

• Kat hamoꞌi aremenaru ewȳwo ere.

• Waku poꞌog̃ aremenaru irania wȳwo ere.

• Moroꞌatoiat hamo hawyi aru aremenaru wentup ok mīt waku poꞌog̃ ekai rakat wȳwo ere.

Erewanentup asom meig̃muewuat koꞌi kape. Miꞌitā̃ mote waku etimontypot poꞌog̃ ewemenaru hap.

EIWOꞌOEHAY TUERETO O

• Apoꞌeweiꞌe kuap — Ȳt watoꞌomontypotꞌi poꞌog̃ asom aikotā̃ saꞌawyꞌiwuat hap ewy. Miꞌitā̃ mote waku eweikuap kat pote miꞌitā̃ hap.

• Kat asom waku watunug̃ watimontypot poꞌog̃ aiwemenaru hap hamo apoꞌeweiꞌe kuap.

MOWȲRO HAP KOꞌI

• Asūwe waku etiwan morokyꞌe kahato e hap sio iraniaꞌīn sehay sē rakaria eꞌaito sio eharyꞌi piat.

• Epotpap hap tote waku ewat toig̃ eꞌaito sio eharyꞌi iaꞌag̃kap koꞌi erehaꞌat tuereto hamo. Miꞌi hap puo pyi etimoherep ewoꞌomenaru montypot hap.

• Waku etiligaru tuereto wuatꞌi eꞌāt pe eꞌaito sio eharyꞌi kape. Miꞌi hap etunug̃ kuap karāmpe pya ikai turān iꞌewȳte etipoꞌoro kuap mensagem koꞌi.

TUPANA EHAY HENOI — Katupono Tupana tunug̃ miꞌiria wentup mīt ewywuat e. Pyno ti toig̃neꞌen ȳt typy ok mīt hinꞌi tukupteꞌen maꞌato wentup mīt yn. Miꞌi tupono wyti ȳt uwe kuapꞌi ipatꞌok aikotā̃ Tupana mipehik koꞌi e. — Mateu 19:6.