5 Ehehay Tuereto O Emempytꞌīn Wȳwo

AIKOTĀ̃ MEIG̃.

Waku nyꞌīn ȳwotꞌīn hawyi mempytꞌīn toꞌoꞌehay tuereto iꞌatuwanentup hap iꞌatupyꞌa piat koꞌi etiat.

KAT POTE MIꞌITĀ̃ WAKU.

Asuwe niatpo kahato ȳwotꞌīn nyꞌīn toꞌoꞌehay taꞌatumempyꞌīn ipakuptiaria wȳwo hamo. Popera Decifrando o Código e hap henoi — Emempytꞌīn hirokaria te turān etikuap kahato kat tuwemoherep emempytꞌīn wȳwo hap ete maꞌato korā̃ emempytꞌīn teꞌeruwemotag̃ hawyi etikuap kahatoꞌi aikotā̃ tukupteꞌen hap e. Maꞌato ȳt epohep teiꞌo ehay emempytꞌīn wȳwo hap ete.

KAT ASOM WAKU ETUNUG̃.

Waku etikuap kat e hora tuereto emempytꞌīn iꞌatuehay terān ewȳwo hap. Emempytꞌīn iꞌatuehay terān wantym hake turān pote waku ehay iꞌatuwȳwo.

Lisa e hap het rakat toꞌe — Ȳt nakuꞌi ere — Koityꞌi aiwoꞌowȳwo kahato raꞌyn pykai maꞌato mio yn ehay terān ere. Maꞌato miꞌi hap ȳt nakuꞌi kat pote watikyꞌesat kahato aimempytꞌīn iꞌatuehay aiwȳwo hap e.

Hebert e hap het rakat toꞌe — Atipuenti poꞌog̃ waku areket wantym kahato ite turān maꞌato wantym hake turān ni uimempytꞌīn ihay terān poꞌog̃ uiwȳwo. Waku kahato urutoꞌoꞌehay hap koꞌi e.

TUPANA EHAY HENOI — Ȳt nakuꞌi aimikyꞌesat yn watunug̃ waku pykai areꞌe iꞌatuepe. Waku poꞌog̃ iraniaꞌīn mikyꞌesat watunug̃ aiwepowȳro hap kai e. — 1 Kurintiu 10:24.

Erenentup kahato emempytꞌīn e hap kape. Wentup ihaig̃nia imempyt rakat toꞌe — Asuwe uimempytꞌīn iꞌatuehay uiwȳwo turān uiwanentup hap koꞌi kowoꞌi kowoꞌi neꞌi e. Maꞌato miꞌitā̃ mote taꞌatukuap ti raꞌyn arenentup kahatoꞌi iꞌatumienoi koꞌi kape hap e.

Meketā̃ hap ewy tuwemoherep taꞌyn ewȳwo pote waku etunug̃ ecelular iꞌahayꞌi hap tote sio etimomponik porapꞌi televisão erenentup emempyt e hap kape hamo. Asuwe emempyt ihay terān kurin rakaria etiat maꞌato waku erenentup kahato imienoi koꞌi kape woꞌokyꞌe hap wȳwo.

Maranda e hap het rakat toꞌe — Waku watimoherep aimempytꞌīn wanentup pya piat koꞌi watikuap terān hap. Ȳtꞌi pote taꞌatuhenoi hamo iraniaꞌīn pe e.

Anthony e hap het rakat toꞌe — Emempyt mienoi emikyꞌesat ewy pykaiꞌi epyꞌahak teiꞌo maꞌato erenentup perupꞌi popuo o e.

TUPANA EHAY HENOI — Eweiwanentup haty wo hawyi eiwewaure kaꞌa kahato uhehay kape. — Iruka 8:18.

Ehay kuap iꞌatuwȳwo wuatꞌi puo. Asuwe ipakuptiaria teꞌeremunti haype taꞌatupuenti poꞌog̃ waku toꞌoꞌehay turān ȳt teꞌerehaꞌatꞌi taꞌatuꞌȳwotꞌīn ewa kape.

Nicole e hap het rakat toꞌe — Karāmpe uruewyry carro puo turān uhehay poꞌog̃ uimempyt wȳwo kat pote ȳt tehaꞌatꞌi uhewa kape e.

Waku ȳwotꞌīn nyꞌīn toꞌoꞌehay taꞌatumempytꞌīn wȳwo teꞌerenuk toꞌowȳwo turān.

Robin e hap het rakat toꞌe — Urutenuk turān urutoꞌoꞌehay kat kat tuwemoherep mesup eꞌāt turān. Miꞌi pote urutoꞌowyꞌok wo poꞌog̃ kat pote uruikuap urutoꞌopowȳro kuap uruiꞌakit niatpo hap koꞌi hamo hap e.

TUPANA EHAY HENOI — Waku watuwanentup kahato hawyi waku aiweꞌeg̃ ahehay e.​ — Tiaku 1:19.