MESŪWAT YI OKTĀN TUWEMOHEREP SAꞌAG̃ HAP

1 | Waku ereropat

KAT POTE MIꞌI HAP WAKU ETUNUG̃

Karāmpe iunteꞌen putꞌokꞌe niatpo hap turān miꞌi pote mītꞌīn iꞌatuꞌahū kuap iꞌewȳte niatpo kuap teꞌereropat hamo.

Karāmpe toig̃ niatpo hap turān mītꞌīn wanentup hap kowoꞌi kowoꞌi kahato. Miꞌi hap mōtꞌi kahato raꞌyn pote iꞌatumoꞌahū kuap.
Karāmpe toꞌoꞌupi upi mītꞌīn iꞌatuꞌahū pote hospital pe katꞌi sej̃am hawyi niatpo taꞌatupuenti mohag̃ koꞌi hamo.
Niatpo hap koꞌi turān ȳt katꞌi mītꞌīn edinheiro miꞌi pote niatpo miꞌu koꞌi kyiꞌat hamo iꞌewȳte mohag̃ koꞌi kyiꞌat hamo.

Kat hap koꞌi waku etikuap

Eꞌahū kahato ewanentup hap kowoꞌi kowoꞌi kahato miꞌi pote etiꞌaira hamo waku rakatꞌi ereropat hap epopapꞌi poꞌog̃ hamo hawyi eꞌahū kahato poꞌog̃ kuap.
Eꞌahū turān ereropatꞌi pote ekuꞌuro kuap hamo.
Ereropat kahato pote niatpo pykai maꞌato etiꞌaira waku rakat hamo.
Edinheiro kahato sio ȳt edinheiro kahatoꞌi pykai maꞌato kat koꞌi kat koꞌi neꞌi etunug̃ kuap ereropat hamo.

Kat asom waku etunug̃ korā̃

Mīt iweꞌeg̃ nakat wyti tuwanentup kahato kat tuwemoherep kuap hap kape. Miꞌi hawyi tuwekawiano hamo kat kat neꞌi tutunug̃. Miꞌi pote ti waku erepokuap erepīt eropat hap ete ereꞌyat hywytyp hap ete. Miꞌi hap koꞌi epowȳro hamo eꞌahū poityꞌi kahato hamoꞌi.

Ereropat tuereto hap poꞌog̃ waku erepohag̃ꞌu tuereto yn hap kai. Karāmpe uruꞌyat uruteropat uruipitꞌok pitꞌok tuereto miꞌi pote uruedinheiro iwato poꞌog̃ kat pote ȳt uruikyiꞌatꞌi mohag̃ koꞌi neig̃ uruhoꞌoknug̃ mohag̃ nug̃ haria. — André.a

a Het sēseꞌi.

KAT HAP KOꞌI ASOM ETUNUG̃ KUAP — Mowȳro koꞌi hap

Niatpo koꞌi turān kat hap koꞌi asom epowȳro kuap ereropat hamo.

WAKU EREPĪT EROPAT IꞌEWȲTE EREꞌYAT EROPAT

Waku erepīt eropat iꞌewȳte ereꞌyat eropat

Tupana ehay ainãpin Mīt wakuat wyti taꞌakasa ipoityꞌi hap kape hawyi meremo tuwemig̃ e. (Porowepiu 22:3) Pyno waku erewanentup kat hap koꞌi emoꞌahū hap hawyi kat hap koꞌi etunug̃ erekawiano hamo hap.

Waku ereposei tuereto sabão wȳwo. Poꞌog̃ waku miꞌi hap etunug̃ eremiꞌu nug̃ hap eꞌyj̃an mete erenuk hap eꞌyj̃an mete hawyi eretẽm banheiro pyi hawyi.
Waku ereꞌyat ywytip etipitꞌok pitꞌok tuereto eꞌyat piat koꞌi maꞌato miꞌi hap waku poꞌog̃ etunug̃ aj̃umpe epoꞌat hap koꞌi tote.
Karāmpe mīt ahū wesytpok hap pote waku pya ereig̃neꞌen korā̃ tiꞌitu etāt iꞌahū hap.

EMOHAIG̃TE HAMO WAKU EHUꞌU MIꞌU WOꞌOMOEHAIG̃TE RAKAT

Waku ehuꞌu miꞌu woꞌomoehaig̃te rakat

Tupana ehay ainãpin Aito ahesyꞌat hawyi watuwepoi iꞌewȳte haty aipīt ete hawyi meremo watikat mohag̃ haty monik hamo e. (Ewesu 5:29) Watimoherep watepīt kyꞌe hap wateropat hap puo pyi iꞌewȳte aimitumu aimisekuap koꞌi wȳwo. Kotā̃ e hap.

Waku watuweꞌyꞌu kahato.
Waku wahuꞌu ywa tuweupiat koꞌi rakat verdura hawyi legume koꞌi.
Ȳt nakuꞌi watuꞌu kahato ikap takat iꞌewȳte hemporok takak watenuk iꞌewȳte heꞌeg̃ kahato rakat koꞌi.
Ȳt eresuhu sapy teiꞌo neig̃ suhuhit sapy iꞌewȳte eremahyꞌu poityꞌi teiꞌo sio erepohag̃ poityꞌi teiꞌo.

Uruꞌahūꞌi hamo uruikyiꞌat hawyi urutunug̃ tuereto miꞌu waku rakat urumoehaig̃te poꞌog̃ hamo. Miꞌi hap urutunug̃ꞌi pote uruikyiꞌat kahato irane mohag̃ koꞌi miꞌi pote uruipuenti waku poꞌog̃ uruikyiꞌat miꞌu waku rakat hap mohag̃ koꞌi hap kai e. — Carlos.

WAKU EREPĪT MOESAIKA IꞌEWȲTE EREMOHY

Waku erepīt moesaika

Tupana ehay ainãpin Waku poꞌog̃ wyti wemohy hit hap motpap kahato hap kai iꞌewȳte kat hamoꞌi ereto ywytu upi hap ewy neꞌi e. — Ekeresiasi 4:6, TNM. Waku kahato aipotpap hap maꞌato waku wy watemohy hap.

Waku etunug̃ tuereto exercicío epīt moesaika hamo. Kotā̃ e hap. Ewyry hawyi punꞌere kuap tuereto. Epōro raꞌyn eꞌahū sio kat koꞌi kat koꞌi etunug̃ kuapꞌi pykai maꞌato erepīt moesaika kuap. Miꞌi hap epowȳro ehaig̃te poꞌog̃ hamo.
Waku eremohy

Waku eremohy kahato. Eremohy kahatoꞌi pote esēra hamo miꞌi hawyi erewanentup kahato hamoꞌi. Iꞌewȳte ewanentup hap kowoꞌi kowoꞌi kahato hamo. Mōtꞌi hawyi eꞌahū kuap.
Waku etiwan popera pe karania hora ereket hamo hap. Hawyi miꞌi hap ewy waku etunug̃ aikotā̃ etiwan karania hora ereket hamo hap hawyi karania hora erehymūt hap.
Waku ereket hamo pya celular kai iꞌewȳte ȳt nakuꞌi erehaꞌat televisão kape.
Waku weꞌeg̃ hap wȳwo ehuꞌu café hawyi sapo iꞌewȳte mahy koꞌi. Etuꞌu poityꞌi kahato pote eket hap hep hamo.

Atikuap karāmpe areket sē kahato pote uheꞌāt poꞌog̃ waku. Maꞌato areket kahatoꞌi pote asuwe uiꞌakag̃ haty uipīt koꞌi ete haty. Maꞌato karāmpe areket sē kahato pote uhete waku kahato atunug̃ kuap kat koꞌi kat koꞌi hawyi niatpo hap koꞌi atiꞌakit kuap wy. Miꞌi hap koꞌi uipīt moesaika uiꞌahūꞌi hamo e. — Justin.