Ȳt katꞌi Tupana Ehay momã kuap

Popera koꞌi waku poꞌog̃ rakaria sese toig̃ maꞌato Tupana Ehay ti rat tuweupi kahato. Nimo pyi te korā̃ te Tupana Ehay tipowȳro kahato mītꞌīn mimohey koꞌi. Maꞌato typyꞌi kahato teꞌeruwanentup hawe — Tupana Ehay ti ȳt pȳwo piatꞌi miꞌi ti mītꞌīn neꞌi iꞌatuꞌe. Miꞌi pote taꞌatupyhyp terān irane Tupana Ehay mowempāp hap.

Kotā̃ e hap. Wemūꞌe kahato haria ipuenti korā̃ wuaria Tupana Ehay tuweupi kahato saꞌawyꞌi wuaria Tupana Ehay piat miwan koꞌi kai. Wentup ok woꞌomūꞌe hat religião etiat kotā̃ e — Ȳt watikuap hinꞌi korā̃ wuaria Tupana Ehay aikotā̃ saꞌawyꞌi wuaria Tupana Ehay piat miwan koꞌi ewy. Maꞌato mītꞌīn Tupana Ehay haꞌag̃kap hep kahato. Miꞌi pote sehay koꞌi ȳt hampȳk kahatoꞌi. Hawyi taꞌatuhaꞌag̃kap hep mōtꞌi hawyi yn Tupana Ehay miwan koꞌi potꞌi rakaria. Iꞌewȳte iꞌatuhaꞌag̃kap hep tuweupi kahato Tupana Ehay piat miwan nimuaria e puruwei.

Iraniaꞌīn mītꞌīn teꞌeremūꞌe iꞌatuereligião koꞌi wemūꞌe hap pote taꞌatumoheyꞌi Tupana Ehay tūt Tupana kaipyi. Kotā̃ e hap. Wentup ok Faizal e hap het rakat iꞌatuwyriaꞌīn ȳt Iesui mohey hariaꞌi. Hawyi tikuap Tupana Ehay wyti Tupana kapyi tūt maꞌato mītꞌīn tiꞌywyk raꞌyn imiwan koꞌi. Faizal kotā̃ e — Karāmpe iraniaꞌīn iꞌatuehay terān uiwȳwo Tupana Ehay etiat turān atipȳwo kahatoꞌi iꞌatuehay ete. Kat pote uiwanentup hawe — Ȳt uweꞌi hoꞌotoig̃ Tupana Ehay piat miwan koꞌi nimuaria mītꞌīn tiꞌatuꞌywyk pote sio are e Faizal.

Maꞌato waku asom watikuap Tupana Ehay iꞌywyk sio ȳt hap. Erewanentup o. Tupana Ehay toig̃ kahato aru e hap koꞌi. Pyno etimohey asom miꞌi koꞌi ete etimowempāpꞌi saꞌawyꞌi wuaria Tupana Ehay piat miwan koꞌi nimuaria pote. (Humanu 15:4) Korā̃ erenentup pyno. Tupana Ehay pe toig̃ sehay koꞌi ȳt hampȳk kahatoꞌi rakaria pote. Atāt hamo asom tepiat woꞌonãpin hap koꞌi epowȳro hamo epotpap turān ewyriaꞌīn wȳwo sio etimontypot Tupana hamo.

Pȳwo saꞌawyꞌi wuaria Tupana Ehay piat miwan koꞌi teꞌeruweityk taꞌyn maꞌato toig̃ ne Tupana Ehay piat haꞌag̃kap koꞌi kotā̃ e hap wemūꞌe haria ipuenti raꞌyn sese nimuat Tupana Ehay porerokosap hap.a Iraniaꞌīn taꞌatumomã terān Tupana Ehay nimuat miwan koꞌi sio ta’atu’ywyk terān imiwan koꞌi maꞌato mōtꞌi kahato raꞌyn tokosap pykai wen aikotā̃ meig̃ meig̃muewuat koꞌi tukupteꞌen ne korā̃. Waku etikuap miꞌi hap kat pote epowȳro etikuap hamo korā̃ wuat Tupana Ehay ti rat Tupana kaipyi tūt. Miꞌi pote meikowat popera puo pyi etikuap poꞌog̃ hamo kat pote ȳt katꞌi Tupana Ehay momã kuap hap etiat. Etimowempāp o miꞌi hap etiat.