WEMŪꞌE HAP 13
Kan tuwemoherep hamuat religião koꞌi wȳwo.
1. Torānia religião asom inug̃ Tupana mikyꞌesat ewy.
Iraniaꞌīn mītꞌīn tukupteꞌen religião pe taꞌatunug̃ terān kahato Tupana mikyꞌesat haype. Miꞌi haria kape Tupana tenentup kahato. Maꞌato iraniaꞌīn religião piaria inug̃ kahato saꞌag̃ koꞌi. (2 Kurintiu 4:4; 11:13-15) Kotā̃ e hap televisão puo pyi taꞌatuhenoi iraniaꞌīn religião piaria teꞌeropotꞌauka iꞌewȳte tuwat wuꞌuka hap koꞌi kape. Iꞌewȳte iraniaꞌīn padre koꞌi iraniaꞌīn pastor koꞌi iꞌewȳte iraniaꞌīn iꞌatuꞌakag̃niaria tisitsit hirokaria. Miꞌi pote Tupana kyꞌe haria meig̃muewuaria iꞌatuminug̃ koꞌi ete iꞌatuꞌarōt kahato.—Etimowempāp o Maku 13:3-6, 22.
Religião ȳt pȳwo piariaꞌi ȳt taꞌatuhoꞌomūꞌeꞌi pȳwuat e hap Tupana etiat iꞌewȳte ikuꞌuro rakaria etiat wy. Miꞌi hap koꞌi puo pyi taꞌatumoherep ȳt taꞌatumontypotꞌi Tupana hap. Maꞌato Ieuwa tikyꞌesat kahato mītꞌīn tikuap pȳwuat e hap koꞌi. Religião pȳwo piat rakat hoꞌomūꞌe Tupana Ehay piat yn.—Etimowempāp o Ekeresiasi 9:5, 10; 1 Timoteu 2:3-5.
2. Kan tuwemoherep hamuat religião koꞌi wȳwo.
Religião koꞌi mītꞌīn maꞌatꞌi maꞌatꞌi haria mesup tān epote Tupana timomã yne hamuat raꞌyn. Tupana tehaꞌat religião piaria minug̃ saꞌag̃ koꞌi kape. Miꞌi pote ȳt eꞌarōt reiꞌo. Kat hamoꞌi religião piaria — Atikyꞌe kahato Tupana iꞌatuꞌe maꞌato ȳt taꞌatunug̃ꞌi Tupana mikyꞌesat pykai. (Tiaku 4:4) Tupana Ehay toꞌe Religião ȳt pȳwo piaria peꞌi — Papironia e. Maꞌato — Papironia katꞌi poꞌog̃ hamuat e wy. Nimo Nuꞌe tempu turān toig̃ wentup tawa set Papironia e hap. Itote pyi yꞌy wato hawyi tesaꞌawynug̃ religião ȳt pȳwo piatꞌi rakaria.—Etimowempāp o Iesui Aru E Hap 17:1, 2, 5, 16, 17; 18:8.
Iraniaꞌīn Tupana mikyꞌesat nug̃ terān haria pykai tukupteꞌen religião ȳt pȳwo piatꞌi rakaria pe. Miꞌiria piat hap kat hag̃ Ieuwa tikyꞌesat. Ieuwa ȳt tiꞌatuwāureꞌi miꞌiria. Miꞌi pote toikyꞌesat kahato teꞌeremūꞌe Tupana Ehay etiat hap hawyi teꞌeruwenõꞌẽ religião ȳt pȳwo peꞌi rakaria pyi hap.—Etimowempāp o Mikeia 4:2, 5.
3. Kan waku Tupana kyꞌe haria tunug̃.
Religião pȳwo piat sese rakat hoꞌomūꞌe mītꞌīn tukupteꞌen wentup awy yn hamo.
Ieuwa toꞌe waku Tupana Ehay piat pȳwuat e hap koꞌi kyꞌe haria tuwenõꞌẽ religião ȳt pȳwo piatꞌi rakaria pyi hap. Tupana tenentup kahato iꞌatuewowi. Mīt tikyꞌe pȳwo pe Tupana pote tutunug̃ hamo Tupana e hap ewy.—Etimowempāp o Iesui Aru E Hap 18:4.
Tupana kaipywiat sehay wakuat rakat Iesui potmūꞌeria 12 ok takaria henoi mītꞌīn me. Miꞌi hawyi mītꞌīn tikuap taꞌyn iꞌatupuo pyi Tupana Ehay piat wakuat koꞌi rakat e hap etiat. Miꞌi hawyi taꞌatukuap taꞌyn aikotā̃ me tukupteꞌen kuap Tupana mikyꞌesat hap ewy hap iꞌewȳte aikotā̃ me tukupteꞌen kuap wuatꞌi eꞌāt pe hap. Miꞌi hap ewy waku watunug̃. Waku poꞌog̃ watunug̃ Tupana mikyꞌesat aimikyꞌesat koꞌi kai sio iraniaꞌīn mikyꞌesat koꞌi kai.—Etimowempāp o 1 Tesaronika 1:8, 9; 2:13.
Ieuwa tikyꞌesat kahato mītꞌīn tuwenõꞌẽ religião ȳt pȳwo piatꞌi rakaria pyi hap. Imontypot sese haria teꞌeropotkyꞌe kahato. Miꞌiria wȳwo teꞌeruwaꞌatunug̃ hap toikyꞌesat kahato. Miꞌitā̃ etunug̃ mote Ieuwa wyꞌok wo ereig̃neꞌen hamo hawyi ereig̃neꞌen hamuat hemītꞌīn sese haria wȳwo hamo iꞌewȳte wuatꞌi eꞌāt pe hamuat ereig̃neꞌen wy.—Etimowempāp o Maku 10:29, 30; 2 Kurintiu 6:17, 18.
4. Aikowan Tupana kaipywiat sehay wakuat rakat mītꞌīn kapiat.
Tupana kaipywiat sehay wakuat kahato rakat. Kotā̃ e hap religião ȳt pȳwo piatꞌi rakaria ȳt katꞌi poꞌog̃ hamuat. Miꞌi pote ȳt karāmpeꞌi poꞌog̃ hamo religião piaria aimaꞌat neig̃ aimosoꞌopot hamo wy. Maꞌato torānia hamuat raꞌyn imontypot Tupana sese Ieuwa yn aikotā̃ toikyꞌesat raꞌyn hap ewy.—Etimowempāp o Iesui Aru E Hap 18:20, 21; 21:3, 4.