WEMŪꞌE HAP 13
Kat asom religião ȳt pȳwo piatꞌi rakaria tunug̃ pya mītꞌīn kupteꞌen Tupana kai hamo.
Tupana aimūꞌe mītꞌīn kyꞌe hap ete maꞌato iraniaꞌīn religião piaria uruimontypot kahato Tupana iꞌatuꞌe pykai maꞌato taꞌatunug̃ kahato saꞌag̃ koꞌi. Kat pote asom. Kat pote miꞌiria religião ȳt pȳwo piatꞌi rakaria iꞌatueso neꞌi taꞌatuhenoi Tupana etiat. Kat asom religião ȳt pȳwo piatꞌi rakaria tunug̃ pya mītꞌīn kupteꞌen Tupana kai hamo. Aikotā̃ asom Tupana topyhuꞌat religião ȳt pȳwo piatꞌi rakaria minug̃ saꞌag̃ koꞌi ete. Kan tutunug̃ hamuat iꞌatuwȳwo.
1. Kat iꞌatueig̃ religião ȳt pȳwo piatꞌi rakaria hoꞌomūꞌe mītꞌīn tukupteꞌen pya Tupana kai hamo.
Religião ȳt pȳwo piatꞌi rakaria Tupana etiat pȳwuat taꞌatukuap taꞌatuwanentup hawe maꞌato miꞌi hawyi heso rakaria wo tukupteꞌen. (Humanu 1:25) Kotā̃ e hap. Ȳt taꞌatuhoꞌomūꞌeꞌi Tupana set etiat maꞌato Tupana Ehay henoi waku wahuꞌat Tupana set e. (Iueu 2:32) Karāmpe tuwemoherep niatpo hap mīt ete sio ahū hap pote padre koꞌi pastor koꞌi iꞌewȳte religião ȳt pȳwo piatꞌi akag̃ koꞌi teꞌeroꞌe eꞌarōt reiꞌo Tupana mikyꞌesat ewy ti rat meketā̃ iꞌatuꞌe. Maꞌato iꞌatueso neꞌi miotā̃ iꞌatuꞌe kat pote ȳt karāmpeꞌi Tupana tunug̃ ȳt nakuꞌi rakat. (Etimowempāp o Tiaku 1:13.) Iꞌatueso koꞌi hap upi mītꞌīn pya kahato tukupteꞌen Tupana kai.
2. Kan religião ȳt pȳwo piatꞌi rakaria tunug̃ mītꞌīn kupteꞌen pya Tupana kai hamo.
Tupana Ehay henoi religião ȳt pȳwo piatꞌi miꞌaparap iꞌatu kahato iꞌatuminug̃ saꞌag̃ iꞌatuwat e. (Iesui Aru E Hap 18:5) Nimo pyi te korā̃ te religião ȳt pȳwo piatꞌi rakaria teꞌeruwat morekuaria upi hawyi teꞌeruwenug̃ morekuaria wo iꞌewȳte taꞌatuhentup wuꞌuka haria upi taꞌatuhaꞌatuꞌuka kahato mītꞌīn. Iraniaꞌīn religião ȳt pȳwo piatꞌi rakaria akag̃ koꞌi iꞌatuekat terān kahato miꞌi pote taꞌatuhentup kahato dinheiro koꞌi taꞌatuekat hamo. Religião ȳt pȳwo piatꞌi rakaria teꞌeruweupi Ieuwa kai. Uruimontypot Tupana iꞌatuꞌe wen maꞌato ȳt taꞌatunug̃ꞌi Tupana mikyꞌesat koꞌi ewy. Taꞌatuminug̃ koꞌi puo pyi taꞌatumoherep ȳt taꞌatukuapꞌi Tupana sēse hap. — Etimowempāp o 1 Iuwãu 4:8.
3. Aikotā̃ asom Tupana tipuenti religião ȳt pȳwo piatꞌi rakaria etiat.
Religião ȳt pȳwo piatꞌi minug̃ saꞌag̃ koꞌi emoꞌarōt. Pyno kesom Ieuwa ipyꞌahak poꞌog̃ iꞌatuminug̃ saꞌag̃ koꞌi ete. Ieuwa topotkyꞌe kahato maꞌato religião ȳt pȳwo piatꞌi rakaria ȳt taꞌatuerohikꞌi taꞌatumimūꞌeria miꞌi pote Ieuwa ipyꞌahak kahato iꞌatuete. Toimomã yne hamuat religião ȳt pȳwo piatꞌi rakaria miꞌi hawyi ȳt uweꞌi aru ipuenti kuap e. — Iesui Aru e Hap 18:8, 21.
EREWANENTUP O ETIKUAP POꞌOG̃ HAMO
Mesūwat wemūꞌe hap puo pyi watikuap poꞌog̃ hamo aikotā̃ Tupana tipuenti religião ȳt pȳwo piatꞌi rakaria etiat hap iꞌatuminug̃ saꞌag̃ koꞌi etiat hap. Etikuap taꞌyn hawyi kat pote asom waku etiꞌywoporo te ewemūꞌe Ieuwa etiat hap.
4. Religião ȳt pȳwo piatꞌi rakaria piat tomontypot hap ȳt Tupana tikyꞌesatꞌi
Iraniaꞌīn teꞌeruwanentup hawe torānia religião koꞌi typy muap ewy maꞌato ahereto Tupana kape te iꞌatuꞌe. Maꞌato pȳwo asom. Eweimowempāp o Iruka 13:24. Miꞌi hawyi eiwoꞌoꞌehay o apoꞌe hap etiat.
Mesūwat puo pyi kat e eig̃ Tupana Ehay henoi okenꞌypy hampȳk iwatoꞌi rakat etiat.
Ewetehaꞌat pyno VÍDEO kape. Miꞌi hawyi eiwoꞌoꞌehay o apoꞌe hap etiat.
Torānia religião koꞌi asom inug̃ uiꞌe hap ewy e asom Tupana Ehay henoi.
5. Religião ȳt pȳwo piatꞌi rakaria ȳt timoherepꞌi Tupana woꞌopotkyꞌe hap ewy
Aikotā̃ aikotā̃ hap neꞌi religião ȳt pȳwo piatꞌi rakaria tunug̃ saꞌag̃ hap koꞌi. Miꞌi hap koꞌi puo pyi mītꞌīn tukupteꞌen pya kahato Tupana kai. Kotā̃ e hap. Religião ȳt pȳwo piatꞌi rakaria teꞌeruwat wuꞌuka hap kape iꞌewȳte taꞌatuhoꞌopowȳro. Miꞌi hap etiat watikuap poꞌog̃ hamo. Ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
Typuatꞌi wuꞌuka wato turān kan religião ȳt pȳwo piatꞌi rakaria tunug̃.
Ewanentup hawe aikotā̃ etipuenti iꞌatuminug̃ koꞌi etiat.
Eweimowempāp o Iuwãu 13:34, 35 hawyi 17:16. Miꞌi hawyi apoꞌe hap koꞌi ete eiwoꞌoꞌehay.
Erewanentup hawe aikotā̃ asom Ieuwa topyhuꞌat karāmpe tehaꞌat religião piaria hentup wuꞌuka haria upi iꞌewȳte taꞌatuhoꞌopowȳro pote.
Religião ȳt pȳwo piatꞌi rakaria tunug̃ kahato raꞌyn saꞌag̃ koꞌi hap ȳt taꞌatumoherepꞌi Tupana woꞌopotkyꞌe hap ewy. Iꞌatuminug̃ saꞌag̃ kape erehaꞌat raꞌyn. Kat hag̃ kape erehaꞌat raꞌyn.
Religião ȳt pȳwo piatꞌi rakaria ȳt taꞌatumoherepꞌi Tupana woꞌokyꞌe hap ewy
6. Tupana tiꞌatuhep terān kahato mītꞌīn religião ȳt pȳwo piatꞌi rakaria tote pyi
Eweimowempāp o Iesui Aru E Hap 18:4.a Miꞌi hawyi eiwoꞌoꞌehay o apoꞌe hap etiat.
Religião ȳt pȳwo piatꞌi rakaria sēse raꞌyn taꞌatohoꞌomaꞌat mītꞌīn miꞌi pote Ieuwa hoꞌopowȳro terān tuwenõꞌe itote pyi hamo. Miꞌi hap etikuap hawyi aikotā̃ erepyhuꞌat.
7. Etiꞌywoporo o Tupana sēse kuap hap etiat
Religião ȳt pȳwo piatꞌi rakaria minug̃ saꞌag̃ koꞌi kape erehaꞌat hawyi waku asom ereꞌywyk pya Tupana kai iꞌatuminug̃ saꞌag̃ koꞌi upi. Erenentup pyno kotā̃ e hap kape. Toꞌȳwot piat tonãpin hap koꞌi ewyꞌi toig̃neꞌen hawyi tuwẽtem naꞌyn toꞌȳwot yat pyi hawyi sēse raꞌyn tutunug̃ saꞌag̃ koꞌi iꞌȳwot ȳt tikyꞌesatꞌi pykai. Miꞌi pote asom waku ahehay saꞌag̃ iꞌȳwot ete iminug̃ saꞌag̃ koꞌi upi.
Religião ȳt pȳwo piatꞌi rakaria minug̃ saꞌag̃ koꞌi upi waku asom ahehay saꞌag̃ Ieuwa ete iꞌewȳte waku asom aipohep ikuap terān hap ete.
IRANIAꞌĪN TEꞌEROꞌE Areto terānꞌi religião koꞌi upi kat pote torānia inug̃ saꞌag̃ koꞌi iꞌatuꞌe.
Iꞌatuwanentup hap ewy erenentup wy.
Kat pote asom ȳt nakuꞌi religião ȳt pȳwo piatꞌi rakaria minug̃ saꞌag̃ upi neꞌi watuweꞌywyk pya Ieuwa kai.
WATUWEMŪꞌE RAꞌYN
Iꞌatueso hap koꞌi puo pyi iꞌewȳte iꞌatuminug̃ saꞌag̃ koꞌi puo pyi mītꞌīn pya tukupteꞌen Tupana kai. Miꞌi pote Tupana tiꞌatumomã yne hamuat religião ȳt pȳwo piatꞌi rakaria.
Hotꞌokꞌe te asom
Ewanentup hawe aikotā̃ etipuenti religião ȳt pȳwo piatꞌi rakaria eso hap koꞌi etiat iꞌewȳte iꞌatuminug̃ saꞌag̃ koꞌi etiat hap.
Aikotā̃ eig̃ Ieuwa tipuenti religião ȳt pȳwo piatꞌi rakaria etiat.
Kan Tupana tunug̃ hamuat religião ȳt pȳwo piatꞌi rakaria wȳwo.
ETIKUAP TERĀN POꞌOG̃ POTE
Etikuap hamo kat koꞌi puo pyi religião ȳt pȳwo piatꞌi rakaria timoherep ȳt taꞌatunug̃ꞌi Tupana mikyꞌesat hap ewy.
Kat pote asom Ieuwa tikyꞌesat tomontypot iraniaꞌīn tomontypot haria wȳwo hap.
Waku asom watuwaꞌatunug̃ iraniaꞌīn wȳwo Tupana montypot hamo. (Site jw.org piat)
Padre etiat etikuap hamo. Miꞌi tenentup hawe uhereligĩao inug̃ asom Tupana mikyꞌesat e miꞌi pote tohentup mowȳro hap pȳwuat e hap koꞌi kuap hamo.
Kat pote asom padre ȳt padre wo terānꞌi poꞌog̃ toig̃neꞌen. (Despertai!, fevereiro de 2015)
Nimo pyi te korā̃ te religião ȳt pȳwo piatꞌi rakaria iꞌatueso Tupana etiat. Miꞌi pote iraniaꞌīn teꞌeruwanentup Tupana tenentupꞌi ahewowi iꞌatuꞌe. Pȳwuat e hap koꞌi etiat etikuap hamo.
Iꞌatueso koꞌi hap upi pya kahato mītꞌīn tukupteꞌen Tupana kai (A Sentinela, 1.º de novembro de 2013)
a Tupana Ehay henoi religião ȳt pȳwo piatꞌi rakaria pe aikotā̃ haryporia tawa wato Papironia hap ewy. Miꞌi hap etiat erehaꞌat kuap Etikuap poꞌog̃ hamo e hap 1 kape.