Kat Eig̃ Tupana Set.

Karāmpe etikuap terān mīt hawyi apoꞌere het etiat. Kat ere e set ere. Maꞌato Tupana pe apoꞌere het etiat pote. Kat e ateig̃ tuweset enoi.

Uito Ieuwa e. — Esutu 6:6.

Erewanentup taꞌyn apo Tupana set Ieuwa e hap kape. Arenentup ȳtꞌi. Kat pote heremo kahatoꞌi Tupana Ehay pe Ieuwa e hap kat pote iraniaꞌīn tihep taꞌyn Tupana Ehay pyi hawyi Ieuwa set rote taꞌatuwan urukaꞌiwat e hap. Nimo kahato raꞌyn taꞌatuwan Tupana Ehay hebraico pusu puo turān taꞌatupehik Tupana set Ieuwa e hap iꞌatu wo kahato 7 miu wo. Hebraico pusu puo ti Tupana set muehay iãꞌag̃kap hap 4 YHWH sio JHVH hawyi Satere ywania pusu puo Ieuwa e.

Tupana set heremo Rolo do Mar Morto dos Salmos hebraico pusu puo pe — Rolo do Mar Morto dos Salmos Iesui ūt hap hawyi anu 30 pyi anu 50 kape. HEBRAICO PUSU PUO

Tupana set heremo Tradução de Tyndale inglês pusu puo pe — Tradução de Tyndale 1530, INGLÊS PUSU PUO

Tupana set heremo Versão Reina-Valera espanhol pusu puo pe — Versão Reina-Valera 1602, ESPANHOL PUSU PUO

Tupana set heremo Union Version Chinês pusu puo pe — *Union Version* 1919, CHINÊS PUSU PUO

Nimo Tupana Ehay hebraico pusu puo ti heremo kahato Tupana set iꞌewȳte iraniaꞌīn pusu puo pykai wy.

UWE PE TE ASOM WAKU TUPANA SET SUꞌAT HAP.

Waku kahato tuwepe te. Uweꞌi Tupana set nug̃. Tuwewi ti raꞌyn tuweset aira. Miotā̃ e Wuatꞌi eꞌāt piat uhet e. Meij̃uran miꞌiria emiariru miariruꞌīn waku uhet suꞌat miꞌiria e. (Esutu 3:15) Tupana Ehay pe heremo Tupana set sēseꞌi koꞌi Hesaika rakat Uruꞌȳwot Urukaꞌiwat Tupana e hap. Iꞌewȳte iraniaꞌīn set koꞌi wy Aparãu hawyi Muisei Tawi Iesui e hap etiat. Maꞌato poꞌog̃ torānia kai heremo Tupana set sēse Ieuwa e hap. Ieuwa tikyꞌesat torānia piat toset kuap hap. Tupana Ehay toꞌe Waku mītꞌīn ikuap eset ri Ieuwa e hap. Iꞌewȳte en yn ni yne mesuwarotiat morekuat no hat e. — Saumu 83:18, TNM.

Waku kahato Iesui pe wy. Iesui hoꞌomūꞌe topotmūꞌeria aikotā̃ me taꞌatuhentup kuap Tupana kape hap hawyi miotā̃ e Etimõkytsig̃ o eset e. (Mateu 6:9, TNM) Iꞌewȳte tohentup Tupana kapiat turān miotā̃ e Waku etimowato eset uiꞌȳwot e. (Iuwãu 12:28) Iesui pe poꞌog̃ waku torānia kai Tupana set mowato hap. Miꞌi pote Iesui toꞌe Tupana pe Haꞌawyte pyi te atimoherep eset uiwyriaꞌīn me. Iꞌewȳte ti aru meij̃uran wuaria pe wy e. — Iuwãu 17:26.

Waku kahato tomontypot haria pe wy. Nimuat Tupana montypot haria taꞌatukuap ti raꞌyn taꞌatuhenoi Tupana set hap upi teꞌeruwekawiano teꞌeruwehakyeraꞌat kuap hap. Tupana Ehay toꞌe Aipotypot set wyti toig̃neꞌen aikotā̃ wentup tawa apykok hap iheg̃ me kahato. Miꞌi kape mītꞌīn wakuaria tuwat hawyi taꞌatuꞌapykok pe hap ewy. (Porowepiu 18:10) Hawyi Tupana Ehay toꞌe wy Uwe hentup tehakyeraꞌat hap Tupana set upi miꞌi hat pe atum iꞌatuehakyeraꞌat hap e. (Iueu 2:32) Iꞌewȳte Tupana Ehay aimūꞌe Uwe Tupana montypot sēse haria ti tuwekuap taꞌatuhenoi Tupana set hap puo pyi ywania koꞌi ti aru iꞌatuewyry taꞌatueTupana set upi. Maꞌato miꞌi pykai ti aru aitoria ahewyry aheTupana Ieuwa set upi. — Mikeia 4:5; Iesui Potmūꞌeria 15:14.

TUPANA SET AIMŪꞌE

Het aimūꞌe kat tutunug̃ yne kuap hap. Wemūꞌe kahato haria henoi kat e terān Ieuwa set hap. Miotā̃ iꞌatuꞌe aikotā̃ tuwenug̃ yne kuap tomikyꞌesat koꞌi nug̃ hamo e. Tupana Ieuwa aipowȳro hotꞌokꞌe poꞌog̃ kat e terān toset etiat hap karāmpe toꞌe Muisei pe turān Arenug̃ hamo uimiꞌaira uimikyꞌesat ewy e. (Esutu 3:14) Miꞌi pote Tupana set aimūꞌe Tupana tunug̃ yne kat koꞌi maꞌato tutunug̃ kuap poꞌog̃ tominug̃ koꞌi wȳwo tomikyꞌesat ewy tuwemoherep hamo iꞌewȳte tuwenug̃ kuap tomikyꞌesat ewy. Tupana set koꞌi hoꞌokup kahato Yne nug̃ hat Hesaika kahato rakat Urukaꞌiwat e hap. Meig̃muewuat koꞌi puo pyi watikuap miꞌi hesaika kahato rakat iꞌewȳte miꞌi yn poꞌog̃ iwato torānia kawiat rakat. Maꞌato het sēse Ieuwa e hap puo pyi watikuap toimoherep aikotā̃ sēse miꞌi hap iꞌewȳte tutunug̃ yne kuap tomikyꞌesat hap.

Het timoherep aiwyꞌok wo toig̃neꞌen terān hap. Tupana set Ieuwa e hap aimūꞌe kahato tuwanentup ahewowiat hap miꞌi pote toikyꞌesat kahato toset kuap sēse hap. Ereset enoi ro uruepe iꞌatuꞌe mītꞌīn pykaiꞌi. Maꞌato tuwewi Tupana Ieuwa tuweset enoi ahepe. Miꞌi hap puo pyi watikuap Tupana ȳt tikyꞌesatꞌi pya watoig̃neꞌen hap maꞌato toikyꞌesat kahato towyꞌok sēse wo watoig̃neꞌen hap aikotā̃ mīt aiwyꞌok aiꞌyatype pe toig̃neꞌen hap ewy hap. — Saumu 73:28.

Karāmpe wahuꞌat Tupana set sēse hap pote watimoherep iwyꞌok wo sēse watoig̃neꞌen terān hap. Kotā̃ e hap. Wentup ok wyꞌok wo terān kahato ereig̃neꞌen hawyi apoꞌere het ete. Maꞌato ȳt tuweset enoi terānꞌi epe. Miꞌi pote aikotā̃ aten erepyhuꞌat. Miꞌi pote erenentup kuap uiwyꞌok wo terān asom toig̃neꞌen ere kuap. Miꞌi hap ewy kahato Tupana wȳwo. Maꞌato Tupana Ieuwa tuweset enoi ahepe iꞌewȳte toikyꞌesat wahuꞌat hap. Karāmpe wahuꞌat het sēse tuereto pote watimoherep Ieuwa wyꞌok wo watoig̃neꞌen terān hap. Karāmpe mīt tuwanentup Tupana set Ieuwa e hap kape pote Ieuwa tikuap miꞌi hap. — Marakia 3:16.

Pyno Tupana wyꞌok wo watoig̃neꞌen hamo waku watikuap het sēse ti. Miꞌi hap waku kahato watikuap. Maꞌato miꞌi hawyi waku watiꞌywoporo poꞌog̃ watikuap Tupana Ieuwa wat wakuat koꞌi hap etiat.

KAT E ASOM TUPANA SET. Tupana set sēse ti Ieuwa e. Tupana pȳwo rakat yn teset enoi kuap Ieuwa e. Iꞌewȳte Ieuwa e hap aikotā̃ tuwenug̃ yne kuap tomikyꞌesat koꞌi e hap ewy

UWE ASOM TUPANA NUG̃.

Mītꞌīn teꞌeruwanentup hawe Uwe asom Tupana nug̃ iꞌatuꞌe. Miꞌi hap taꞌatukuap kahato terān. Moꞌopuo asom en miꞌitā̃ terān wy. Pȳwo watikuap kahato terān Tupana yne nug̃ hat pote atipy pe hawyi mesūwat yi tote pote Uwe asom pyno Tupana nug̃.

Tupana Ehay henoi wuatꞌi eꞌyj̃an me Tupana tunug̃ atipy iꞌewȳte yi e. Miꞌi hap ete cientista koꞌi tipȳwo kahato kat pote taꞌatukuap waikiru hawyi mesūwat mytyp ȳt tuwewiꞌi tuwenug̃ hap. — Ienesi 1:1.

Mesūwat mytyp ȳt tuwewiꞌi tuwenug̃ ȳt aikotā̃ me kuapꞌi yne tuwenug̃ wy. Miꞌi pote watikuap ȳt iunteꞌen pyiꞌi tuwemoherep hap. Ȳt uweꞌi toig̃neꞌen mesūwat mytyp hap eꞌyjan mete pote aikotā̃ me kuapꞌi tuwemoherep mesūwat mytyp. Erewanentup pyno korā̃ toig̃neꞌen ni raꞌyn wentup ok hesaika kahato rakat mesūwat mytyp nug̃ hap eꞌyj̃an mete. Miꞌi ti Ieuwa. Ieuwa toig̃neꞌen maꞌãu yn ȳt heremoꞌi. Ieuwa hesaika kahato ȳt uweꞌi hesaika hap ete ipo putꞌokꞌe. Toweꞌeg̃ hap wȳwo tutunug̃ yne mesūwat yi mytyp totiat.— Iuwãu 4:24.

Tupana Ehay toꞌe yityꞌok koꞌi tukupteꞌen hamuat eꞌyj̃an mete ti iꞌewȳte yi saꞌawynug̃ hap eꞌyjan mete ti en ereig̃neꞌen naꞌyn e. (Saumu 90:2) Pyno mesūwat henoi Tupana Ieuwa nug̃ ȳt uweꞌi maꞌato miꞌi wuatꞌi eꞌāt piat ieig̃neꞌen hat hawyi wuatꞌi eꞌāt pe hamo ti raꞌyn toig̃neꞌen. Tupana Ehay henoi wuatꞌi nug̃ hat Tupana e. Pyno miꞌi hap puo pyi watikuap Tupana Ieuwa yne saꞌawynug̃ hat atipy pe hawyi mesūwat yi tote rakat. — Iesui Aru E Hap 4:11.