Xorꞹ 6

¡A gua e̱je̱ yo paa ma e Mizhokjimi ra tsjaa ne xoñijomꞹ me rga zøø!

Texe kja ne xoñijomꞹ kjogꞹ kʼo dya ga joo ngekʼua ri ꞹnkʼojme nguenrra kʼꞹ a gua e̱je̱ yo paa ma e Mizhokjimi ra tsjaa ne xoñijomꞹ me rga zøø. Ne Biblia o mama kʼꞹ ro minkʼoji paa kʼꞹ me rrꞹ sezhi ante kʼe ro sⱥdⱥ kʼe paa ma e Mizhokjimi ra tsjaa ne xoñijomꞹ me rga zøø, nudyo paa yo nge yo ri ka̱ra̱ji dya. Xorgeba ngekʼua ri ñuu pje go mama ne Biblia kʼꞹ ro kjogꞹ:

Chu̱u̱ kʼꞹ ix na nojo. «Yo país ra chu̱ji ko yo ñaja país. Kʼo rey ra chu̱ji ko kʼo ñaja rey.» (Mateo 24:7.) A kjogꞹ kʼo junsꞹ kja ne Biblia. Ne kjɇɇ 1914 nge ma o mbꞹrꞹ o tsjaji yeje chu̱u̱ kʼꞹ ix ma nojo texe kja ne xoñijomꞹ, dya soyaji xi kjatrjoji yo chu̱u̱ kʼꞹ dya nrra na nojo. Me na punkjꞹ ntee kʼꞹ o nrru̱ji.

Texe kja ne xoñijomꞹ bʼꞹbʼꞹ nrrotkʼijeme. Ra bʼꞹbʼꞹ «na punkjꞹ o jñiñi kʼo ra nzhodʼꞹ o ngeme kʼo me na zezhi» (Lucas 21:11). ¿Kjo a kjogꞹ yo mamaba? Ja̱a̱. Ka̱ra̱ ntee kʼꞹ sodyeji, ne cáncer, ne tuberculosi, ne diabete, ne sida, xo bʼꞹbʼꞹ ntee kʼe sodye in mꞹbʼꞹ, xo bʼꞹbʼꞹ nrre nʼaño ngijeme ngekʼua a go nrru̱ji na punkjꞹ ntee.

Na punkjꞹ ntee kjogꞹji trjijmi. Ne Biblia mama: «Ra zoji trjijmi» (Marcos 13:8). Texe kja ne xoñijomꞹ nga̱ra̱ ntee kʼꞹ dya nrra pɇsʼi pje ra siji. Tsjɇma, tsjɇma, me na punkjꞹ ntee nrru̱ji nge kʼꞹ bextrjoji pje ra siji. Ñeje yo, nee ra mama kʼꞹ dya kja ra mezhe ma e Mizhokjimi ra tsjaa ne xoñijomꞹ me rga zøø.

Ro mbii na zezhi ne xoñijomꞹ. Ne Biblia mama: «Ra mbii na zezhi ne xoñijomꞹ.» (Mateo 24:7.) Nge kʼo kjogꞹ nu paa kʼꞹ ri ka̱ra̱ji dya. Ndeze 1914 asta nu paa kʼꞹ ri ka̱ra̱ji dya, na punkjꞹ ntee a nrru̱ji ma mbii na zezhi ne xoñijomꞹ.

Ka̱ra̱ji ntee kʼꞹ na sʼonte. Yo ntee «me ra neji o merio» ñe «yo ntee ra sʼiyatsjeji; dya ra sʼiyaji yo nin minteji». «Ra tsjaa yo ntee, dya ra mⱥpⱥji Mizhokjimi; ra mⱥpⱥji kʼo netsjeji». Yo chʼii «dya ra dyⱥtⱥji kʼo nu tataji» (2 Timoteo 3:1-5). ¿Kjo a gui nuu kʼꞹ nge dya yo paa kʼꞹ ka̱ra̱ji ntee kʼꞹ mimiji akjanu? Dya dyⱥrⱥji Mizhokjimi ñe kjapꞹji kʼo na sʼoo yo ntee kʼꞹ kja pjurꞹ xorꞹji nu jñaa e Mizhokjimi.

Yo ntee kjaji kʼo na sʼoo. Ne Biblia mama kʼe yo ntee «dya kja [ro] ⱥtⱥji Mizhokjimi» (Mateo 24:12). Mbuma gi nuu kʼe nge yo kjɇɇ yo ri ka̱ra̱ji dya, na punkjꞹ ntee dya nee ra jieziji kʼo na sʼoo, bʼꞹnkʼo ponꞹ, dyompꞹji yo ntee, nge yo kjogꞹ texe kja ne xoñijomꞹ, ngekʼua texezgoji soo ra kjogꞹ kʼo na sʼoo.

Texe kʼo kjogꞹ ñetsʼe kʼꞹ a gua e̱je̱ nu Reino e Mizhokjimi. Ne Biblia mama: «Ma ri jñanrraji kʼꞹ ya ra zⱥdⱥ yo ri xitsʼkʼoji, ri pa̱ra̱geji ma kʼꞹ ya ra mandago nutsʼkʼo o ñebgego Mizhokjimi» (Lucas 21:31). ¿Pje ngeje nu Reino e Mizhokjimi? Nge nu manrro o nu gobierno e Mizhokjimi kʼꞹ bʼꞹbʼꞹ ajensʼe, ne gobierno nge kʼo ra tsjaa ne xoñijomꞹ me rga zøø. Dya kja kjo ra bʼꞹbʼꞹ kʼo ra manda, ngextrjo nu Reino e Mizhokjimi (Mateo 6:10, NTD).