Xorꞹ 7

¿Pje jitsʼkʼoji kʼo o kjogꞹ mi jingua?

Ma ra tsjaa ne xoñijomꞹ me rga zøø e Jehová dya ra jiezi kʼꞹ yo ntee ra sodʼꞹji. Yo ntee kʼꞹ joji na joo ko e Mizhokjimi nge yo ra miminu. ¿Pje ra kjogꞹ yo ntee kʼꞹ na sʼonte? Ra nuji pje go kjogꞹ e Noé ngekʼua ra pa̱ra̱ji. E Noé o mimi mi jingua. Mi ngeje na bʼɇzo kʼꞹ me ma jonte, e Noé pama pama mi kjaa ko texe in mꞹbʼꞹ kʼo mi nee e Jehová. Nrrexe yo ntee kʼo mi ka̱ra̱ kja ne xoñijomꞹ mi kjaji kʼo na sʼoo. Ngekʼua e Jehová o xipji e Noé kʼꞹ ro peñe na trʼadyɇbʼɇ kʼꞹ ro kjuatꞹ texe yo ntee kʼꞹ ma sʼonte. Xo go xipji kʼꞹ ro dyⱥtrʼⱥ da trʼabʼꞹꞹ y ro ngichi amboo, ngekʼua ma ro ñeje kʼe trʼadyɇbʼɇ angeze ñe kʼo mi ka̱ra̱ kja in nzumꞹ dya ro nrru̱ji (Génesis 6:9-18).

E Noé ñe texe kʼo mi ka̱ra̱ kja in nzumꞹ go dyⱥtrʼⱥji da trʼabʼꞹꞹ. E Noé o xipji yo ntee kʼꞹ ro ñeje da trʼadyɇbʼɇ, dya kjo o dyⱥrⱥ, dya mi nee ro jiezi kʼo ma sʼoo. Ma o nguarꞹ e Noé kʼe trʼabʼꞹꞹ, o tsjopkʼꞹji amboo añimale, kjanu o kjogꞹ amboo angeze ñe kʼo mi ka̱ra̱ kja in nzumꞹ. Nukʼua e Jehová o tsjaa kʼꞹ ro ñeje da trʼadyɇbʼɇ, o ñeje kuarenta paa ñe kuarenta xomꞹ, o nizhi nrreje kja ne xoñijomꞹ (1 Pedro 3:20).

Yo ntee kʼꞹ me ma sʼoo o nrru̱ji, e Noé ñe kʼo mi ka̱ra̱ kja in nzumꞹ dya o nrru̱ji. Ma o ñeje kʼe trʼadyɇbʼɇ e Jehová o pjorꞹ angezeji, ñe o tsjaa kʼe ro minji kja ne xoñijomꞹ, dya kja mi bʼꞹbʼꞹ kʼo ma sʼoo nu (Génesis 7:22, 23). Ne Biblia mama kʼꞹ yepe ra e̱je̱ da paa kʼꞹ e Jehová ra kjuatꞹ kʼo dya nee ra kjaji kʼo nee angeze. E Jehová dya ra kjuatꞹ yo ntee kʼꞹ na jonte, nujyo ra mimiji texe yo paa kja ne xoñijomꞹ kʼꞹ me rga zøø (2 Pedro 2:5, 6, 9).

Nudyo paa dya, na punkjꞹ ntee kjaji kʼo na sʼoo. Kja texe ne xoñijomꞹ bʼꞹbʼꞹ nrrumꞹ. E Jehová yepe yepe peñe in nrrestigo kʼꞹ ra ma xiji yo ntee pje ra kjogꞹ, bʼꞹbʼꞹ kʼo dya nee ra dyⱥrⱥji kʼo mama e Jehová. Dya nee ra jieziji kʼo na sʼoo, dya neji kʼꞹ e Jehová ra xipjiji pje nge kʼo na joo y pje nge kʼo na sʼoo. ¿Pje ra kjogꞹji yo ntee yo? ¿Kjo ra sⱥjⱥ yo paa kʼꞹ ra ⱥtⱥji e Mizhokjimi? Na punkjꞹ ntee dya ra jieziji kʼo na sʼoo. Ra sⱥjⱥ kʼe paa ma e Mizhokjimi ra nguarꞹ yo ntee kʼꞹ me sʼonteji (Salmo 92:7).

E Mizhokjimi dya ra kjuatꞹ ne xoñijomꞹ; kʼo ra tsjaa ra tsjaa ne xoñijomꞹ me rga zøø. Yo ntee kʼꞹ ra joji na joo ko e Mizhokjimi, ra mimiji texe yo paa kja ne xoñijomꞹ kʼꞹ me rga zøø (Mateo 5:5).