Jelemiya
16 Yehova wanjilekele lalo ngwendi: 2 “Kuwapandele kwambata munakazi, co lalo kuwapandele kukala na bana ba banalume na ba banakazi muno mu mwela. 3 Mwafwa ebi bikebyo binjinendeka yange Yehova kutalesa ku bana ba banalume na bana ba banakazi baje bali na kusemukila muno na kutalesa kuli bainabo na baishabo baje bali na kubakitila muno mu lifuti, ngwange: 4 ‘Bakatsa ku mishongo yakama, oloni naumo wahi akabalila nambe kubatsinda. Bakapwa ngwe bwilo hasi. Bakanyonga na mukwale na njala yakama, co mibila yabo ikapwa byakulya bya tuzila na bikashama ba ha lifuti-libu.’
5 Mwafwa Yehova nendeka ngwendi,
‘Keti ukobele mu njibo mubali na kulila byakulya baka-kulila,
Co keti ulile nambe kubazembeleka.’
Yehova nendeka ngwendi, ‘Mwafwa njinanyeke aba banu kwoloka kwange,
Na cizemo cange cije kucesi kutenguluka, na mema ku mbunge.
6 Banu bakama na babandondo bakatsila muno mu lifuti.
7 Co naumo wahi akana byakulya baje bali na kulila
Mangana abazembeleke mwafwa ya kutsisa.
Co lalo naumo wahi akabana nganja ya binyu ya kubazembeleka
Mangana banwe mwafwa ya kutsisa baishabo nambe bainabo.
8 Keti ukobele mu njibo mubali na kulila byakulya
Na kutumama nabo mangana ulye nabo na kunwa nabo.’
9 “Mwafwa Yehova wa maswalale, Njambi ya Isalele, nendeka ngwendi, ‘Muno mu mwela, mu matangwa eni, njikolwesa miyoyo ya kulisamba na kubwahelela. Njikolwesa lijwi lya cambato na lijwi lya shombolwa oku muli na kulimwena na mesho eni.’
10 Muukaleka aba banu awa majwi, bakakwihula ngwabo, ‘Yehova nendekela bika ngwendi obu bukalu bwakama bukalingiwa kuli yetu? Mulonga muka na bubi muka butunalingi kuli Yehova Njambi yetu?’ 11 Unapande kubakumbulula ngwobe, ‘Yehova nendeka ngwendi, “Mwafwa bakukulwila beni banjisezele, co batwaleleleleho kukabangeya binjambi beka na kubapangela na kubatsikamena, oloni yange banjisezele, co kubononokele lishiko lyange. 12 Co yeni bubi bweni bunai mweka kutubakana bakukulwila beni, co umo na umo weni natindibala na kukabangeya mbunge yendi yaibi kutubakana kunjononoka. 13 Ngeci, njikamitundisa muno mu lifuti na kumishekela mu lifuti lije kumuzibuka, lije lalo kubazibukile bakukulwila beni, co mukapangela binjambi beka butsiki na mutanya, mwafwa kunjikamitetela.”’
14 “‘Oloni matangwa ali na kwija,’ mukemwo mwanendeka Yehova, ‘omwo kubakendeka lalo ngwabo: “Njilisinga hali Yehova wa kuyoya uje watundisile banu ba Isalele mu lifuti lya Ijipiti.” 15 Oloni bakendeka ngwabo: “Njilisinga hali Yehova wa kuyoya uje watundisile banu ba Isalele mu lifuti lya ku kunto* na mu mafuti mwoshe mwabashandwelele,” co njikabelwisa ku lifuti lyabo lije linjanene bakukulwila babo.’
16 Yehova nendeka ngwendi, ‘Njikasana baka-kutsiya bisi babangi,
Co bakubatsiya.
Kutundaho, njikasana biyambi babangi,
Co bakubayomba ha minkinda yoshe na ha malundu hoshe
Na mu mamanya.
17 Mwafwa mesho ange ali na kumona byoshe bibali na kulinga.
Kubyalishwekele ku mesho ange,
Co lalo milonga yabo ili hashandangala ku mesho ange.
18 Cakulibanga njikabana kashitiko mu kushula mwafwa ya milonga yabo na bubi bwabo,
Mwafwa banajwalesa lifuti lyange na tumponya babo ba bunyengwe ba kujeneka kuyoya,
Co banashulisa buswana bwange na byuma byabo bya bunyengwe.’”
19 Obe Yehova, yobe nzili yange na cimpaka cange,
Yobe mwela wange wa kutewela ha litangwa lya bukalu,
Miyati ikatunda ku mamaneselelo a lifuti-libu ikaija kuli yobe,
Co bakendeka ngwabo: “Bakukulwila betu baswanene makuli,
Baswanene byuma byangoco bya kujeneka seho.”
20 Kuma munu asa kulipangela binjambi ndi?
Byuma byapanga keti binjambi bene.
21 “Ngeci njikabalingisa bazibuke,
Ha simbu oyo, njikabalingisa bazibuke nzili yange na kukanyama kwange,
Co bakazibuka ngwabo lizina lyange yange Yehova.”