Jelemiya
28 Mu mwaka uje bene, ku mashangumukilo a ciyulo ca mwene Zedekiya wa Juda, mu mwaka wamuciwana mu ngonde yamucitanu, kapolofweto Hananiya muna Azale wa ku Gibioni wendekele kuli yange mu njibo ya Yehova ku mesho a tupilistu na banu boshe ngwendi: 2 “Yehova wa maswalale, Njambi ya Isalele nendeka ngwendi, ‘Njipokola joko ya mwene wa Babiloni. 3 Myaka ibali kutunda hano, njikelwisa bikwata byoshe bya mu njibo ya Yehova muno mu mwela, bije byaambatele mwene Nebukadineza wa Babiloni muno mu mwela na kubitwala ku Babiloni.’” 4 “‘Co njikelwisa Jekoniya muna Jehoyakimu, mwene wa Juda, muno mu mwela na banu boshe ba mu Juda baje banai mu bufunge ku Babiloni, mwafwa njikapokola joko ya mwene wa Babiloni,’ mukemwo mwanendeka Yehova.”
5 Co kapolofweto Jelemiya wendekele na kapolofweto Hananiya oku tupilistu na banu boshe baje bemanene mu njibo ya Yehova bali na kumona. 6 Kapolofweto Jelemiya wendekele ngwendi: “Ameni!* Yehova alinge ngoco. Yehova ashulisilile majwi aunapolofweta ha kwilwisa bikwata byoshe bya mu njibo ya Yehova na boshe baje banai mu bufunge, kutunda ku Babiloni na kwiluka muno mu mwela. 7 Oloni njikulomba utolilile ku muzimbu unjendeka kuli yobe na kuli aba banu boshe. 8 Kusañulu, tupolofweto baje bakeleko simbu kanda njikaleko, nobe simbu kanda ukaleko, bakele na kupolofweta kutalesa ku mafuti amangi na bumwene bwakama. Bapolofwetele bya nzita, bya bukalu na bya mishongo ya kulitambwisa. 9 Nga kapolofweto apolofweta bya kwoloka, co lijwi lya uje kapolofweto lilishulisilila, co banu bazibuka ngwabo cili bene Yehova ikeye namutumine.”
10 Co kapolofweto Hananiya wambatele joko yakele ha singo ya kapolofweto Jelemiya na kuipokola. 11 Co Hananiya wendekele ku mesho a banu boshe ngwendi: “Yehova nendeka ngwendi, ‘Omu mukemwo munjikapokwela joko ya mwene Nebukadineza wa Babiloni na kuitundisa ha bisingo bya baka-mafuti munima ya myaka ibali.’” Co kapolofweto Jelemiya waile.
12 Kapolofweto Hananiya mwapokwele joko ije yakele ha singo ya kapolofweto Jelemiya, Yehova walekele Jelemiya ngwendi: 13 “Ya ukaleke Hananiya ngwobe, ‘Yehova nendeka ngwendi: “Unapokola joko ya citi, oloni joko ya cikubo ikeyo ingamo.” 14 Mwafwa Yehova wa maswalale, Njambi ya Isalele nendeka ngwendi: “Njikaka joko ya cikubo ha bisingo bya baka-mafuti oshe awa mangana apangele mwene Nebukadineza wa Babiloni, co anapande kumupangela. Njikamwana na bikashama ba mu shwata.”’”
15 Co kapolofweto Jelemiya walekele kapolofweto Hananiya ngwendi: “Njikulomba unjitolilile obe Hananiya, Yehova kakutumine, oloni unalingisa aba banu bakulahele byuma bya makuli. 16 Ngeci, Yehova nendeka ngwendi, ‘Tala! Njikunyongesa ha lifuti-libu. Uno mwaka utsa, mwafwa unalingisa banu banjitengulukile yange Yehova.’”
17 Ngeci kapolofweto Hananiya watsile uje bene mwaka mu ngonde ya bu 7.