Jelemiya
34 Yehova wendekele na Jelemiya omwo Mwene Nebukadineza* wa Babiloni na maswalale bendi boshe na bumwene bwoshe bwa ha lifuti-libu buje bwakele mwisi yendi na banu boshe bakele na kulwisa Jelusalema na binganda byayo byoshe, ngwendi:
2 “Yange Yehova Njambi ya Isalele njinendeka ngwange, ‘Ya ukasimutwiye na Mwene Zedekiya wa Juda na kukamuleka ngwobe: “Yange Yehova, njinendeka ngwange, ‘Ei nganda njili na kuyana mu maboko a mwene wa Babiloni, co akayenyeka na tuhya. 3 Co kuukasa kupusunuka mu liboko lyendi, mwafwa bakakukwata na kukwana mu liboko lyendi. Co ukamona mwene wa Babiloni na mesho obe kapu, co akasimutwiya nobe mesho na mesho, co ukaya ku Babiloni.’ 4 Oloni tolilila lijwi lyange Yehova, obe Mwene Zedekiya wa Juda, ‘Yange Yehova njili na kwendeka kutalesa kuli yobe ngwange: “Kuukatsi ku mukwale. 5 Ukatsa mu kwoloka, co bakakulingila cilika ca kwenyeka isense ngwe mubalingile kuli bakukulwila bobe baje bapwile bimyene simbu kanda upwe mwene, co bakakulila ngwabo, ‘Nani shukulu yetu,’ mwafwa ‘njinendeka eli lijwi,’ yange Yehova njinendekamo.”’”’”
6 Kapolofweto Jelemiya wendekele awa majwi oshe kuli Mwene Zedekiya wa Juda mu Jelusalema 7 omwo maswalale ba mwene wa Babiloni bezile na kulwisa Jelusalema na binganda byoshe bya Juda bije byasaleleho. Balwisile nganda ya Lakishi na nganda ya Azeka mwafwa bikebyo lika binganda bya kukola bya Juda byasaleleko.
8 Yehova wendekele na Jelemiya omwo Mwene Zedekiya walingile cikumiiyo na banu boshe mu Jelusalema ca kwambulula bya kupatula bindungo, 9 ngwendi munu woshe napande kupatula bindungo bendi ba baHebelu ba banalume na ba banakazi mangana keti kukale umo akwata mukwabo kaJuda kupwa ndungo yendi. 10 Ngeci bamyata boshe na banu boshe bononokele. Balikumiiye ngwabo munu na munu apatula bindungo bendi ba banalume na ba banakazi, co ngwabo kubabakwata lalo bundungo. Boshe bononokele na kubecela baye. 11 Oloni mu kwita kwa simbu, belwisile lalo baje bindungo ba banalume na ba banakazi baje babapatwile, co babakwatele lalo na kubapwisa bindungo. 12 Co Yehova wendekele na Jelemiya. Yehova wendekele ngwendi:
13 “Yange Yehova Njambi ya Isalele njinendeka ngwange, ‘Njalingile cikumiiyo na bakukulwila beni ha litangwa linjabatundisile mu lifuti lya Ijipiti, mu njibo ya bundungo, co njabalekele ngwange: 14 “Ku mamaneselelo a myaka 7, umo na umo weni napande kupatula ndolome yendi wa kaHebelu uje ibalandesele kuli ikeye uje namupangela ha myaka 6. Napande kumupatula.” Oloni bakukulwila beni kubanjitolilile nambe kujendekela matwi abo kuli yange. 15 Co ololo aha munatengulukile na kulinga byuma byabibwa ku mesho ange ha kwambulula bya kupatuka kuli bakweni banu, co munalingile cikumiiyo kulutwe lwange mu njibo ije imanena lizina lyange. 16 Oloni munatengulwile bisinganyeka byeni na kushawisa lizina lyange ha kwilwisa bindungo beni ba banalume na ba banakazi baje bamwapatwile mangana base kuya kwoshe kubashaka, co mwabakwatele lalo na kubapwisa bindungo.’
17 “Mukemwo Yehova nendeka ngwendi: ‘Kumwanjononokele ha kujeneka kupatula ndolome yeni nambe mukweni munu. Ngeci hanwoni njambulula bya kupatuka kuli yeni,’ mukemwo mwanendeka Yehova. ‘Njimipatula ha kumitsiya na mukwale na mushongo wa kulitambwisa na njala, co njikamipwisa cuma ca kukomokesa ku bumwene bwoshe bwa ha lifuti-libu. 18 Ebi bikebyo bikalingiwa ku banu baje banapokola cikumiiyo cange ha kujeneka kwononoka majwi a cikumiiyo cije cibalikumiiye kulutwe lwange mubatetele muna ngombe hakati na kwita mukati ka ije mitamba. 19 Aba banu banapu bamyata ba Juda na bamyata ba Jelusalema na bakulunu ba mu nkuta na tupilistu na banu boshe ba mu lifuti baje betile mukati ka mitamba ya uje muna ngombe. 20 Njikabana ku bitozi babo na kuli baje bashaka kubatsiya, co bibimbi byabo bikapwa byakulya bya tuzila na bikashama ba ha lifuti-libu. 21 Co Mwene Zedekiya na bamyata bendi njikabana mu maboko a bitozi babo na mu maboko a baje batonda kubatsiya na mu maboko a maswalale ba mwene wa Babiloni baje banashakele kumilwisa, oloni bali na kwiluka.’
22 “Yehova nendeka ngwendi, ‘Njikabashika na kubelwisa muno mu nganda, co bakailwisa na kuifungulula na kuyenyeka na tuhya, co binganda bya Juda njikabipwisa bingundu, co kumukakala munu.’”