Jelemiya
40 Jelemiya mubamupatwile ku Lama kuli Nebuzaladani mukulunu wa baka-kunyunga, Yehova wendekele nendi. Nebuzaladani wamutwalele kuje oku namukutu malyenge ku maboko, co Jelemiya wakele hakati ka banu boshe ba mu Jelusalema na banu ba mu Juda baje babakele na kutwala mu bufunge ku Babiloni. 2 Co mukulunu wa baka-kunyunga wambatele Jelemiya na kumuleka ngwendi: “Yehova Njambi yobe wapolofwetele ngwendi obu bukalu bukeja omu mu lifuti, 3 Co Yehova nalingi bene muje mwendekelele mwafwa munalingi bubi ku mesho a Yehova, co kumwononokele lijwi lyendi mukemwo ebi byuma binalingiwa kuli yeni. 4 Lelo njikuzitula malyenge ali ku maboko obe. Nga ushaka wasa kuya nange ku Babiloni, co njikakunyunga mwamubwa. Oloni nga kuushaka kuya nange ku Babiloni, co keti uye nange. Tala! Lifuti eli, wasa kuya kwoshe kuushaka.”
5 Simbu kanda Jelemiya atenguluke na kuya, Nebuzaladani wamulekele ngwendi: “Iluka kuli Gedaliya muna Ahikamu, Ahikamu muna Shafani, uje yanangula mwene wa Babiloni ngwendi atwamenene binganda bya Juda, co ukakale nendi hamolika na banu bali mu lifuti, nambe ya kwoshe-kwoshe kuushaka.”
Co mukulunu wa baka-kunyunga wamwanene byakulya na bwana bumo na kumwecela aye. 6 Ngeci Jelemiya waile kuli Gedaliya muna Ahikamu ku Mizipa, co wakakele nendi hamolika na banu baje basalele mu lifuti.
7 Mu kwita kwa simbu, bakulunu ba maswalale boshe na maswalale babo baje bakele kulako na bimbongi bazibile ngwabo mwene wa Babiloni nangula Gedaliya muna Ahikamu ngwendi atwamenene lifuti lya Juda, co lalo wamwangile ngwendi atwamenene banalume na banakazi na banike ba tuhutu ba muje mu lifuti baje kubaile ku Babiloni. 8 Ngeci bezile kuli Gedaliya ku Mizipa. Aba bezile bapwile: Ishimaele muna Nethanaya, Johanani na Jonathani, bana ba Selaya, Selaya muna Tanihumeti, bana ba Efai wa kaNetofa na Jezaniya muna Makathi, hamolika na banu babo. 9 Gedaliya muna Ahikamu, Ahikamu muna Shafani walisingile kuli bakebo na ku maswalale babo ngwendi: “Keti mutewe kupangela baKaudiya, kaleni mu lifuti na kupangela mwene wa Babiloni, co byuma bimyendela mwamubwa. 10 Oloni yange njikala mu Mizipa mangana njimimanene ku baKaudiya baje baija kuli yetu. Oloni yeni munapande kukungulula binyu na bushuka bwa mu ntondwe na mazi na kubyaka mu bikwata byeni bya kutulikila na kukala mu binganda bimunaswana.”
11 Co baJuda boshe baje bakele mu Mowabi na mu Amoni na mu Edomu na baje boshe bakele mu mafuti eka nabo bazibile ngwabo mwene wa Babiloni natabesa bamo babandondo ngwendi basale mu Juda, co lalo ngwabo nangula Gedaliya muna Ahikamu, Ahikamu muna Shafani ngwendi abatwamenene. 12 Ngeci baJuda boshe bashangumukile kwiluka kutunda ku mitambela yoshe kubabashandwelele, co belukile mu lifuti lya Juda kuli Gedaliya ku Mizipa, co bakungulwile binyu na bushuka bwa mu ntondwe mu bwingi manene.
13 Johanani muna Kaleya na maswalale bendi boshe na bantwama ba maswalale boshe baje bakele mu mitambela yakele kulako na bimbongi bezile kuli Gedaliya ku Mizipa. 14 Bamulekele ngwabo: “Kuma kuuzibuka ngwobe Balisi mwene wa baAmoni natumu Ishimaele muna Nethanaya ngwendi akukutsiye ndi?” Oloni Gedaliya muna Ahikamu kabakulahelele.
15 Co Johanani muna Kaleya walekele Gedaliya ku bushweke ku Mizipa ngwendi: “Njishaka kuya na kutsiya Ishimaele muna Nethanaya, co wahi azibuka, mwafwa bika byakutsiila na kulingisa banu boshe aba ba Juda balishandangane na baje banasalako mu Juda mangana banyonge?” 16 Oloni Gedaliya muna Ahikamu walekele Johanani muna Kaleya ngwendi: “Keti ulinge ngoco mwafwa biuli na kwendeka hali Ishimaele binapu bya makuli.”