Jelemiya
43 Jelemiya mwamanesele kuleka banu boshe majwi oshe aje atundile kuli Yehova Njambi yabo, majwi oshe amutumine Yehova Njambi yabo ngwendi abaleke, 2 Azariya muna Hoshaya na Johanani muna Kaleya na banu boshe ba likamba balekele Jelemiya ngwabo: “Makulyobe! Yehova Njambi yetu kakutumine ngwendi wakwendeke ngwobe, ‘Keti muye na kukala ku Ijipiti.’ 3 Oloni Baluki muna Nelaya ali na kukushongangeya ngwendi utwane mu maboko a baKaudiya mangana batutsiye na kututwala mu bufunge mu Babiloni.”
4 Ngeci Johanani muna Kaleya na bantwama ba maswalale boshe na banu boshe kubononokele lijwi lya Yehova mwabalekele ngwendi bakale mu lifuti lya Juda. 5 Oloni Johanani muna Kaleya na bantwama ba maswalale boshe bambatele banu baje basalele mu Juda, boshe baje belukile mu lifuti lya Juda kutunda ku mafuti oshe kuje kubashandokelele. 6 Bambatele banalume, banakazi, banike, bana ba mwene ba banakazi na boshe baje baasezele Nebuzaladani mukulunu wa baka-kunyunga mu maboko a Gedaliya muna Ahikamu, Ahikamu muna Shafani. Bambatele na kapolofweto Jelemiya na Baluki muna Nelaya, 7 co baile ku lifuti lya Ijipiti, mwafwa kubononokele Yehova, co baketele na ku Tapanesi.
8 Co Yehova wendekele na Jelemiya mwakele ku Tapanesi, ngwendi: 9 “Ambata mamanya akama uwake mukati ka mabrikisi aje ali ku cikolo ca njibo ya Falo mu Tapanesi, co uwafwike daka oku baJuda bali na kukumona. 10 Co ubaleke ngwobe, ‘Yehova wa maswalale, Njambi ya Isalele nendeka ngwendi: “Njituma ngamba yange Nebukadineza* mwene wa Babiloni, co njikaka litanda lyendi helu lyawa mamanya anjinashweke, co akajangumwina tenti yendi ya bumwene hakamwa yawo. 11 Co akaija na kulwisa lifuti lya Ijipiti. Co bamo beni bakatsa ku mushongo uje utsiya, bamo beni bakaya mu bufunge, co bamo beni bakatsa ku mukwale. 12 Njikenyeka binjibo bya binjambi ba Ijipiti, co akabyenyeka na kubatwala mu bufunge. Akalifwika lifuti lya Ijipiti ngwe kanyungi mwakalifwiki cizalo cendi, co akatunda muje mu lifuti mu kwoloka.* 13 Co akabwabwanya bingunzi bya Bethi-shemeshi* mu lifuti lya Ijipiti, co akenyeka na binjibo bya binjambi ba Ijipiti.