Jelemiya

27 Ku mashangumukilo a ciyulo ca Jehoyakimu muna Josiya, mwene wa Juda, Yehova walekele Jelemiya ngwendi: 2 “Yehova nanjileke ngwendi, ‘Lyosele mikole na kulipangela bijoko, co byake mu singo yobe. 3 Co bitume kuli mwene wa Edomu na mwene wa Mowabi na mwene wa baAmoni na mwene wa Tile na mwene wa Sidoni, co byane ku tutumwa baje banaija ku Jelusalema kuli mwene Zedekiya wa Juda. 4 Bashike bakaleke bashukulu babo ngwabo:

“‘“Yehova wa maswalale, Njambi ya Isalele nendeka ngwendi, munapande kukaleka bashukulu beni ngweni: 5 ‘Yange njatangele lifuti-libu na banu na tusitu baje bali ha lifuti-libu kupangesa nzili yange yakama na liboko lyange lya kukanyama, co njinana eli lifuti kuli woshe injishaka.* 6 Co njinana awa mafuti oshe mu liboko lya ngamba yange Mwene Nebukadineza wa Babiloni. Njinamwana na tusitu ba mu shwata mangana bamupangele. 7 Mafuti oshe akamupangela na kupangela munendi na mutekulyendi kweta noho habukahwila bumwene bwendi omwo mafuti amangi na bimyene bakama bakamupwisa ndungo yabo.’

8 “‘“‘Nga lifuti nambe bumwene bubyana kupangela mwene Nebukadineza na kubyana kukala mwisi ya joko ya mwene wa Babiloni, co njikana eli lifuti kashitiko ha kutsiya banu balimo na mukwale na njala yakama na mushongo wa kulitambwisa, kweta noho hanjikabamanesela na liboko lyendi,’ mukemwo mwanendeka Yehova.

9 “‘“‘Ngeci, keti mutolilile tupolofweto beni na baka-kuumikiya na baka-bilota na baka-manseno na baka-kupanda, baje bali na kumileka ngwabo: “Kumukapangela mwene wa Babiloni.” 10 Mwafwa bali na kupolofweta byuma bya makuli kuli yeni mangana njimitwale kulako na lifuti lyeni na kumishandola mangana mukanyonge.

11 “‘“‘Oloni muyati uje ukataba kukala mwisi ya joko ya mwene wa Babiloni na kumupangela, njikautabesa ukale* muno mu lifuti na kulimamo na kukalamo,’ mukemwo mwanendeka Yehova.”’”

12 Co lalo njalekele mwene Zedekiya wa Juda byuma bya kulifwa ngwange: “Kobeleni ku joko ya mwene wa Babiloni na kumupangela na kupangela banu bendi, co mutwalelelaho kuyoya. 13 Bika biutsila na banu bobe ku mukwale na ku njala yakama na ku mushongo wa kulitambwisa ngwe mwanendeka Yehova kutalesa ku miyati ije kuishaka kupangela mwene wa Babiloni? 14 Keti mutolilile majwi abali na kumileka tupolofweto baje bali na kwendeka ngwabo, ‘Kumukapangela mwene wa Babiloni,’ mwafwa bali na kupolofweta byuma bya makuli kuli yeni.

15 “Yehova nendeka ngwendi, ‘Kunjabatumine, oloni bali na kupolofweta byuma bya makuli mu lizina lyange. Ngeci njikamishandola, co mukanyonga, yeni na tupolofweto baje bali na kupolofweta kuli yeni.’”

16 Co njalekele tupilistu na banu boshe ngwange: “Yehova nendeka ngwendi, ‘Keti mutolilile ku majwi a tupolofweto beni baje bali na kupolofweta kuli yeni ngwabo: “Taleni! Ololo belwisa bikwata bya mu njibo ya Yehova kutunda ku Babiloni.” Keti mubatolilile, mwafwa bali na kupolofweta byuma bya makuli kuli yeni. 17 Keti mubatolilile. Pangeleni mwene wa Babiloni, co mutwalelelaho kuyoya. Bika bimunyongesela ei nganda? 18 Oloni nga banapu tupolofweto, co lalo nga lijwi lya Yehova lili nabo, co balombe Yehova wa maswalale ngwabo bikwata binasala mu njibo ya Yehova na bije bili mu njibo ya mwene wa Juda na bije bili mu Jelusalema keti babitwale ku Babiloni.’

19 “Mwafwa ebi bikebyo byanendeka Yehova wa maswalale kutalesa ku bingunzi na ku lilonga lyakama lya kopa* na ku matemba na ku bikwata bije binasalako muno mu nganda, 20 bije byasezele mwene Nebukadineza wa Babiloni mwatwalele Jekoniya muna Jehoyakimu mwene wa Juda mu bufunge, kutunda ku Jelusalema kuya ku Babiloni hamolika na banu ba bulemu ba mu Juda na mu Jelusalema. 21 Yehova wa maswalale, Njambi ya Isalele nendeka kutalesa ku bikwata bije binasala mu njibo ya Yehova na mu njibo ya mwene wa Juda na mu Jelusalema ngwendi: 22 “Bakabitwala ku Babiloni, co bikakala kuje kweta noho hanjikabyanukila,” mukemwo mwanendeka Yehova. “Co njikabilwisa na kubinena muno mu mwela.”’”