Jelemiya

29 Awa akewo majwi akele mu mukanda wa kapolofweto Jelemiya uje waatumine kutunda ku Jelusalema kuya ku bakulunu baje bakele hakati ka banu baje baile mu bufunge, na ku tupilistu na tupolofweto na ku banu boshe baje batwalele Nebukadineza mu bufunge kutunda ku Jelusalema kuya ku Babiloni. 2 Wautumine te Mwene Jekoniya natundu laja mu Jelusalema hamolika na ina na bamyata ba mu nkuta na bamyata ba Juda na Jelusalema na bangangula na baka-kufula.* 3 Wanene ou mukanda mu liboko lya Elasa muna Shafani, na Gemaliya muna Hilikiya baje baatumine Mwene Zedekiya wa Juda ku Babiloni kuli Mwene Nebukadineza wa Babiloni. Ou mukanda wakele na majwi a kwendeka ngwawo:

4 “Yehova wa maswalale, Njambi ya Isalele nendeka ku banu boshe baje baanatwala mu bufunge ku Babiloni kutunda ku Jelusalema, ngwendi, 5 ‘Tungeni binjibo na kukalamo. Limeni mahya na kulya bushuka bwamwo. 6 Ambateni banakazi mangana mukale na bana ba banalume na ba banakazi. Ambateleni banakazi bana beni ba banalume na kushombwesa bana beni ba banakazi mangana nabo bakale na bana ba banalume na ba banakazi. Tumeni okwo kumuli, keti mutepuluke. 7 Co shakezekeni kwoloka mangana kukale omwo mu nganda munjinamitwala mu bufunge, co ilombeleleni kuli Yehova, mwafwa nga oyo nganda ikala mu kwoloka, co neni mukala mu kwoloka. 8 Mwafwa Yehova wa maswalale, Njambi ya Isalele nendeka ngwendi: “Keti mutabese tupolofweto beni na baka-kuumikiya beni baje bali mukati keni bamikwise, co keti mutolilile ku bilota bibali na kulota. 9 Mwafwa bali na kupolofweta byuma bya makuli kuli yeni mu lizina lyange, kunjabatumine,’ mukemwo mwanendeka Yehova.”’”

10 Mwafwa Yehova nendeka ngwendi, ‘Myaka 70 muikamihwila mu Babiloni, njikamyanuka, co njikashulisilila cikulaheso cange ha kumilwisa muno mu mwela.’

11 “Yehova nendeka ngwendi, ‘Njizibuka mwamubwa bisinganyeka binjili na kumisinganyekela, bisinganyeka bya kwoloka, keti bya bukalu, mangana njimyane buyoye bwabubwa kulutwe na lilabelelo. 12 Co mukanjisana na kwija na kulombela kuli yange, co njikamitolilila.’

13 “‘Mukanjishakezeka, co mukanjiwana, mwafwa mukanjitonda na bimbunge byeni byoshe, 14 co njikamitabesa munjiwane,’ mukemwo mwanendeka Yehova. ‘Co njikamitundisa mu bufunge mu mafuti mwoshe na ku myela yoshe kuje kunjinamishandwela, co njikamikungulula,’ mukemwo mwanendeka Yehova, ‘na kumilwisa ku mwela kuje kunjamitundisile, munjamitwalele mu bufunge.’

15 “Oloni munendeka ngweni, ‘Yehova natwana tupolofweto mu Babiloni.’

16 “Mwafwa Yehova nendeka kuli mwene uje natumama ha litanda lya Devidi na ku banu boshe bali omu mu nganda, kulumbununa bandolome beni baje kubaile neni mu bufunge, ngwendi, 17 ‘Yange Yehova wa maswalale njinendeka ngwange: “Njibatumina mukwale na njala yakama na mushongo wa kulitambwisa, co njikabapwisa ngwe bikuyu bya kubola bije binabihya manene, bya kulinga kubibwaha na kubilya.”’

18 “‘Njikabakaba na kubalwisa na mukwale na njala yakama na mushongo wa kulitambwisa, co njikabapwisa cuma ca kukomokesa ku bumwene bwoshe bwa ha lifuti-libu, co bakabasinga na kubakomoka na kubakumbila milozi, co bakabashaula hakati ka mafuti oshe munjikabashandwela. 19 Mwafwa kubatolililile ku majwi ange aje anjabatuminine kupangesa bangamba bange tupolofweto, baje banjelukilile-ilukilile kutuma,’ mukemwo mwanendeka Yehova.

“‘Oloni kumwatolililile,’ mukemwo mwanendeka Yehova.

20 “Ngeci, tolilileni majwi ange Yehova yeni banu boshe munai mu bufunge, yeni banjinashekela ku Babiloni kutunda ku Jelusalema. 21 Yange Yehova wa maswalale, Njambi ya Isalele njinendeka kutalesa kuli Ahabe muna Kolaya na kuli Zedekiya muna Maseya, baje bali na kupolofweta byuma bya makuli mu lizina lyange, ngwange, ‘Njibana mu liboko lya mwene Nebukadineza* wa Babiloni, co abatsiya oku muli na kulimwena. 22 Co byuma bilingiwa kuli bakebo bikapwa cisingo cije cibakendeka-endeka banu ba mu Juda boshe baje bali mu bufunge mu Babiloni nga basinga bakwabo ngwabo: “Yehova akupwise ngwe Zedekiya na Ahabe baje babenyekele mu tuhya kuli mwene wa Babiloni,” 23 mwafwa banalingi cuma ca shwamwa mu Isalele, banalingi bukoi na banakazi ba banu babatunga nabo na kwendeka majwi a makuli mu lizina lyange aje kunjabashikile.

“‘“Yange njizibuka, co njimukaleho,” mukemwo mwanendeka Yehova.’”

24 “Co Shemaya wa ku Nehelamu umuleke ngwobe, 25 ‘Yehova wa maswalale, Njambi ya Isalele nendeka ngwendi: “Ngwetu unatumine mikanda mu lizina lyobe ku banu boshe baje bali mu Jelusalema na kuli kapilistu Zefaniya muna Maseya na ku tupilistu boshe ngwobe, 26 ‘Yehova nangula yobe Zefaniya kupwa kapilistu mu mwela wa kapilistu Jehoyada mangana upwe muka-kutwamenena ku njibo ya Yehova, mangana ukwate munu wa kuzaluka woshe uje alikwisa kupwa kapolofweto na kumwaka mu tukunju, 27 co bikoni kuwatenukilile Jelemiya wa ku Anatoti uje ali na kupolofweta kulutwe lweni? 28 Mwafwa watutuminine muzimbu ku Babiloni ngwendi: “Mukalako simbu yailaha. Tungeni binjibo na kukalamo. Limeni mahya na kulya bushuka bwamwo,—”’”’”

29 Kapilistu Zefaniya mwatandele ou mukanda oku kapolofweto Jelemiya ali na kuziba, 30 Yehova walekele Jelemiya ngwendi: 31 “Tumina muzimbu banu boshe bali mu bufunge ngwobe, ‘Yehova nendeka kutalesa kuli Shemaya wa ku Nehelamu ngwendi: “Omwo Shemaya wapolofwetele kuli yeni nameme kunjamutumine, co lalo washakele kumilingisa mukulahele byuma bya makuli, 32 Yehova nendeka ngwendi, ‘Hano njana kashitiko Shemaya wa ku Nehelamu na batekulwila bendi. Kukwesi munu nambe umo wa mu naanga yendi akoboka hakati kaba banu, co kakamono byuma byabibwa binjikalingila banu bange,’ mukemwo mwanendeka Yehova, ‘mwafwa nalingisa banu batengulukile Yehova.’”’”