Jelemiya

44 Njambi wendekele na Jelemiya mangana aleke baJuda boshe baje bakele mu lifuti lya Ijipiti, baje bakele na kuyoya mu Migido, mu Tapanesi, mu Nofu* na mu lifuti lya Patrosi. Wendekele ngwendi: 2 “Yehova wa maswalale, Njambi ya Isalele nendeka ngwendi, ‘Munamono bukalu bwoshe bunjinanene hali Jelusalema na ha binganda byoshe bya Juda, co lelo binapu bingundu, wahi alimo. 3 Binapu bingundu mwafwa ya byuma byabibi bibalingile mu kunjilubalesa omwo bakele na kwana milambu ku binjambi beka na kubapangela, baje kumwazibukile yeni nambe bakukulwila beni. 4 Njatwaleleleleho kutuma bangamba bange tupolofweto kuli yeni, kwilukila na kwilukila ngwange: “Keti mulinge eci cuma ca bunyengwe cinjazinda.” 5 Oloni kubatolililile nambe kujendeka matwi abo mangana batenguluke na kutunda ku bilinga byabo byabibi ha kwecela kwana milambu ku binjambi beka. 6 Ngeci njetilile butenu bwange na kulubala kwange, co byenyekele binganda bya Juda na bitapalo bya Jelusalema, na kubipwisa bingundu na lifuti lije linabihya, ngwe mubinapu lelo.

7 Co Yehova Njambi wa maswalale, Njambi ya Isalele nendeka ngwendi, ‘Bika bimulinenela bukalu bwakama na kulingisa munalume woshe na munakazi woshe na mwanike woshe na mbututu woshe anyonge mu Juda na kujeneka kusezako nambe umo? 8 Bika bimunjilubalesela na bipangi bya maboko eni ha kwana milambu ku binjambi beka mu lifuti lya Ijipiti mumunakakala? Mukanyonga, co mafuti oshe ha lifuti-libu akamisinga na kumishaula. 9 Kuma munebala bilinga byabibi bya bakukulwila beni, na bilinga byabibi bya bimyene ba Juda, na bilinga byabibi bya banakazi babo, hamolika na bilinga byabibi byeni babenya, na bilinga byabibi bya banakazi beni bije bimwalingile mu lifuti lya Juda na mu bitapalo bya Jelusalema ndi? 10 Kweta na lelo lino kumwalikehesele, kumwanjizibilile lyoba nambe kukabangeya mashiko ange na byuma binjamilekele na bakukulwila beni.

11 Ngeci, Yehova wa maswalale, Njambi ya Isalele nendeka ngwendi, ‘Njinayongola kuminenela bukalu mangana njinyongese Juda yoshe. 12 Co njikakwata banu ba Juda baje banasalako baje banakakateyeye kuya ku lifuti lya Ijipiti mangana bakakaleko, co boshe bakanyonga mu lifuti lya Ijipiti. Bakatsa ku mukwale na ku njala yakama, kutunda ku wamundondo kutwala ku wakama, boshe bakatsa ku mukwale na ku njala yakama, co bakapwa cisingo na cuma ca kukomokesa na cuma ca kushauka na cuma ca shwamwa. 13 Njikana kashitiko baje bali mu lifuti lya Ijipiti ngwe munjanene kashitiko Jelusalema. Njikabana kashitiko ka mukwale, na njala yakama, na mushongo wa kulitambwisa. 14 Co banu ba Juda baje banasalako, baje banai na kukala mu lifuti lya Ijipiti kubakapusunuka nambe kwoboka na kwiluka mu lifuti lya Juda. Bakashaka kwiluka na kwija na kukala mu lifuti lya Juda, oloni kubakeluka, kubanga babandondo lika bakapusunuka.’”

15 Co banalume boshe baje bazibukile ngwabo banakazi babo bakele na kwana milambu ku binjambi beka, na banakazi ba kushomboka boshe baje bemanene kuje, baje bapwile cibunga cakama, na banu boshe baje bakele mu lifuti lya Ijipiti mu Patrosi bakumbulwile Jelemiya ngwabo: 16 “Kutwononoka lijwi liunendeka kuli yetu mu lizina lya Yehova. 17 Oloni tulinga byoshe bitunendeka na tunwa twetu. Twana milambu kuli Mwene wa Munakazi wa Mwilu* na kwitila bwana bwa byakunwa kuli ikeye, ngecilika mutwakele na kulingila, nomwo mubakele na kulingila bakukulwila betu na bimyene betu na bamyata betu mu binganda bya Juda na mu bitapalo bya Jelusalema, mutwakele na kukuta makende, nomwo mutwakele mwamubwa, ha simbu ije kutwamwene bukalu. 18 Kutunda ha litangwa litwalikelele kwana milambu kuli Mwene wa Munakazi wa Mwilu* na kwitila bwana bwa byakunwa kuli ikeye, tunajena byuma byoshe, co tuli na kutsa ku mukwale na ku njala yakama.”

19 Co banakazi nabo bendekele ngwabo: “Co lalo mutwakele na kwana bwana kuli Mwene wa Munakazi wa Mwilu* na kwitila bwana bwa byakunwa kuli ikeye, kuma keti banalume betu batutabesele ngwabo tumunge makende a milambu a kulifwa nendi na kwitila bwana bwa byakunwa ndi?”

20 Co Jelemiya wakumbulwile banu boshe, banalume na banakazi babo na banu boshe baje bakele na kwendeka nendi ngwendi: 21 “Yehova wanukile milambu imwanene na ije ibanene bakukulwila beni na bimyene beni na bamyata beni na banu ba mu lifuti, ije imwanenene mu binganda bya Juda na mu bitapalo bya Jelusalema, kaibalele.* 22 Mamaneselelo Yehova kasele kwecelela bilinga byeni byabibi na byuma bya bunyengwe bimwalingile, co wabiisile lifuti lyeni na kulipwisa cuma ca kukomokesa na cisingo, co kumwasalele munu, ngwe mulinapu lelo. 23 Obu bukalu bunamizila lelo mwafwa mwanene ei milambu na kulinga bubi kuli Yehova ha kujeneka kwononoka lijwi lya Yehova na kukabangeya mashiko endi na byuma byamilekele na byanukiso byendi.”

24 Jelemiya watwaleleleleho kuleka banu boshe na banakazi boshe ngwendi: “Tolilileni lijwi lya Yehova eni banu boshe ba mu Juda muli mu lifuti lya Ijipiti. 25 Yehova wa maswalale, Njambi ya Isalele nendeka ngwendi, ‘Byuma bimunendeka na tunwa tweni, yeni na banakazi beni, munabilingi na maboko eni. Mwafwa munendekele ngweni: “Cili bene tulinga bitunalikumiiya, ngwetu twana milambu kuli Mwene wa Munakazi wa Mwilu* na kwitila bwana bwa byakunwa kuli ikeye.” Cili bene eni banakazi mushulisilila bikumiiyo byeni na kulinga bimunalikumiiya.

26 “Ngeci, tolilileni lijwi lya Yehova eni banu boshe ba mu Juda muli mu lifuti lya Ijipiti: ‘“Njilisinga ha lizina lyange lyakama,” ngwendi Yehova, “ngwange kukwesi munu woshe-woshe wa mu Juda ali mu lifuti lya Ijipiti uje akapangesa lizina lyange mu kulisinga ngwendi, ‘Njilisinga hali Mwata Wahakamwa ya Byoshe Yehova!’ 27 Co njili na kubatalelela mangana njibanenele bukalu keti kubalingila cuma cacibwa. Banu boshe ba Juda baje bali mu lifuti lya Ijipiti bakatsa ku mukwale na ku njala yakama, kweta noho habakazilukila. 28 Babandondo lika bakoboka ku mukwale na kwiluka ku Juda kutunda ku lifuti lya Ijipiti. Co banu ba mu Juda boshe baje basaleleho baje baile mu lifuti lya Ijipiti na kukakalamo bakamona indi majwi eya analishulilisila, ange indi abo.”’”

29 “Yehova nendeka ngwendi, ‘Eci cikeco cizibukiso cije cimwesa ngwaco njikamyana kashitiko muno mu mwela mangana muzibuke ngweni majwi ange anjinamikulahesa ngwange njiminenela bukalu akalishulisilila bene. 30 Yehova nendeka ngwendi: “Njana Falo Hofula mwene wa Ijipiti mu maboko a bitozi bendi na mu maboko a baje bashaka kumutsiya, ngwe munjanene Mwene Zedekiya wa Juda mu maboko a Mwene Nebukadineza* wa Babiloni uje wapwile citozi cendi, uje lalo washakele kumutsiya.”’”