Jelemiya

33 Yehova wendekele lalo na Jelemiya lwamucibali te bacinamushokela mu lilapa lya baka-kunyunga. Wendekele ngwendi: 2 “Yehova uje watangele lifuti-libu, Yehova uje walimungile na kulizameka, uje lizina lyendi ikeye Yehova, nendeka ngwendi, 3 ‘Njisane, co njikukumbulula na kukuleka byuma byakama bije kuwasa kuzibisisa, bije kuuzibuka.’”

4 “Mwafwa ebi bikebyo binjinendeka yange Yehova, Njambi ya Isalele kutalesa ku binjibo bya muno mu nganda na binjibo bya bimyene ba Juda bibanasiula mangana balwise baje banalundula malundu a kulwisila na baje banaija na mukwale, 5 na kutalesa kuli baje bakalwisa baKaudiya na kutalesa ku myela ije ibali na kushulisa na bibimbi bya baje banjinatsii mu butenu bwange na mu kulubala kwange, baje banalingi byuma byabibi binalingisa njijeneke kutala ei nganda, njinendeka ngwange: 6 ‘Njikalingisa ino nganda ikale na bukangule bwabubwa na kukangwisa banu bakalamo na kubalingisa bakale mu kwoloka kwa kujeneka bushonde. 7 Co njikelwisa banu ba Juda baje banai mu bufunge na banu ba mu Isalele baje banai mu bufunge, co njikababezikisa ngwe munjalingile ku mashangumukilo. 8 Njikabajelesa ku milonga yabo yoshe ya bubi bubalingile kuli yange, co lalo njikakonekela bubi bwabo bwoshe na milonga ibalingile kuli yange. 9 Lizina lyei nganda likanjilingisa njilisambe na kulingisa banu boshe ba ha lifuti-libu banjishangazale na kunjana bumpau mubakaziba byuma byoshe byabibwa binjinalingila banu bange. Bakaziba lyoba na kujaja mwafwa ya byuma byoshe byabibwa na kwoloka binjikana ei nganda.’”

10 “Yehova nendeka ngwendi: ‘Ou mwela umukendeka ngweni unabihya, co lalo kumwesi banu nambe bimuna, nebi binganda bya mu Juda na bitapalo bya mu Jelusalema bije binapundu, muje kumwesi banu nambe bimuna, bakazibamo lalo 11 miyoyo ya kulisamba, na miyoyo ya kubwahelela. Bakazibamo lalo lijwi lya cambato na lijwi lya shombolwa na majwi a baje bakendeka ngwabo: “Kandeleleni Yehova wa maswalale mwafwa Yehova wapwa wamubwa, cizemo cendi cije kucesi kutenguluka cakalako myaka yoshe!”’

“‘Bakanena bwana bwa kukandelela mu njibo yange Yehova, mwafwa njikelwisa banu ba muno mu lifuti baje banai mu bufunge, co bakukalamo ngwe mubakele ha kulibanga,’ ngwendi Yehova.”

12 “Yehova wa maswalale nendeka ngwendi: ‘Uno mwela unabihya, uje kuwesi na banu nambe bimuna, na mu binganda byabo byoshe, mukakala lalo bulilo bwa bimuna mubakahwimisila bimuna babo tunyungi.’

13 “Yehova nendeka ngwendi: ‘Bimuna bakaita lalo mwisi ya liboko lya uje ali na kubatanda mu binganda bya mu mitambela ya minkinda na mu binganda bya ku malundu na binganda bya ku mbwela na mu binganda bya Benjamini na mu myela ije yazengeleka Jelusalema na mu binganda bya Juda.’”

14 Yehova nendeka ngwendi: “Taleni! Matangwa ali na kwija anjikashulisilila byuma byabibwa binjakulahesele banu bakunjibo ya Isalele na banu bakunjibo ya Juda. 15 Ha simbu oyo, njikangula swana* wa kusungama wa ku naanga ya Devidi, co akakula mwamubwa na kulinga byuma mu kusungama mu lifuti. 16 Mu matangwa owo, Juda bakamwobola, co Jelusalema akakala mu kwoloka, co bakamutumbula ngwabo: Yehova Ikeye Kusungama Kwetu.’”

17 “Yehova nendeka ngwendi: ‘Ha litanda lya banu bakunjibo ya Isalele hakakala mutekulwila wa Devidi simbu yoshe, 18 co lalo tupilistu ba ku naanga ya baLevi bakatwalelelaho kwimana kulutwe lwange na kwana bwana bwa mutunu bwa kwenyeka na kwenyeka bwana bwa binona na kwana milambu.’”

19 Co Yehova walekele lalo Jelemiya ngwendi: 20 “Yehova nendeka ngwendi, ‘Nga mwasa kupokola cikumiiyo cange kutalesa ku mutanya na cikumiiyo cange kutalesa ku butsiki mangana mwonowese litangwa na butsiki kwija ha simbu inapande, 21 asinoni cikumiiyo cange na ngamba yange Devidi casa kupokoka mangana keti kukale munendi ayula ha litanda lyendi kupwa mwene na kupokola cikumiiyo cange na tupilistu ba ku naanga ya baLevi baje bakanjipangela. 22 Cili bene njikatumisa batekulwila ba ngamba yange Devidi na baLevi baje bali na kunjipangela, ngecilika munjinatumisa bingongonosi bije kumwasa kutanda, na mushekesheke wa ku kalunga-ndonga uje kumwasa kupeselesa.’”

23 Co Yehova walekele lalo Jelemiya ngwendi: 24 “Kuma wananguka bibali na kwendeka aba banu ngwabo, ‘Yehova abyana binaanga bibali byanangula’ ndi? Co lalo kubesi na kusingimika banu bange na kubamona kupwa muyati.

25 “Yehova nendeka ngwendi: ‘Ngecilika munjinazamekele cikumiiyo cange kutalesa ku mutanya na butsiki na mashiko a mwilu na lifuti-libu, 26 mu ngila imolika, kunjikabyana batekulwila ba Jakobu na batekulwila ba ngamba yange Devidi, co njikambatako bamo ku batekulwila bendi mangana bayule batekulwila ba Abrahamu na Isaki na Jakobu mwafwa njikabakungulula kutunda mu bufunge na kubazibila ngozi.’”