Jelemiya

39 Mu mwaka wa bu 9 wa ciyulo ca Mwene Zedekiya wa Juda, mu ngonde ya bu 10, Mwene Nebukadineza* wa Babiloni na maswalale bendi boshe bezile ku Jelusalema na kuizengeleka.

2 Mu mwaka wa bu 11 wa ciyulo ca Zedekiya, mu ngonde yamuciwana ha litangwa lya bu 9 omu mu ngonde, batubile cibumbe ca nganda. 3 Co bamyata boshe ba mwene wa Babiloni bakobelele mu nganda na kukatumama ha Cikolo ca Hakati. Aba bamyata bapwile: Nego-shaleza uje wapwile Samuga na Nebo-sasechimu uje wapwile Labusalisi* na Nego-shaleza uje wapwile Labumagi* na bamyata boshe ba mwene wa Babiloni.

4 Mwene Zedekiya wa Juda na maswalale bendi boshe mubabamwene, batewele, co batuhukile mu nganda butsiki. Betile ngila ya ku lihya lya mwene, co batuhukilile ku cikolo cije cakele mukati ka bibumbe bibali. Batwaleleleleho kulyunukwa. Betile ngila ya Alaba. 5 Oloni maswalale ba baKaudiya babakilimisile, co bakawanene Zedekiya mu byana bya Jeliko. Bamukwatele na kumutwala kuli Mwene Nebukadineza wa Babiloni ku Ribula mu lifuti lya Hamathi kuje kubakamusompelele. 6 Co bana ba Zedekiya ba banalume babatsiilile ha mesho endi ku Ribula ngwe mwashikile mwene wa Babiloni, co lalo banu ba Juda ba bulemu boshe babatsiile ngwe mwashikile mwene wa Babiloni. 7 Co watubile mesho a Zedekiya na kumukuta na malyenge a kopa na kumutwala ku Babiloni.

8 Co baKaudiya benyekele njibo ya mwene na binjibo bya banu na kubujula bibumbe bya Jelusalema. 9 Nebuzaladani mukulunu wa baka-kunyunga wambatele banu boshe baje basalele mu nganda na baje batewelele kuli ikeye na boshe baje bakele hanja ya nganda na kubatwala mu bufunge ku Babiloni.

10 Oloni Nebuzaladani mukulunu wa baka-kunyunga wasezeleko tuhutu bamo ba mamaneselelo mu lifuti lya Juda baje kubakele na byuma byoshe-byoshe. Ha litangwa lije wabanene mahya a binyu na mahya eka mangana balime.*

11 Co Mwene Nebukadineza* wa Babiloni wanene awa mashiko kuli Nebuzaladani mukulunu wa baka-kunyunga kutalesa kuli Jelemiya ngwendi: 12 “Mwambate ukamunyunge, keti ukamulinge mwamubi, co ukamwane byuma byoshe byaakulomba.”

13 Ngeci Nebuzaladani mukulunu wa baka-kunyunga na Nebushazibani uje wapwile Labusalisi* na Nego-shaleza uje wapwile Labumagi* na banalume ba bulemu boshe ba mwene wa Babiloni batumine banu 14 bakashake Jelemiya mu Lilapa lya Baka-kunyunga na kumwana mu maboko a Gedaliya muna Ahikamu, Ahikamu muna Shafani, mangana amutwale ku njibo yendi. Ngeci, Jelemiya wayoyele mukati ka banu mu kuzituka.

15 Jelemiya mubamushokelele mu Lilapa lya Baka-kunyunga, Yehova wamulekele ngwendi: 16 “Ya ukaleke Ebedi-meleki wa ku Ithopia ngwobe, ‘Yehova wa maswalale, Njambi ya Isalele nendeka ngwendi: “Njishulisilila majwi ange a kunenela ei nganda bukalu keti bubwa, co ha litangwa olyo ukamona ebi byuma mubikalingiwa.”’

17 “‘Oloni yobe njikakwobola ha litangwa olyo,’ mukemwo mwanendeka Yehova, ‘co kubakakwana mu maboko a banu baukazibila lyoba.’

18 “‘Mwafwa cili bene njikakwobola, co kuukatsi ku mukwale. Ukobola mwonyo wobe ngwe cuma cibanapukula* mwafwa wanjikulahelele,’ mukemwo mwanendeka Yehova.”