Jelemiya
15 Co Yehova wanjilekele ngwendi: “Nameme bene ngwe Mosesa na Samwele banemana ku mesho ange, ngwe anga bene kunjitetela aba banu. Batundise ku mesho ange. Becele baye. 2 Co nga bakwihula ngwabo, ‘Tuya kuli?’ Unapande kubaleka ngwobe, ‘Yehova nendeka ngwendi:
Bamo beni bakatsa ku mushongo uje utsiya,
Bamo beni bakatsa ku mukwale,
Bamo beni bakatsa ku njala,
Co bamo beni bakaya mu bufunge.”’
3 “‘Co njikabanenela bukalu buwana,’ mukemwo mwanendeka Yehova. ‘Njikabanenela mukwale wa kubatsiya, na tutali bakubapulunya, na tuzila na bikashama ba ha lifuti-libu bakubabwonda na kubanyongesa. 4 Co njikabapwisa cuma ca kukomokesa ku bumwene bwoshe bwa ha lifuti-libu mwafwa ya byuma byalingile Manase mu Jelusalema, Manase muna Hezekiya, mwene wa Juda.
5 Obe Jelusalema, iya akakuzibila mema ku mbunge?
Iya akakuzembeleka,
Co iya akaija na kukwindwisa?’
6 Yehova nendeka ngwendi: ‘Munanjiseze,
Munanjitalesa nima.*
Ngeci njolola liboko lyange na kumilwisa na kuminyongesa.
Njinajuka kumizibila ngozi.
7 Co njikabaleleka na cilelekeso ca mishomo mu binganda* bya mu lifuti lyabo.
Njikatsiya bana babo.
Njikanyongesa banu bange,
Mwafwa banabyana kuseza bingila byabo.
8 Njikatumisa bifwile babo kutubakana mushekesheke wa ku tulunga-ndonga.
Njikabanenela muka-kunyongesa mutanya-mwelu. Akanyongesa bisemi ba banakazi na bakwenje.
Njikabanenela bishoti na lyoba mu kukasumuna.
9 Munakazi uje wakitile bana 7 nazeye.
Ali na kundoyoka.
Kuli ikeye, litangwa linatoko nameme kanda litoke.
Napaye, co ali na kuziba shwamwa.’*
‘Co babandondo baje banasalako kuli bakebo
Njikabana kuli bitozi babo mangana babatsiye na mukwale,’ mukemwo mwanendeka Yehova.”
10 Nani banana njinabindama. Bika bimwanjikitilile?
Lifuti lyoshe lili na kunjilwisa na kunjicokotesa.
Kanda njikongoleho kuli munu nambe kulomba munu.
Oloni boshe bali na kunjisinga.
11 Yehova nendeka ngwendi: “Njikakukwasa,
Njikakwimanenako mu simbu ya bukalu,
Mu simbu yakakulwisa citozi cobe.
12 Kuma kuli umo asa kupokozola cikubo
Ca ku kunto,* na kupokozola kopa ndi?
13 Byuma byobe na bufuko bwobe njikabyana ku bitozi bobe,
Bakabyambata bwana mwafwa ya bubi bwobe bwoshe buunalingi mu bitingitingi byobe byoshe.
14 Njikabyana ku bitozi bobe
Mangana babitwale ku lifuti lije kuuzibuka.
Mwafwa butenu bwange bunashwameka tuhya,
Co tuli na kukwepukila.”
15 Uzibuka obe Yehova,
Njanuke na kunjaka mbunge.
Linga shambandinga baka-kunjiyandesa.
Keti unjecelele njinyonge mwafwa ya kujeneka kulubala bwasi kwobe.
Anuka ngwobe bali na kunjishaula mwafwa yobe.
16 Njawanene majwi obe, co njawalile.
Co lijwi lyobe lyanjilingisile njilisambe na kubwahelela mu mbunge yange
Mwafwa njili na lizina lyobe, obe Yehova Njambi wa maswalale.
17 Kunjesi kutumama na baka-senga na kulisamba nabo.
Mwafwa liboko lyobe lili hali yange, njikatumama likalyange,
Mwafwa unanjishulisa na butenu.
18 Mwafwa bika kubabala kwange kukwesi na kuhwa na mbandu yange kuyesi na kwola?
Shayo kwola.
Kuma upwa ngwe kabwelu-bwelu kaje kukesi na kutuhula mema
Kaje kunjasa kukulahela ndi?
19 Mukemwo Yehova nendeka ngwendi:
“Nga utenguluka, co njikupwisa muwapwililile,
Co ukemana ku mesho ange.
Nga wangununa byuma bya seho ku byuma bya kujeneka seho,
Co upwa ngwe kanwa kange.*
Co banu bakaija ku mutambela wobe,
Oloni yobe kuukai ku mutambela wabo.”
20 “Njikupwisa cibumbe ca kopa ca kukola kuli aba banu.
Cili bene bakakulwisa,
Oloni kubakakuhyana,
Mwafwa njili nobe mangana njikwobole na kukwamena,” mukemwo mwanendeka Yehova.
21 “Co njikakwobola mu liboko lya muka-bubi
Na kukupatula mu liboko lya cikenya.”