Samu
Kuli muka-kutwamenena. Mwaso wa Devidi.
139 Obe Yehova, unanjilula, co unjizibuka.
2 Uzibuka munjitumama nomu munjimana.
Ukananguka bisinganyeka byange oku uli kulako.
3 Ukanjimono* munjikende nomu munjikalala.
Uzibuka bingila byange byoshe.
4 Obe Yehova, simbu kanda ndaka yange yendeke lijwi nambe limo,
Yobe unalizibuka laja.
5 Unanjizengeleka,
Co unanjikambeka maboko obe.
6 Mangana a cifweci kunjasa kuwazibisisa.*
Ali helu manene, kunjasa kwetaho.*
7 Kuli kunjasa kutewela sipilitu yobe,
Co kuli kunjasa kutewela cihanga cobe?
8 Nambe nga njiya mwilu yobe unjimona,
Co nambe nga njijala mwela wange mu Cihilo,* anga unjiwanamo.
9 Nambe nga njipulula mu bukambwila bwasi-bwasi ngwe mucikasholoka ceke ca kukya kwa litangwa
Mangana njikakale ku mamaneselelo a kalunga-ndonga,
10 Nameme kuje bene liboko lyobe linjitwamenena,
Co liboko lyobe lya cilyo linjikwata.
11 Nambe nga njendeka ngwange: “Lisusulungu linjishweka.”
Co butsiki buje bunanjifwiki butenguluka kupwa mutanya.
12 Nameme bene lisusulungu, kuli yobe keti lisusulungu,
Oloni butsiki bupwa ceke ngwe mutanya.
Lisusulungu na ceke, kuli yobe byuma bimo.
13 Mwafwa yobe watangele binso byange.
Wanjishwekele* mwimo lya banana.
14 Njikushangazala mwafwa wanjitanga mu ngila ya kukomokesa ije izibisa lyoba.
Bipangi byobe byapwa bya kukomokesa,
Njizibuka mwamubwa ei ñanda.
15 Bitsiya byange kubyalishwekele kuli yobe
Muwakele na kunjitanga ku bushweke,
Muwakele na kunjinungakana ku masima a lifuti-libu.
16 Mesho obe anjimwene munjapwile nji mubishu.
Bilyo byange byoshe wabisonekele mu libulu lyobe,
Wasonekele matangwa abyakele na kulitunga,
Simbu kanda kukale nambe cimo.
17 Ngeci, bisinganyeka byobe byapwa bya seho manene kuli yange.
Obe Njambi, byapwa byabingi manene.
18 Nga njeseka kubitanda, bitubakana mushekesheke ku bwingi.
Nga njinduka anga njitwalelelaho kubitanda.*
19 Obe Njambi, nga utsiya banu bababi,
Co banu ba lwozi* banjijenjuka.
20 Baje bendeka byuma byabibi hali yobe mwafwa ya kukala na biyongola byabibi,*
Banapu bitozi bobe baje bali na kupangesa lizina lyobe mu ngila yaibi.
21 Obe Yehova, kuma kunjazindile baje bakuzinda ndi?
Kuma kunjesi kuzibila bunyengwe baje bakutengulukila ndi?
22 Njabazinda manene.
Banapu bitozi bange bakama.
23 Njilule, obe Njambi, mangana uzibuke mbunge yange.
Njilule mangana uzibuke byuma binjinalishoshomwena.
24 Njitale umone indi muli yange muli ngila yaibi,
Mangana unjitwamenene mu ngila ije ikalako myaka yoshe.