Jelemiya
17 Bubi bwa Juda banabusoneka na cisonekeso ca cikubo.
Banabusoneka mu bimbunge byabo na limanya lya daimondi ya kushongomoka
Na kubusoneka ha mambinga a mitula yabo.
2 Bana babo ba banalume nabo banuka mitula yabo na bisini byabo bya kulemesa,
Bije byakele kumukulo wa miti yaibwa ha malundu,
3 Ha minkinda ili kulako na bimbongi.
Byuma byobe na bufuko bwobe bwoshe, njikabyana kuli citozi cobe,
Eyo, njikamwana myela yobe ya kulunduka mwafwa ya bubi buunalingi mu bitingitingi byobe byoshe.
4 Yobe babenya ukanesa buswana bwobe bunjakwanene,
Co njikakulingisa ukapangele bitozi bobe mu lifuti lije kuuzibuka,
Mwafwa unashwameka butenu bwange ngwe tuhya.*
Co bushukuma myaka yoshe.”
5 Yehova nendeka ngwendi:
“Munu uje akulahela banu napu wa kusinga,
Uje akulahela nzili ya bunu,
Uje lalo mbunge yendi inatundu kuli Yehova.
6 Akapwa ngwe muti uje wakala likalyawo mu mambo.
Kakamono byuma byabibwa mubikaija,
Oloni akakala mu mwela wa kujeneka mema mu mambo,
Akakala mu lifuti lya mwongwa muje kumwasa kukala munu.
7 Nabezika munu uje akulahela Yehova,
Uje najendamena hali Yehova.
8 Akapwa ngwe muti uje ubanakunu ku mema,
Uje mizi yawo ishalabela ku ndonga.
Kakananguka omwo kushaluka kukaija,
Oloni maputa endi akazibalela simbu yoshe.
Co mu mwaka wa lilanga kakalishoshomwena,
Nambe kwecela kwima bushuka.
9 Mbunge ikakwisi kutubakana cuma coshe-coshe, co ili mu bukalu.
Iya asa kuizibuka?
10 Yange Yehova njili na kutondesesa mu bimbunge bya banu,
Njili na kwilula bisinganyeka byabo bya kuloba,*
Mangana njane umo na umo kwesekesa na bingila byendi,
Kwesekesa na bushuka bwa bipangi byendi.
11 Uje awana bufuko mu ngila ya kujeneka kusungama
Napu ngwe kazila wa mu shwata uje abutamena mayaki aje kombilile.
Bufuko bukamuseza simbu acili hakati ka buyoye bwendi,
Co mamaneselelo akamoneka bulema.”
12 Mwela wetu wa kujela
Unapu litanda lya bumpau libanajundula kushwa ku mashangumukilo.
13 Obe Yehova, yobe lilabelelo lya Isalele,
Boshe baje banakuseze bakaziba shwamwa.
Baje banakutengulukila babasoneka mu libu,
Mwafwa banaseze yobe Yehova, yobe kabwelubwelu ka mema a kuyoya.
14 Obe Yehova, njikangwise, co njikanguka.
Njobole, co njoboka,
Mwafwa yobe injikashangazala.
15 Taleni! Kuli bamo bali na kunjileka ngwabo:
“Byanendeka Yehova bili kuli?
Bilishulisilile mwane.”
16 Oloni yange kunjalikelele kukukabangeya ha kupwa kanyungi,
Co lalo kunjashungwiiye litangwa lya bukalu.
Uzibuka mwamubwa byoshe bikanendeka kanwa kange,
Byoshe njabyendekelele ku mesho obe.
17 Keti unjizibise lyoba.
Yobe butewelo bwange ha litangwa lya bukalu.
18 Zibisa shwamwa baje bali na kunjiyandesa,
Oloni yange keti unjizibise shwamwa.
Bazibise lyoba,
Oloni yange keti unjizibise lyoba.
Banenele litangwa lya bukalu,
Co batike na kubanyongesa.
19 Yehova nanjileke ngwendi: “Ya ukemane mu cikolo ca bana ba banu bange muje mubakakobelela na kutuhukila bimyene ba Juda, na mu bikolo byoshe bya mu Jelusalema. 20 Unapande kubaleka ngwobe, ‘Tolilileni ku lijwi lya Yehova eni bimyene ba Juda, neni banu ba Juda, neni boshe mwakala mu Jelusalema, yeni mukakobelela omu mu bikolo. 21 Yehova nendeka ngwendi: “Nyanyameni mangana keti mwambate citele ha litangwa lya Sabata, nambe kucitisa mu bikolo bya Jelusalema. 22 Kumwapandele kutuhwisa bitele byoshe-byoshe mu binjibo byeni ha litangwa lya Sabata, co kumwapandele kupanga bipangi byoshe-byoshe. Nyungeni litangwa lya Sabata na kulimona kupwa lya kujela ngwe munjashikile bakukulwila beni. 23 Oloni kubatolililile nambe kujendeka matwi abo, bakebo batindibalele na kubyana kunjononoka nambe kutambula cinangulo cange.”’
24 “‘“Oloni nga munjononoka,” mukemwo mwanendeka Yehova, “co lalo nga kumwitisa citele mu bikolo byei nganda ha litangwa lya Sabata, na kunyunga litangwa lya Sabata na kulimona kupwa lya kujela ha kujeneka kupanga cipangi coshe-coshe ha litangwa eli, 25 co bimyene na bamyata baje bali ha litanda lya Devidi nabo baketa mu bikolo byei nganda. Bakalonda mu matemba na ha tubalu, bakebo na bamyata babo na banu ba mu Juda na boshe baje banatungu mu Jelusalema. Co omu mu nganda mukakala banu myaka yoshe. 26 Co banu bakatunda mu binganda bya Juda na mu mitambela inazengeleka Jelusalema na mu lifuti lya Benjamini na ku mitambela ya malundu na ku mitambela ya minkinda na ku Negebu. Bakanena bwana bwa mutunu bwa kwenyeka, na milambu, na bwana bwa binona, na isense ya kutoka, na milambu ya kukandelela. Bakanena ebi byuma mu njibo ya Yehova.
27 “‘“Oloni nga kumunjononoka ha kujeneka kunyunga litangwa lya Sabata na kulimona kupwa lya kujela, na kwambata bitele na kubitisa mu bikolo bya Jelusalema ha litangwa lya Sabata, co njikenyeka bikolo bya Jelusalema na tuhya, co tuhya tukenyeka tuposhi twendi twa kukola, co kubakatuzimi.”’”