Jelemiya

35 Yehova wendekele na Jelemiya mu matangwa a ciyulo ca Jehoyakimu muna Josiya, mwene wa Juda, ngwendi: 2 “Ya kuli bakunjibo ya Lekabu ukasimutwiye nabo na kubatwala mu njibo ya Yehova, mu mulili umo wa kulila. Co ya ukabane binyu mangana banwe.”

3 Ngeci njambatele Jazaniya muna Jelemiya, Jelemiya muna Habazinaya na bandolome bendi, na bana bendi boshe ba banalume na bakunjibo ya Lekabu boshe, 4 co njabatwalele mu njibo ya Yehova. Njabatwalele mu mulili wa kulila wa bana ba Hanani muna Igadaliya munu wa Njambi wa busunga. Ou mulili walyatele na mulili wa kulila wa bamyata uje wakele helu lya mulili wa kulila wa Maseya muna Shalamu, muka-kunyunga ku cikolo. 5 Ngeci njakele binganja na binjaba bya kushula bya binyu kulutwe lwa baje banu bakunjibo ya Lekabu na kubaleka ngwange: “Nweni binyu.”

6 Oloni bendekele ngwabo: “Kutunu binyu, mwafwa Jehonadabu* muna Lekabu, kukulwila yetu, watushikile ngwendi, ‘Yeni na bana beni keti mukanweho binyu. 7 Co kumwapandele kutunga binjibo nambe kukuna bimbuto nambe kulima mahya a binyu nambe kukala nawo. Oloni munapande kukala mu bitenti simbu yoshe mangana mukale simbu yailaha muno mu lifuti mumuli na kukala ngwe baka-kwija.’ 8 Ngeci, tunatwalelelaho kwononoka byoshe byatushikile Jehonadabu muna kukulwila yetu Lekabu. Tunalingi ngoco ha kujeneka kunwa binyu, yetu na banakazi betu na bana betu ba banalume na bana betu ba banakazi. 9 Co kutwesi kutunga binjibo bya kukala nambe kulima mahya a binyu nambe mahya eka nambe kukala na mbuto. 10 Tuli na kutwalelelaho kukala mu bitenti na kwononoka majwi oshe atushikile kukulwila yetu Jehonadabu.* 11 Oloni Mwene Nebukadineza* wa Babiloni mwezile na kulwisa lino lifuti, twendekele ngwetu, ‘Tuyeni tutewele mu Jelusalema, tutewe maswalale ba baKaudiya na baSiria, co hano tuli na kuyoya mu Jelusalema.’”

12 Co Yehova walekele Jelemiya ngwendi: 13 “Ebi bikebyo binjinendeka yange Yehova wa maswalale, Njambi ya Isalele ngwange, ‘Ya ukaleke banu ba Juda na baje bakala mu Jelusalema ngwobe: “Kuma kunjatwaleleleho kumishongangeya ngwange mwononoke majwi ange ndi?” mukemwo mwanendeka Yehova. 14 “Jehonadabu muna Lekabu washikile batekulwila bendi ngwendi keti banwe binyu, co banononoka majwi endi ha kujeneka kunwa binyu kweta na lelo lino. Ngeci banononoka byabashikile kukulwila yabo. Oloni yange njinelukila-ilukila* kwendeka neni, oloni kumwanjononokele. 15 Co njatwaleleleleho kutuma bangamba bange tupolofweto kuli yeni, njelukilile-ilukilile* kubatuma bakumileke ngwabo, ‘Njimilomba mutenguluke na kuseza bingila byeni byabibi, na kulinga byuma byabibwa. Keti mukabangeye binjambi beka na kubapangela. Co mutwalelelaho kukala mu lifuti linjamyanene hamolika na bakukulwila beni.’ Oloni yeni kumwajendekele matwi eni nambe kunjitolilila. 16 Batekulwila ba Jehonadabu muna Lekabu banononoka lishiko lyabanene kukulwila yabo, oloni aba banu kubanjitolililile.”’”

17 “Ngeci Yehova, Njambi wa maswalale, Njambi ya Isalele nendeka ngwendi: ‘Njinenela Juda na baje boshe bakala mu Jelusalema bukalu bwoshe buje bunjabalekele ngwange njibanenela, mwafwa njinabendekela, oloni kubatolililile, co njinatwalelelaho kubasana, oloni shabo kukumbulula.’”

18 Co Jelemiya walekele bakunjibo ya Lekabu ngwendi: “Yehova wa maswalale, Njambi ya Isalele nendeka ngwendi, ‘Omwo munononoka lishiko lya kukulwila yeni Jehonadabu na kutwalelelaho kwononoka mashiko endi oshe na kulinga ngwe muje bene mwamishikile, 19 yange Yehova wa maswalale, Njambi ya Isalele, njendeka ngwange: “Batekulwila ba Jehonadabu* muna Lekabu bakatwalelelaho kupanga kulutwe lwange.”’”