Byuma Byasa Kumanesa Kaangu

Banu babangi banapangesa binangulo bitunasimutwiya mu bilongesa binahu, co binabakwasa batundise kaangu mu bimbunge byabo. Oloni twanukeni ngwetu kutwasa kumanesa kaangu lika lyetu. Kuma kaangu tangwa kakahwa ndi?

Fulumende Yaibwa

Bifulumende bya banu binonwa kumanesa kaangu. Kuma oku kulumbununa ngwabo kukwesi fulumende yasa kumanesa kaangu ndi?

Fulumende yasa kumanesa kaangu inapande

1. 1. Kukwasa banu batengulule bisinganyeka byabo nomu mubakamwena bakwabo.

2. 2. Kumanesa bisinganyeka bya kushaka kulinga bakwetu mwamubi mwafwa netu banu bamo batulingile mwamubi.

3. 3. Kukala na baka-kuyula bababwa baje kubesi na kaangu.

4. 4. Kukwasa banu ba miyati yoshe balikwatasane.

Mbimbiliya inamwesa ngwayo Njambi nashimbika laja fulumende ya cifwa eci. Eyi fulumende inapu “Bumwene bwa Njambi.”—Luka 4:43.

Tusimutwiyeni biikalinga eyi fulumende.

1. Kulongesa Banu Byuma Byabibwa

“Banu boshe hano hasi [bakalilongesa] muje mubanapande kuyoyela mwa busunga.”—ISAYA 26:9.

“Omwo banu boshe bakalinga bije bya busunga, co kukakala kwoloka na bubwa ku myaka yoshe.”—ISAYA 32:17.

Ebi bisoneka bilumbununa bika? Bumwene bwa Njambi bukalongesa banu byuma byabibwa. Nga banu bazibuka kwangununa bubwa ku bubi na kusungama ku kuhenga, co bisinganyeka byabo hali umo na mukwabo bitenguluka. Boshe bakazibuka ngwabo cuma cacibwa cibanapande kulinga cinapu kuzema banu boshe.

2. Kumanesa Bilinga Byabibi

Njambi “akasikumuna misozi yoshe kumesho abo. Co kukukakala kutsa nambe busiwa nambe kulila nambe kukemanga. Omwo byuma bya laja bineti.”—KUJOMBOLOLA 21:4.

Eci cisoneka cilumbununa bika? Bumwene bwa Njambi bukamanesa kubabala kutukazibi mwafwa ya kutulinga mwamubi. Baje babalingile mwamubi kubakazindi lalo baje babalingile ngoco.

3. Ciyulo Cacibwa

“Kakasompo ha cifwa ca munu, nambe bya kuziba lika embwe. Akasompela tuhutu mwamubwa, akaakwila mwa busunga baka-kujeneka.”—ISAYA 11:3, 4.

Eci cisoneka cilumbununa bika? Yesu Kilistu uje wapwa Mwene wa Bumwene bwa Njambi bwa mwilu akayula kaye mu kusungama. Yesu kesi na kaangu. Ngeci, akalingisa banu mu kaye mwoshe bakononoke mashiko endi.

4. Likwatasano

Bumwene bwa Njambi buli na kulongesa banu bakale na ‘biyongola bimo na kulipangezela cizemo cimo na kulikwatasana mu kuyoya na mu mana.’—FILIPU 2:2.

Eci cisoneka cilumbununa bika? Banu babukayula Bumwene bwa Njambi kubakasholoka lika ngwe banalikwatasana, oloni bakalikwatasana bene. Bakalikwatasana mwafwa bakalizema umo na mukwabo kutundilila kwisi ya bimbunge byabo.