Kunyunga Vuthamba Vweni Na Mukweni, Pweni Kavuthamba Wamuvwa

Mu vuthamba munapande kupwa chithzemo. Omwo mulilongetha vya Yehova thimbu yoshe, cho mumuthzema manene. Nga muthzema manene Njambi, cho mukala na lishungu lyakumupangela. Echi chimikwatha mupwe vandongethi va Yesu Kilisitu. (Mateo 28:19) Nga mulikwatathana na nanga ya kuvwahelela ya Vakaleho va Yehova, cho mupwa mu vavuthamba va Njambi myaka yoshe. Vika munapande kulinga?

Munapande kuthzema Njambi hakwononoka mashiko endi. “Cizemo cetu kuli Njambi cilumbunuka ngeci twononoke mashiko endi. Co mashiko endi kesi amakalu kuli yetu embwe.”—1 Yowano 5:3.

Lingeni vimuli nakulilongetha. Yesu wendekele muthzimbu umo uje washolola nimbu eyi. Munalume umo wakunyanyama watungilile njuvo yendi ha limanya. Oloni munalume umo wakweva watungilile njuvo yendi ha lisheñavu. Omwo nyondthzi yakama yanyokele, yije njuvo vatungilile ha limanya kuyawile, oloni yije njuvo vatungilile ha lisheñavu yawile, cho kuwa kwayo kwapwile kwakuvi manene. Yesu wendekele ngwendi vaje vathziva vilongetha vyendi nakuvilinga vanalifu ngwe munalume wakunyanyama uje watungilile njuvo yendi ha limanya. Oloni vaje vathziva vilongetha vyendi nakujeneka kuvilinga vanalifu ngwe munalume wakweva uje watungilile njuvo yendi ha lisheñavu. Ha vanalume ava vavali, uli yimushaka kulifwa nendi?—Mateo 7:24-27.

Kulyana kuli Njambi. Kulyana kuli Njambi kwapwa kulomba kuli Yehova nakumuleka ngweni mushaka kulinga chithzango chendi myaka yoshe. Nga mulinga chithzango cha Njambi, cho musholola ngweni mwapwa mu vandongethi va Yesu Kilisitu.—Mateo 11:29.

Kumbwitika. “Vakumbwitike, co vivi vyove vavikushe akulombela kuli ikeye.”—Vilinga 22:16.

Pangeleni Njambi na ndthzili yeni yoshe. “Vyoshe mupanga, vipangeni na mbunge yeni yoshe, ngwe mulinakuvipangela [Yehova], kesi vanu.”—Kolose 3:23.