Kuli yeni mwazema Yehova Njambi na Lijwi lyendi, Mbimbiliya:

Yesu wendekele ngwendi: “Mukazibuka busunga, co busunga bukamipatula.” (Yowano 8:32) Anukeni simbu ya kulibanga imwazibile busunga bwa mu Lijwi lya Njambi. Mwabwahelelele manene kuzibuka ngweni mwasa kulilongesa busunga nameme muli mu kaye muje munashulu makuli.​—2 Timateo 3:1.

Yehova Njambi ashaka ngwendi tuzibuke busunga. Co tushaka kuleka bakwetu busunga mwafwa twabazema. Mu kupangela Yehova mwalibungila byuma byabingi. Tunapande kulifwita mangana tuyoye ngwe baka-Kilisitu mwafwa baka-Kilisitu bakakabangeya binangulo bya Yehova. Yesu watulekele ngila yaibwa itumweselamo kuli Njambi ngwetu twamuzema. Wendekele ngwendi: “Nga mwononoka mashiko ange, mukakala mu cizemo cange, ngwe omwo njononoka mashiko a Tate, co njili mu cizemo cendi.”​—Yowano 15:10.

Yesu wazema Ishe, co akalingi byoshe byamuleka Ishe. Nga tutembwinina Yesu mu buyoye bwetu, Yehova atuzema, co netu tupwa ba kubwahelela. Yesu wendekele ngwendi: “Nga mwazibuka byuma ebi, mukabezika nga mukabilinga.”​—Yowano 13:17.

Tunakulahela ngwetu eli libulu limikwasa muyoye mu kulitombola na busunga bwa mu Mbimbiliya na kupwa babusamba ba Njambi. Twakulahela ngwetu mutwalelelaho kuzema Njambi na ‘kukala mu cizemo cendi omwo mubandamena . . . mwonyo wa myaka yoshe.’​—Yunda 21.