Chivunga cha Kutwamenena cha Vakaleho va Yehova

Kuli Yeni mwathzema Yehova:

Yesu wendekele ngwendi: “Mukathzivuka vuthunga, cho vuthunga vukamipatula.” (Yowano 8:32) Awa majwi atutakametha manene. Twatha kuthzivuka vuthunga nameme mu matangwa ano vene a “kukotoka” muje munalithala makuli. (2 Timateo 3:1) Anukeni thimbu ya kulivanga imwathzivile vuthunga vwa mu Lijwi lya Njambi. Mwavwahelelele manene indi vati?

Kuthzivunga mwamuvwa vuthunga na kulekako vakwetu vitunathzivuka kunapu kwa theho. Oloni tunapande lalo kukala na futithi ije ilitombola na vuthunga vutunathzivuka. Twatha kulinga ngocho nga tukala mu chithzemo cha Njambi. Tunapande kulinga vika tukale mu chithzemo cha Njambi? Majwi endekele Yesu ha vuthsiki vuvamuthsiyile anakumbulula echi chihula. Walekele tupositolo vendi va kulongwa ngwendi: “Nga mwononoka mashiko ange, mukakala mu chithzemo change, ngwe omwo njononoka mashiko a Tate, cho njili mu chithzemo chendi.”—Yowano 15:10.

Yesu wakele mu chithzemo cha Njambi mwafwa wononokele mashiko endi. Netu mukemwo mutunapande kulinga. Tunapande kulinga vyuma vya vuthunga mu litangwa na litangwa athina tukale mu chithzemo cha Njambi. Ha vuthsiki vene ovu, Yesu wendekele ngwendi: “Nga mwathzivuka vyuma evi, mukavethzika nga mukavilinga.”—Yowano 13:17.

Tunakulahela ngwetu ou mukanda umikwatha mulinge vyuma vya vuthunga mu kuyoya kweni mangana mukale “mu chithzemo cha Njambi omwo muvandamena . . . mwonyo wa myaka yoshe.”—Yunda 21.