Ezra Walongesele Mashiko a Njambi

Kwetile myaka ya kukokela ku 70 nambe kutubakana kutunda habelukilile baIsalele babangi mu Jelusalema, oloni bamo bacikele mu mitambela ikwabo ya mu Bumwene bwa baPelesha. Kapilistu Ezra uje wakele na kulongesa Lishiko lya Yehova nendi wasalele. Ezra wazibile ngwabo banu ba mu Jelusalema kubakele na kukabangeya Mashiko, ngeci wayongwele kuya na kubakwasa. Mwene wa baPelesha Atazekisasi wamulekele ngwendi: ‘Njambi nakwana mana mangana ulongese Mashiko endi. Ya na baje bashaka kuya nobe.’ Ezra waliwanene na baje boshe bashakele kwiluka ku Jelusalema. Balombele kuli Yehova mangana abanyungilile mu bungezi bwabo bwabulaha, co baile ku Jelusalema.

Munima ya bingonde biwana, betele mu Jelusalema. Bamyata ba mu Jelusalema balekele Ezra ngwabo: ‘BaIsalele banalikele kwononoka Yehova, co banambata banakazi baje bakalemesa binjambi ba makuli.’ Ezra walingile bika mwazibile ngoco? Watsikamene halutwe lwa mbunga na kushangumuka kulombela ngwendi: ‘Yehova, unatulingila byuma byabingi manene, oloni yetu twalingi bubi ku mesho obe.’ Banu batengulukile, nameme ngoco, bacikele na kulinga byuma byabibi. Ngeci, Ezra wangwile bakulunu na maako mangana bakwase banu. Mukwetile bingonde bitatu, banu baje kubalemesele Yehova babashekele mu Isalele.

Mu myaka 12 yetile, batungulwile bibumbe bya Jelusalema. Ezra wakungulwilile banu mu mwela wa mbunga mangana abatandele Lishiko lya Njambi. Mwazengunwine libulu, banu bemanene. Ezra washangazalele Yehova, co banu nabo bolwele maboko abo mwilu mu kumwesa ngwabo balitabelele kwononoka mashiko a Njambi. Kutundaho, watandele na kulumbununa Lishiko, co banu batolililile mwamubwa. Balitabelele ngwabo bongumukile lalo na kutunda kuli Yehova, ngeci balilile. Lyamukwabo, Ezra wabatandelele lalo Lishiko. Mubazibukile ngwabo ololo balinga Ciwano ca Mapapela, haje bene bashangumukile kulibwahesela.

Ha matangwa 7 a ciwano, banu babwahelelele na kukandelela kuli Yehova mwafwa batejele mwamubwa. Kutunda mu simbu ya Joshua, kukwakele Ciwano ca Mapapela catubakanene eci. Munima ya ciwano, banu balikungulwile na kulombela ngwabo: ‘Obe Yehova, watupatwile mu bundungo na kutwana byakulya mutwakele mu mambo na kutwana lino lifuti lyalibwa. Oloni tunakala na kukutengulukila kushwa kumo. Watutuminine tupolofweto mangana bakutunangule, oloni kutwabatolililile. Nameme ngoco, watumwesele mbunge ya kubandamena. Co lalo wanyungile cikulaheso ciwakulahesele Abrahamu. Hanwoni tukukulahesa ngwetu tukwononoka.’ Ngeci, basonekele cikulaheso cabo, co bamyata na baLevi na tupilistu basainileko.