Bibumbe bya Jelusalema

Tucisimutwiyeniko tahi ha byuma byalingiwile myaka yaindondo kunima. Nehemiya wapwile kaIsalele uje wakele na kupangela Mwene Atazekisasi mu nganda ya Pelesha mu Shushani. Litangwa limo, ndolome ya Nehemiya wamunenelele muzimbu waubi kutunda ku Juda. Wamulekele ngwendi: ‘Banu baje baneluka ku Jelusalema bali mu bushonde. Bibumbe na bikolo bya nganda bibabiisile baka-Babiloni kanda babitungulule.’ Nehemiya walubalele. Co washakele kuya ku Jelusalema kukakwasa, ngeci walombelele kuli Njambi mangana mwene amutabese kuyako.

Litangwa limo, mwene wamwene Nehemiya nombwa. Ngeci mwene wamulekele ngwendi: ‘Kanda njikumoneho ngacije, bika binabihya?’ Nehemiya wamukumbulwile ngwendi: ‘Njinombwa mwafwa nganda yange ya Jelusalema inapu ngundu.’ Co mwene wamwihwile ngwendi: ‘Bika biushaka ngwobe njikulingile?’ Haje bene Nehemiya walombelele mu mbunge, mwamanesele wendekele ngwendi: ‘Shukulu-kambu, njitabese njiye ku Jelusalema mangana njikatungulule bibumbe bya nganda.’ Mwene Atazekisasi walekele Nehemiya ngwendi asa kuya, co wamwanene maswalale ba kumunyungilila mu bungenzi bwendi bwabulaha. Kutundaho, mwene wangwile Nehemiya kupwa ngubulu wa Juda na kumwana biti bya kutungisa bikolo bya nganda.

Nehemiya mwaketele ku Jelusalema, wakengesesele bibumbe bya nganda. Kutundaho, wakungulwile tupilistu na baka-kuyula na kubaleka ngwendi: ‘Nganda yabihya manene. Tunapande kuitungulula.’ Banu batabele, co bashangumukile kutungulula bibumbe.

Oloni bitozi bamo ba baIsalele bashangumukile kubashendumuna na kwendeka ngwabo: ‘Eci cibumbe cimuli na kutunga nambe mbanje asa kuciwisa.’ Nameme ngoco, baIsalele kubakele mbunge ku byuma bibakele na kwendeka, oloni batwaleleleleho kutunga. Co cipangi cakele na kwenda lika mwamubwa.

Bitozi baje batundile ku mitambela ya kuliseza-seza bayongwele kulwisa banu ba mu Jelusalema mu kukasumuna. BaJuda mubazibile ou muzimbu, balishoshomwenene manene. Oloni Nehemiya wabasimpisile ngwendi: ‘Keti muzibe lyoba. Yehova ali netu.’ Nehemiya wakele maswalale ha mitambela ya kuliseza-seza mangana banyungilile baka-kutunga, ngeci baje bitozi bonowele kubalwisa.

Bamanesele kutungulula bibumbe na bikolo ha matangwa 52 lika. Co Nehemiya wasanenene baLevi na tupilistu boshe mu Jelusalema mangana bakulinge cilika ca kukundika. Wangwile bibunga bibali bya baka-kwimba. Balondele ha bibumbe kupangesa Cikolo ca Kabwelubwelu, co bakele na kucaula mubakele na kuya kusambwa likwabo lya nganda. Bembilile Yehova mapembo, bingenjo na tulyalya. Ezra waile na cibunga cimo, Nehemiya waile na cibunga cikwabo co bakaliwanenene ku tempele. Banu boshe, banalume, banakazi na banike banene milambu kuli Yehova na kulinga cilika. Cilumo ca majwi abo a kubwahelela cazibikile na ku mitambela ya kulako.