Elizabethi Akala na Mbututu

Mukwetile myaka 400 kutunda habatungulwilile bibumbe bya nganda ya Jelusalema, kapilistu Zakaliya na munakazi wendi Elizabethi bakele na kukala kuyehi na nganda ya Jelusalema. Bakele mu bulo ha myaka yaingi, oloni kubakele na mwana. Litangwa limo, Zakaliya mwakele na kwenyeka isense mu tempele, kangelo wa lizina lya Gabriele washolokele kuli ikeye. Zakaliya wazibile lyoba, oloni kangelo wendekele ngwendi: ‘Keti uzibe lyoba. Njinakunenela muzimbu waubwa wa kutunda kuli Yehova. Munakazi wobe Elizabethi akala na mwana wa munalume, co lizina lyendi lipwa Iwano. Yehova nangula munobe Iwano mangana apange cipangi ca kulitila.’ Zakaliya wehwile kangelo ngwendi: “Njasa kukulahela bati majwi obe? Mwafwa yange njinakolo, co lalo munakazi wange nakulubala.” Gabriele wendekele ngwendi: ‘Njambi ikeye nanjitumu mangana njikunenele ou muzimbu. Oloni mwafwa kuwanjikulahelele, wonowa kwendeka kweta noho hakasemukila mbututu.’

Zakaliya weshwalele muje mu mwela wa kujela wa tempele kutubakana matangwa oshe. Ngeci mwatuhukile hanja, banu bashakele kuzibuka byuma byamwishwalesele. Oloni Zakaliya kasele kwendeka. Wakele na kwendeka nabo kupangesa maboko. Ngeci banu banangukile ngwabo Zakaliya natambula muzimbu wa kutunda kuli Njambi.

Mu kwita kwa simbu, Elizabethi wakele na cikute, co wakitile mbututu wa munalume ngwe mwendekelele kangelo. Babushoko na babusamba bendi mubezile na kumona mbututu, babwahelelele manene mwafwa wakele oni na mwana. Co Elizabethi wendekele ngwendi mbututu bamuluke lizina lya Iwano. Oloni bendekele ngwabo: ‘Naumo wahi ku babushoko bwobe wakala nolyo lizina. Muluke lizina lya ishe.’ Oloni Zakaliya wasonekele ha mbazubwila ya libaya ngwendi: “Lizina lyendi ikeye Iwano.” Haje bene, Zakaliya washangumukile lalo kwendeka. Co ebi byuma byoshe bashangumukile kubyendeka mu mutambela woshe wa Judeya. Co banu bakele na kulihula ngwabo: ‘Ou mwana akapwa wa cifwa muka?’

Co Zakaliya washulile na sipilitu ya kujela. Wapolofwetele ngwendi: ‘Bashangazale Yehova. Mwafwa wakulahesele Abrahamu ngwendi akatuma Mesiya mwobole mangana akutwobole. Iwano akapwa kapolofweto, co akabwahesela Mesiya ngila.’

Kuli cuma cikwabo ca kulitila calingiwile kuli Maliya kabushoko ka Elizabethi. Mu cilongesa cinatako tusimutwiya hali oco cuma.