Gabriele Endela Maliya

Elizabethi wakele na kabushoko wa mumbanda wa lizina lya Maliya uje wakele na kukala mu nganda ya Nazaleta mu Galileya. Maliya bamwendekeyeye kuli Jozefu uje wapwile muka-kushonga. Elizabethi mwapwisile bingonde 6 kutunda hemitilile, kangelo Gabriele washolokele kuli Maliya na kwendeka ngwendi: ‘Ulibati, Maliya? Yehova nakubezikisa manene.’ Oloni Maliya kazibisisile byalumbunwine. Ngeci, Gabriele wamulekele ngwendi: ‘Ukala na cikute na kukita mwana wa munalume, co unapande kumuluka ngwobe Yesu. Akapwa Mwene, co Bumwene bwendi bukakalako myaka yoshe.’

Maliya wakumbulwile ngwendi: ‘Oloni Kanda njililaleho laja na munalume, co njasa kukita bati mwana?’ Gabriele wendekelele ngwendi: ‘Na cimo cahi casa kwonwa kulinga Yehova. Sipilitu ya kujela ikeja hali yobe, co ukakala na mwana wa munalume. Kabushoko kobe Elizabethi nendi ali na cikute.’ Ngeci Maliya wendekele ngwendi: ‘Nji ndungo ya Yehova. Cilingiwe kuli yange ngwe muunendeka.’

Maliya waile na kumenekela Elizabethi mu nganda ya mu malundu. Maliya mwamumenekele, Elizabethi wazibile mbututu mwimo lyendi aninganga mwafwa ya kubwahelela. Elizabethi washulile na sipilitu ya kujela, ngeci wamulekele ngwendi: ‘Maliya, Yehova nakubezikisa manene. Njabezika mwafwa ina ya Mwata wange nanjendela.’ Maliya wendekele ngwendi: ‘Njishangazala Yehova na mbunge yange yoshe.’ Maliya watwaleleleho kukala na Elizabethi ha bingonde bitatu, munima welukile ku Nazaleta.

Jozefu mwazibukile ngwendi Maliya ali na cikute, washakele kumanesa busamba bwabo. Oloni kangelo washolokele kuli Jozefu mu cilota na kumuleka ngwendi: ‘Keti utewe kumwambata. Byahi byanabiisa.’ Ngeci, Jozefu wambatele Maliya na kumutwala ku njibo yendi.