Tungelo Bambulula Muzimbu wa Kusemuka kwa Yesu

Sezale Agustu uje wakele na kuyula mu bumwene bwa baLoma, washikile ngwendi baJuda boshe baye ku binganda byabo mangana bakalisonekese. Ngeci, Jozefu na Maliya baile ku Betelehema kuje kwatundile naanga ya Jozefu. Ha simbu ei, Maliya te ali muyehi na kusulumuna.

Mubaketele ku Betelehema, kubawanene njibo kwa kutulila, ngeci bakatulilile mu njibo ya bimuna. Co mukemwo mwapapelele munendi wa munalume Yesu. Kutundaho, wamubungilile mu binanga na kumulangeka mwakulila bimuna.

Kuyehi na Betelehema kwakele tunyungi baje bakele hanja butsiki oku bali na kunyunga butanga bwabo. Haje bene, kangelo wemanene halutwe lwabo, co bumpau bwa Yehova bwabazengelekele na kubatwila ceke. Baje tunyungi bazibile manene lyoba, oloni uje kangelo wabalekele ngwendi: ‘Keti muzibe lyoba. Njaminenela muzimbu waubwa. Mesiya nasemuka lelo mu nganda ya Betelehema.’ Haje bene, tungelo babangi basholokele mwilu, co bashangumukile kwendeka ngwabo: “Bumpau buye kuli Njambi wa mwilu, co kwoloka kukale hano hasi ku banu.” Kutundaho, tungelo belukile mwilu. Baje tunyungi balingile bati?

Bandekele ngwabo: ‘Tuyeni ku Betelehema hano bene.’ Bwasi-bwasi baile ku Betelehema, co bakawanene Jozefu na Maliya na mbututu yabo mu njibo ya bimuna.

Banu boshe baje bazibile byendekele kangelo babwahelelele manene. Maliya wasinganyekesesele manene ha majwi endekele kangelo, co kawebalele. Tunyungi belukile ku butanga bwabo, co bakandelelele kuli Yehova ha byuma bibazibile na kumona.