Yehova Wanyungililile Yesu

Ku butuhukilo bwa litangwa bwa lifuti lya Isalele kwakele banu baje bakulahelele ngwabo bingongonosi byasa kubatwamenena. Litangwa limo ku butsiki, banalume bamo ba ku Mwijatangwa bamwene cuma casholokele ngwe ngongonosi mwilu ili na kwenda, co baikabangeyeye. Ije “ngongonosi” yabatwamenenene ku Jelusalema. Baje banalume bashangumukile kwihula banu ngwabo: ‘Ali kuli mwanike uje akapwa mwene wa baJuda? Tunaija na kumutsikamena.’

Heloda uje wapwile mwene wa Jelusalema mwazibile bya mwene wamuha walishoshomwenene manene. Ngeci wehwile tupilistu bakama ngwendi: ‘Kuli kwanapande kukasemukila ou mwene?’ Co bamukumbulwile ngwabo: ‘Tupolofweto bendekele ngwabo akasemukila mu Betelehema.’ Ngeci Heloda wasanene baje banalume batundile ku Mwijatangwa na kubaleka ngwendi: ‘Yeni ku Betelehema mukatondesese mwamubwa kwali owo mwanike, nga mukamuwana, mwakunjileke mangana nange njikamutsikamene.’ Oloni Heloda wendekele makuli.

Ije “ngongonosi” yashangumukile kwenda lalo. Co baje banalume baikabangeyeye kuketa na ku Betelehema. Yakemanene helu ya njibo muje mwakele mwanike, co baje banalume bakobelele muje mu njibo. Bawanene Yesu na ina Maliya. Batsikamenene uje mwanike na kumwana bwana bwa goudi na isense ya kutoka na mira. Kuma Yehova ikeye watumine baje banalume mangana bakuliwane na Yesu? Embwe.

Buje butsiki, Yehova walekele Jozefu mu cilota ngwendi: ‘Heloda ashaka kutsiya Yesu. Ambata mwanike na ina mangana mutewele ku Ijipiti. Co ukakale kuje kweta noho hanjikakulekela ngwange wiluke.’ Haje bene, Jozefu na naanga yendi baile ku Ijipiti.

Yehova walekele baje banalume batundile mu Mwijatangwa ngwendi kubapandele kwilukila kuli Heloda. Heloda mwamwene ngwendi baje banalume banaililila, walubalele manene. Mwafwa ya kujeneka kuzibuka kwakele Yesu, Heloda washikile ngwendi banike boshe ba kupwa hamo na Yesu babatsiye. Oloni Yesu kubamutsiile mwafwa wakele mu Ijipiti.

Mu kwita kwa myaka, Heloda watsile. Co Yehova walekele Jozefu ngwendi: ‘Hanwoni wasa kwiluka ku Isalele.’ Jozefu na Maliya na Yesu belukile ku Isalele, co bakakele mu nganda ya Nazaleta.