Yesu Mwakele na Myaka 12

Jozefu na Maliya bakele na kukala mu Nazaleta na Yesu na bana babo ba bakwenje na bambanda. Jozefu wakele na kuyoyesela naanga yendi ha cipangi ca kushonga, co wakele na kuilongesa bya Yehova na mashiko endi. Jozefu na naanga yendi bakele na kuya ku sinagogi kushwa kumo, co lalo bakele na kuya ku Jelusalema mwaka na mwaka ku Paseka.

Yesu mwakele na myaka 12, ikeye na naanga yendi bakutile bungenzi bwabulaha bwa kuya ku Jelusalema ngwe mubakele na kulinga simbu yoshe. Mu Jelusalema mwashulile banu babangi baje bezile ku cilika ca Paseka. Cilika ca Paseka mucahwile, Jozefu na Maliya bakutile bungenzi bwa kwiluka kwimbo, co basinganyekele ngwabo Yesu nendi wakele ha cibunga cabo. Oloni mubamutondele hakati ka babushoko bwabo kubamuwanene.

Belukile ku Jelusalema, co bakashakezekele munabo ha matangwa atatu. Co bakamuwanene ku tempele. Yesu wakele mukati ka balongesi oku ali na kubatolilila na kubehula bihula. Balongesi bakomokele manene cashu cendi ca kuzibisisa byuma, co bakele na kumwihula bihula. Balikomokelele bikumbululo byendi. Balimwenenene ngwabo wazibukile mwamubwa Lishiko lya Yehova.

Jozefu na Maliya balishoshomwenene manene. Co Maliya wendekele ngwendi: ‘Munange, bika watulingila ngacije? Tunakala na kukutonda manene. Unakala kuli?’ Oloni Yesu wakumbulwile ina ngwendi: “Kuma kumuzibuka ngweni njinapande kukala mu njibo ya Tate ndi?”

Yesu welukile na bisemi bendi kwimbo. Jozefu walongesele Yesu cipangi ca kushonga. Yesu mwapwile mwanike, wapwile munu wa cifwa muka? Yesu mwakele na kukola, watwaleleleleho kukala na mana, co Njambi na banu batwaleleleleho kubwahelela hali ikeye.