Iwano Abwahesa Ngila

Iwano, muna Zakaliya na Elizabethi wapwile kapolofweto mwakolele. Yehova wapangesele Iwano mu kulongesa banu ngwendi Mesiya ali na kwija. Oloni kutubakana kukalongesa mu masinagogi nambe mu bimbongi, Iwano waile na kukambulwila mu mambo. Banu bezile kutunda mu Jelusalema na mu Judeya mwoshe mangana Iwano abalongese. Wabalongesele ngwendi, nga bashaka kuzibisa Njambi kubwaha, bapandele kwecela kulinga byuma byabibi. Munima ya kutolilila kuli Iwano, banu babangi batengulukile na kwecela bilinga byabo byabibi. Co Iwano wabambwitikile mu Ndonga ya Jodani.

Iwano wasiwisile buyoye bwendi. Wakele na kuzala bizalo bya kupanga ha bwaka bwa kamelu na kulya bimbimba na buki bwa mu shwata. Banu bashakele kuzibuka byabingi hali Iwano. Bafalisi na Basaduki baje bapwile baka-kulyalesa nabo bezile kwa kumona Iwano. Iwano wabalekele ngwendi: ‘Munapande kutenguluka na kwecela bilinga byabibi. Keti musinganyeke ngweni mu ba kulitila mwafwa mu bana ba Abrahamu. Kupwa bana ba Abrahamu kukulumbununa ngwabo mu bana ba Njambi.’

Banu babangi bezile kuli Iwano na kumwihula ngwabo: ‘Bika bitunapande kulinga mangana tuzibise Njambi kubwaha?’ Iwano wabakumbulwile ngwendi: ‘Nga uli na mikanjo ibali, anako umo ku munu uje kesi nawo.’ Kuma muzibuka byendekelele ngoco ndi? Washakele ngwendi bandongesi bendi bazibuke ngwabo nga bashaka kuzibisa Njambi kubwaha, banapande kuzema banu.

Iwano walekele baka-kutelesa mitelo ngwendi: ‘Pweni ba kulongwa, co keti mulinge byuma mu linyanyamena.’ Co lalo walekele maswalale ngwendi: ‘Keti mutambule lizika-kanwa nambe kwendeka makuli.’

Tupilistu na baLevi nabo bezile kuli ikeye na kumwihula ngwabo: ‘Yobe iya? Banu boshe bashaka bazibuke.’ Iwano wabakumbulwile ngwendi: ‘Yange lijwi litambeka mu mambo, njikwasa banu beje kuli Yehova, ngwe mwendekelele Isaya.’

Banu bazemene byakele na kubalongesa Iwano. Co banu babangi bakele na kusinganyeka ngwabo ikeye Mesiya. Oloni wabalekele ngwendi: ‘Kuli umo ali na kwija uje anjitubakana. Kunjafwililile kuzitula miba ya masanda endi. Njili na kumbwitika na mema, oloni ikeye a kumbwitika na sipilitu ya kujela.’