Yesu Apwa Mesiya

Iwano wakele na kwambulula ngwendi: ‘Kuli wakama kunjitubakana ali na kwija.’ Yesu mwakele na myaka 30, watundile ku Galileya na kuya ku Ndonga ya Jodani, kuje kwakele na kumbwitikila banu Iwano. Yesu walekele Iwano ngwendi amumbwitike, oloni Iwano wamukumbulwile ngwendi: ‘Kunjapandele kukumbwitika. Yobe unapande kunjimbwitika.’ Oloni Yesu walekele Iwano ngwendi: ‘Yehova ashaka ngwendi unjimbwitike.’ Ngeci, baile mu Ndonga ya Jodani, co Iwano wambwitikile mubila woshe wa Yesu mu mema.

Yesu mwatundile lika mu mema, walombelele. Haje bene, melu ashokolokele, co sipilitu ya Njambi yasikumukilile hali ikeye mu cifwa ca liyembe. Kutundaho, Yehova wendekele kutundilila mwilu ngwendi: “Yobe Munange, injazema, ukanjizibisa kubwaha.”

Sipilitu ya Yehova muyezile hali Yesu, wapwile oni Kristu, nambe ngwetu Mesiya. Wapandele oni kushangumuka cipangi camutuminine Yehova hano hasi.

Mwatundile lika ha kumumbwitika, Yesu waile mu mambo na kukakalamo matangwa 40. Mwelukile, waile na kukalimona na Iwano. Yesu mwakele na kwija kuli Iwano, Iwano wendekele ngwendi: ‘Ou ikeye Muna Manga wa Njambi uje akatundisa bubi mu kaye.’ Awa majwi amwesele ngwawo Iwano wakele na kuleka banu ngwendi Yesu ikeye Mesiya. Kuma muzibuka byalingiwile kuli Yesu mwakele mu mambo ndi? Tuwana cikumbululo mu cilongesa cinatako.