Satana Eseka Yesu

Sipilitu ya kujela yatwalele Yesu mu mambo munima ya kumumbwitika. Kalile cakulya coshe-coshe ha matangwa 40, co wazibile manene njala. Co Satana wezile na kweseka Yesu ngwendi: ‘Nga cili bene u Muna Njambi, leka awa mamanya apwe makende.’ Oloni Yesu wamukumbulwile kupangesa Bisoneka ngwendi: ‘Banasoneka ngwabo munu kapandele kuyoya lika byakulya. Oloni napande kuyoya na majwi a kutunda kuli Yehova.’

Co Satana wesekele lalo Yesu ngwendi: ‘Nga cili bene u Muna Njambi, lyumbile hasi mwafwa banasoneka ngwabo Njambi akashika tungelo bendi, co bakakukabwila.’ Oloni Yesu wakumbulwile kupangesa Bisoneka ngwendi: ‘Banasoneka ngwabo keti weseke Yehova.’

Kutandaho, Satana wamwesele Yesu bumwene bwoshe bwa muno mu kaye na bumpau bwabwo na kwendeka ngwendi: ‘Njikwana bumwene bwoshe na bumpau bwabwo nga unjitsikamena na kunjilemesa nambe lumolika.’ Oloni Yesu wamukumbulwile ngwendi: ‘Tundaha obe Satana! Mwafwa banasoneka ngwabo unapande kulemesa lika Yehova.’

Liyabolo waile, co tungelo bamunenelele byakulya. Kutunda bene haje, Yesu washangumukile kwambulula muzimbu waubwa wa Bumwene. Cikeco cipangi cibamutumine kwa kupanga hano hasi. Banu bazemene byuma byakele na kulongesa Yesu, co bamukabangeyeye kwoshe kwakele na kuya.