Yesu Ajelesa Tempele

Mu mwaka wa 30 C.E., mu cibatu ca nyonzi, Yesu waile ku Jelusalema. Banu babangi baile ku Paseka mu Jelusalema. Oku ku cilika bakele na kwana mulambu wa tusitu ku tempele. Banu bamo bakele na kwija na tusitu babo, oloni beka bakele na kulandela mu Jelusalema.

Yesu mwaile ku tempele, wawanene banu bali na kulandesa tusitu mu tempele. Bakele na kulinga mingoso mu njibo ya kulemesela Yehova. Yesu walingile bati? Wapangele likote lya mikole, co washekele bimanga na bingombe mu tempele. Kutundaho, wandumwine bimesa bya baka-kucinca bimbongo na kumbila makoini abo hasi. Co lalo Yesu walekele baje bakele na kulandesa mayembe ngwendi: “Tundiseni ebi byuma muno! Keti mutengulule njibo ya Tate kupwa njibo ya kulandesela!”

Banu balikomokelele mubamwene byuma byalingile Yesu ku tempele. Bandongesi bendi banukile bupolofweto bwa Mesiya buje bwendekele ngwabwo: “Ntwima injili nayo ha njibo yobe injilya.”

Mu mwaka wa 33 C.E., Yesu wajelesele lalo tempele. Washakele ngwendi banu basingimike njibo ya Ishe.