Munakazi ha Lisima

Munima ya Paseka, Yesu na bandongesi bendi belukile ku Galileya kupangesa ngila ije yetile mu Samaliya. Mubetele kuyehi na nganda ya Saika, ha mutambela ubatumbwile ngwabo lisima lya Jakobu, Yesu walihwimisileko omwo bandongesi bendi baciile na kulanda byakulya mu nganda.

Munakazi umo wezile na kutekula mema ku lisima. Yesu wamulombele ngwendi: “Njaneko mema a kunwa.” Co uje munakazi wamukumbulwile ngwendi: ‘Bika biuli na kunjendekesela? Nji Kasamaliya. BaJuda kubesi kwendekesa Basamaliya.’ Yesu wamulekele ngwendi: ‘Ngwe uzibuka munu iuli na kwendeka nendi, ngwe unanjilombo mema a kunwa, co ngwe njakwana mema a kuyoya.’ Uje munakazi wamwihwile ngwendi: ‘Uli na kulumbununa bika? Kuwesi nambe na citekwiso.’ Yesu wamukumbulwile ngwendi: ‘Woshe anwa mema anjimwana kakatsi lalo lihwila.’ Co uje munakazi wendekele ngwendi: “Mwata njane owo mema.”

Yesu walekele uje munakazi ngwendi: ‘Ya ukasane munalume wobe.’ Oloni wamukumbulwile ngwendi: ‘Kunjesi na munalume.’ Co Yesu wamulekele ngwendi: ‘Unendeka busunga. Washombokaho ku banalume batanu, co munalume iuli na kuyoya nendi hano, keti munalume wobe.’ Uje munakazi wendekele ngwendi: ‘Njamono ngwange ukapolofweto. Banu ba mu nganda yetu banakulahela ngwabo twasa kulemesa Njambi aha ha munkinda, oloni baJuda ngwabo twasa kulemesela lika mu Jelusalema. Njakulahela ngwange Mesiya mwaija, akutulongesa mwa kulemesela.’ Kutundaho, Yesu wamulekele cuma cije te kanda alekeho munu woshe-woshe. Wamulekele ngwendi: ‘Yange Mesiya.’

Uje munakazi washatukilile mu nganda na kukaleka Basamaliya ngwendi: ‘Njakulahela ngwange njinawana Mesiya. Azibuka byuma byoshe binjinalingi. Ijeni mwakumone!’ Banu bamukabangeyeye ku lisima na kukatolilila ku bilongesa bya Yesu.

Basamaliya balanyele Yesu akale mu nganda yabo. Wabalongesele ha matangwa abali, co banu babangi bamukulahelele. Basamaliya balekele uje munakazi ngwabo: ‘Munima ya kutolilila kuli ou munalume, twazibuka ngwetu cili bene ikeye mwobole wa kaye.’