Yesu ali na Kwambulula Muzimbu Waubwa wa Bumwene

Munima lika ya kumumbwitika, Yesu washangumukile kwambulula ngwendi: ‘Bumwene bwa Njambi buli muyehi.’ Bandongesi bendi bakele na kuya nendi mwakele na kuya ku Galileya na ku Judeya. Yesu mwelukile kwimbo lyendi ku Nazaleta, waile mu sinagogi. Mwaketele wazengunwine libulu lya kuzenga lya Isaya, co watandele mu kutambekela ngwendi: ‘Yehova nanjibwabesa na sipilitu ya kujela mangana njambulule muzimbu waubwa.’ Walumbunwine bika mwendekele ngoco? Walumbunwine ngwendi bamubwabesele na sipilitu ya kujela mangana ambulule muzimbu waubwa keti kulinga lika bikomokeso ngwe mubakele na kusinganyekela banu. Kutundoho, walekele baje bakele na kumutolilila ngwendi: ‘Lelo obu bupolofweto bunalishulisilila.’

Yesu waile ku Kalunga-ndonga wa Galileya kuje kwakaliwanene na bandongesi bendi bawana baje bapwile baka-kutsiya bisi. Mazina a baje bandongesi apwile Pita, Andru, Jemusi na Iwano. Yesu wabalanyele ngwendi: ‘Njikabangeyeni, co njikamipwisa baka-kuta banu.’ Co haje bene basezele mingoso yabo ya kuta bisi na kumukabangeya. Bambulwile mu Galileya mwoshe bya Bumwene bwa Yehova. Bambulwilile muzimbu waubwa mu masinagogi, mu ma maliketi na mu bitingitingi. Co mbunga yakama ya banu yakele na kubakabangeya kwoshe kubakele na kuya. Byuma byalingile Yesu byajalakanene mu mitambela yoshe kuketa na ku Siria.

Yesu wanene bandongesi bamo nzili ya kukangwisa banu na kusheka badimona. Bamo babo bakele na kumukabangeya mwakele na kuya na kwambulula mu nganda na nganda. Co banakazi bamo ba kulongwa ba kufwa ngwe Maliya Magadalena, Joana, Suzana na bakwabo bakele na kukwasa Yesu na baka-kumubangeya mu bipangi bimo.

Yesu mwamanesele kulongesa bandongesi bendi, wabatumine kukambulula muzimbu waubwa. Mubakele na kwambulwila mu Galileya, banu babangi bapwile bandongesi, co babambwitikile. Ngeci, Yesu wesekesele baje banu babangi ku mahya na bimbuto bije binahi binabandamena kubiteja. Wendekele ngwendi: ‘Lombeni Yehova atume baka-kuteja bimbuto babangi.’ Kutundaho, Yesu wangwile bakupwa 70 ku bandongesi bendi na kubatuma kukambulula mu Judeya mwoshe. Wabatumine mu bibunga. Bambulwile muzimbu waubwa wa Bumwene ku banu ba miyati yoshe. Bandongesi bendi mubelukile, bashungwiiye kuleka Yesu byuma bibalingile. Liyabolo kasele kwonowesa cipangi ca kwambulula.

Yesu walingile mwoshe mwaselele kulongesa bandongesi bendi cipangi ca kwambulula mwafwa washakele ngwendi batwaleleleho kulinga ngoco nameme ha simbi yelukile mwilu. Wabalekele ngwendi: ‘Ambululeni muzimbu waubwa mu kaye koshe. Longeseni banu Lijwi lya Njambi na kubambwitika.’