Yesu Eluka Mwilu

Yesu mwaile ku Galileya wakaliwanene na baka-kumukabangeya. Wabanene lishiko lya seho manene. Wabalekele ngwendi: ‘Yeni mukapwise banu ba ku mafuti oshe bandongesi. Mukabalongese byuma byoshe binjinamilongesa na kubambwitika.’ Co wakulahesele ngwendi: ‘Anukeni ngweni njili hamo neni matangwa oshe.’

Yesu mwasangukile, washolokele kuli bandongesi bendi babangi mu Galileya na mu Jelusalema ha matangwa 40. Wabalongesele bilongesa bya seho na kulinga bikomokeso byabingi. Kutundaho, Yesu wakaliwanene na bandongesi bendi lwamamaneselelo ha Munkinda wa Olive. Wabalekele ngwendi: ‘Keti mutunde mu Jelusalema. Twaleleleniho kubandamena byanakulahesa Tate.’

Tupositolo bendi kubazibisisile byalumbunwine. Bamwihwile ngwabo: ‘Kuma upwoni mwene wa Isalele ndi?’ Yesu wabakumbulwile ngwendi: ‘Simbu ya Yehova ya kunjipwisa mwene kanda yete. Ololo mutambula nzili ya kutunda ku sipilitu ya kujela, co mukapwa bakaleho bange. Yeni mukambulwile mu Jelusalema, mu Judeya, mu Samaliya na ku mitambela ya kulako ya mu kaye.’

Mwamanesele kwendeka ebi byuma, bamutwalele mwilu oku bandongesi bendi banatala, co lishelwa lyamufwikile, ngeci kubamumwene lalo.

Bandongesi bendi batundile ha Munkinda wa Olive, co baile mu Jelusalema. Bakele na kulikungulwila mu mulili wa helu na kulombela. Babandamenene Yesu abaleke byuma bikwabo bibapandele kulinga.